ສາທາສາລະວັນ ແລະ ກວາງຈິ້  ສືບຕໍ່ຮ່ວມມືວຽກງານສາທາລະສຸກ 

ກອງປະຊຸມພົບປະແລກປ່ຽນບົດຮຽນດ້ານສາທາລະນະສຸຸກ ລະຫວ່າງ ພະແນກສາທາລະນະສຸກແຂວງສາລະວັນ ສປປ ລາວ ແລະ ແຂວງກວາງຈິ້ ສສ ຫວຽດນາມໄດ້ຈັດຂຶ້ນໃນວັນທີ 11 ເມສາຜ່ານມານີ້, ທີ່ສະໂມສອນແຂວງສາລະວັນ.ແຂວງສາລະວັນ ນຳໂດຍ ທ່ານ ອາຄົມ ລໍ່າວິຈິດ ກຳມະການພັກແຂວງ ຫົວໜ້າພະແນກສາທາລະນະສຸກແຂວງສາລະວັນ  ພ້ອມຄະນະ, ແຂວງກວາງຈິ້ ນຳໂດຍ ທ່ານ ໂດະ ວັນ ຮຸງ ກຳມະການພັກແຂວງ ຫົວໜ້າພະແນກສາທາລະນະສຸກແຂວງ ພ້ອມຄະນະເຂົ້າຮ່ວມ.
ກອງປະຊຸມ ທັງສອງຝ່າຍໄດ້ລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ ພ້ອມທັງໄດ້ຮ່ວມກັນເຊັນບົດບັນສືບຕໍ່ການຈັດຕັ້ງປະຕິບັດວຽກງານສາທາລະສຸກ ໃນ ປີ 2024-2025 ມີ 8 ວຽກສຳຄັນຄື: 1.ທັງສອງຝ່າຍເຫັນດີຮັບຮອງເອົາຜົນສໍາເລັດໃນການຈັດຕັ້ງປະຕິບັດ ການຮ່ວມມືດ້ານສາທາລະນະສຸກ ແລະ ເຫັນດີສືບຕໍ່ສ້າງສາຍພົວພັນໃຫ້ມີຄວາມແໜ້ນແຟ້ນກວ່າເກົ່າ;2.ເຫັນດີຮັບຮອງຮ່າງບົດລາຍງານລວມເປັນເອກະສັນສືບຕໍ່ ແລກປ່ຽນຂໍ້ມູນຂ່າວສານກ່ຽວກັບສະພາບການລະບາດຂອງພະຍາດ ປະຈໍາເດືອນ;ການກັກກັນພະຍາດຕາມຊາຍແດນ ແລະ ການເກີດເຫດສຸກເສີນພາຍໃນ 24-48 ຊົ່ວໂມງ;ປະຕິບັດລະບົດການລາຍງານຢ່າງທ່ວງທັນກ່ຽວກັບສະພາບຂອງພະຍາດ, ການລະບາດ, ການກວດກາພະຍາດຢູ່ບໍລິເວນຊາຍແດນ;3. ສືບຕໍ່ດໍາເນີນການພົບປະ ແລກປ່ຽນໝູນວຽນກັນໃນການຈັດກອງປະຊຸມ 1 ຄັ້ງ/ປີ ລະຫວ່າງ2 ເມືອງ,ເມືອງສະໝ້ວຍ (ສາລະວັນ) ແລະ ເມືອງ ດາກຣົງ (ກວາງຈິ້);ລະຫວ່າງ ພະແນກສາທາລະນະສຸກແຂວງ ສາລະວັນ ແລະ ພະແນກສາທາລະນະສຸກແຂວງ ກວາງຈີ້ 1 ຄັ້ງ/ປີ,4. ສືບຕໍ່ປະສານສົມທົບກັນ ກ່ຽວກັບວຽກງານກັກກັນ ພະຍາດລະບາດ ລະຫວ່າງໜ່ວຍງານກັກກັນພະຍາດປະຈໍາດ່ານ,5. ສືບຕໍ່ຮ່ວມມື ແລະ ແລກປ່ຽນບົດຮຽນ ລະຫວ່າງ ສອງໂຮງຮຽນແພດ;6. ສືບຕໍ່ໃຫ້ມີການລົງນາມການຊ່ວຍເຫຼືອດ້ານວິຊາການ ລະຫວ່າງ 2 ໂຮງໝໍແຂວງ (ໂຮງໝໍແຂວງ ສາລະວັນ ແລະ ໂຮງໝໍແຂວງ ກວາງຈິ້),7.ສະໜອງຂໍ້ມູນຜູ້ພິການຢູ່ແຂວງ ສາລະວັນ ໃຫ້ແຂວງ ກວາງຈິ້ ເພື່ອຮັບອຸປະກອນຊ່ວຍເຫຼືອຕ່າງໆ ເຊັ່ນ: ລໍ້ເຂັນ,ແຂນ - ຂາທຽມ,ໄມ້ຄໍ້າເທົ້າ ແລະ ອຸປະກອນອື່ນໆ;8.ກອງປະຊຸມທົບທວນການຮ່ວມມືດ້ານສາທາລະນະສຸກຄັ້ງຕໍ່ໄປ ຈະໄດ້ຈັດຂຶ້ນທີ່ແຂວງກວາງຈິ້ ສສ ຫວຽດນາມ. 
ຈາກນັ້ນໃນພິທີ ທ່ານ ອາຄົມ ລໍ່າວິຈິດ ກຳມະການພັກແຂວງ ແລະ ທ່ານ ໂດະ ວັນ ຮຸງ ໄດ້ຮ່ວມກັນລົງນາມເຊັນບົດບັນທຶກຊ່ວຍຈຳ ການຈັດຕັ້ງປະຕິບັດວຽກງານສາທາລະນະສຸກຮອບດ້ານ ປີ 2024-2025 ໂດຍຊ້ອງໜ້າຄະນະທັງສອງຝ່າຍເຂົ້າຮ່ວມເປັນສັກຂິພິຍານ. 
(ພາບ-ຂ່າວ: ທິດລານີ ໂຄດໂຍທາ).