 |
ສະຫາຍ ຫງວຽນ ວັນ ເຟືອງ ໄດ້ຖືໂອກາດດັ່ງກ່າວ, ພອນອວຍໄຊແດ່ການນຳພັກ-ລັດຂອງແຂວງສະຫວັນນະເຂດ ເນື່ອງໃນໂອກາດບຸນປີໃໝ່ລາວທີ່ຈະມາເຖິງໃນມໍ່ໆນີ້, ພ້ອມທັງໄດ້ກ່າວລາຍງານການຈັດຕັ້ງປະຕິບັດການຮ່ວມມືລະຫວ່າງສອງແຂວງໃນໄລຍະຜ່ານມາ ແລະ ນຳສະ ເໜີແຜນການຮ່ວມມືໃນຕໍ່ໜ້າ.
ສະຫາຍ ບຸນໂຈມ ອຸບົນປະເສີດ ໄດ້ຂໍສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຫວຽດນາມ ຄັ້ງທີ XIV ແລະ ຜົນສຳເລັດຂອງກອງປະຊຸມໃຫຍ່ອົງຄະນະພັກແຂວງກວາງຈິ ຄັ້ງທີ I ກໍຄືຜົນສຳເລັດບັ້ນການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທີ່ຜ່ານມານີ້. ການຢ້ຽມຢາມຄັ້ງນີ້, ແມ່ນມີຄວາມໝາຍສໍາຄັນຢ່າງຍິ່ງ ຊຶ່ງເປັນການພົບປະຢ່າງເປັນທາງການຄັ້ງທຳອິດ ລະຫວ່າງການນໍາຂັ້ນສູງຂອງສອງແຂວງ, ພາຍຫຼັງສຳເລັດກອງປະຊຸມໃຫຍ່ອົງຄະນະພັກແຂວງ ກໍຄືກອງປະຊຸມໃຫຍ່ຜູ້ແທນທົ່ວປະເທດຂອງສອງພັກພວກເຮົາ ກໍຄືພາຍຫຼັງທີ່ແຂວງກວາງຈິເກົ່າ ແລະ ແຂວງກວາງບິ່ງເກົ່າ ເປັນແຂວງກວາງຈິໃໝ່, ນີ້ບໍ່ພຽງແຕ່ເປັນການຜັນຂະຫຍາຍເນື້ອໃນບົດບັນທຶກການຮ່ວມມືຂອງສອງແຂວງ, ແຕ່ຍັງເປັນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ເວົ້າລວມ, ເວົ້າສະເພາະ ລະຫວ່າງແຂວງສະຫວັນນະເຂດ ແລະ ແຂວງກວາງຈິ ໃຫ້ແໜ້ນແຟ້ນຍິ່ງໆຂຶ້ນ. ພ້ອມນີ້, ສະຫາຍ ບຸນໂຈມ ອຸບົນປະເສີດ ຍັງໄດ້ກ່າວລາຍງານສະພາບການພັດທະນາເສດຖະກິດ-ສັງຄົມຂອງແຂວງໃນປີ 2025 ແລະ ການຈັດຕັ້ງປະຕິບັດບົດບັນທຶກຮ່ວມມືລະຫວ່າງຄະນະຜູ້ແທນຂັ້ນສູງແຂວງສະຫວັນນະເຂດ ກັບຄະນະຜູ້ແທນຂັ້ນສູງແຂວງກວາງຈິໃນຊຸມປີຜ່ານມາ (2023-2025) ໃຫ້ຄະນະຜູ້ແທນຂັ້ນສູງຂອງແຂວງກວາງຈິໄດ້ຮັບຊາບ.
 |
ໃນພິທີສຳຄັນດັ່ງກ່າວນີ້, ທັງສອງຝ່າຍ ຍັງໄດ້ມີພິທີລົງນາມໃນບົດບັນທຶກການຮ່ວມມື ລະຫວ່າງສະຫາຍເລຂາພັກແຂວງສະຫວັນນະເຂດ ແລະ ສະຫາຍເລຂາພັກແຂວງກວາງຈິ ແລະ ໄດ້ມີການລົງນາມໃນບົດບັນທຶກການຮ່ວມມືໃນປີ 2026 ຂອງແຂວງ ລະຫວ່າງສະຫາຍ ທອງໃສ ໄຊຍະວົງຄຳດີ ຮອງປະທານຄະນະກຳມະການປົກຄອງແຂວງສະຫວັນນະເຂດ ແລະ ສະຫາຍ ຮວ່າງ ນາມ ຮອງປະທານຜູ້ປະຈຳການຄະນະກຳມະການປະຊາຊົນແຂວງກວາງຈິ, ຈາກນັ້ນ ຄະນະຜູ້ແທນຂັ້ນສູງແຂວງກວາງຈິ ກໍໄດ້ມອບເງິນຈຳນວນ 500 ລ້ານດົງ ໃຫ້ແຂວງສະຫວັນນະເຂດ ເພື່ອປະກອບສ່ວນຊ່ວຍເຫຼືອສັງຄົມຂອງແຂວງນຳອີກ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ