ວັນທີ 5 ມິຖຸນາ 2026, ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກຳມະການກາງພັກກອມມູນິດຈີນ ປະທານປະເທດ ແຫ່ງ ສາທາລະນະລັດ ປະຊາຊົນຈີນ ໄດ້ຈັດກອງປະຊຸມພົບປະກັບ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ໄດ້ເດີນທາງມາຢ້ຽມຢາມ ສປ ຈີນ ທາງລັດຖະກິດ ຢູ່ນະຄອນຫຼວງປັກກິ່ງ. ສອງຝ່າຍໄດ້ອອກ “ ຖະແຫຼງການຮ່ວມ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ປະຊາຊົນຈີນ ວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ ທີ່ເຂັ້ມແຂງໜຽວແໜ້ນໃນທຸກສະພາບຂອງຍຸກສະໃໝ່” ຊຶ່ງໄດ້ຍົກລະດັບສາຍພົວພັນຂອງສອງປະເທດຂຶ້ນສູ່ລະດັບສູງສຸດທາງປະຫວັດສາດຢ່າງທີ່ບໍ່ເຄີຍມີມາກ່ອນ. ປະທານ ສີ ຈິ້ນຜິງ ໄດ້ຊີ້ໃຫ້ເຫັນວ່າ, ສອງປະເທດ ລາວ ແລະ ຈີນ “ມີອຸດົມການອັນດຽວກັນ, ມີລະບອບສັງຄົມ ແລະ ເສັ້ນທາງການພັດທະນາທີ່ຄ້າຍຄືກັນ” ແລະ ສາຍພົວພັນຂອງສອງປະເທດແມ່ນ “ຍິ່ງຜ່ານຜ່າການເວລາກໍຍິ່ງແໜ້ນ ແຟ້ນ, ຍິ່ງຜ່ານຜ່າການເວລາກໍຍິ່ງສົດໃໝ່”. ແນວທາງການຢູ່ຮ່ວມກັນນີ້ ຊຶ່ງມີການຮັບຮູ້ຮ່ວມກັນດ້ານລະບອບເປັນພື້ນຖານ, ມີຄວາມໃກ້ຊິດທາງພູມິສາດເປັນເງື່ອນໄຂ ແລະ ມີການເຊື່ອມປະສານຜົນປະໂຫຍດດ້ານການພັດທະນາຢ່າງເລິກເຊິ່ງເປັນແຮງຂັບເຄື່ອນ, ເພື່ອເປັນຕົ້ນແບບພາກປະຕິບັດທີ່ມີຄວາມໝາຍຄວາມສໍາຄັນ ສໍາລັບການສ້າງປະຊາຄົມຄູ່ຮ່ວມຊາຕາກຳໃນພາກພື້ນອ້ອມຂ້າງ ແລະ ລວມເຖິງມວນມະນຸດ.
ຄວາມໄວ້ວາງໃຈຊຶ່ງກັນແລະກັນ ທາງດ້ານການເມືອງ ທີ່ມີອຸດົມການ ແລະ ເປົ້າໝາຍສອດຄ່ອງກັນລາວ ແລະ ຈີນ ຕ່າງເປັນປະເທດສັງຄົມນິຍົມ ທີ່ນໍາພາໂດຍພັກກອມມູນິດ. ຄຸນລັກສະນະດ້ານລະບອບນີ້ໄດ້ສ້າງພື້ນຖານຄວາມໄວ້ວາງໃຈທີ່ມີລັກສະນະສະເພາະໃຫ້ແກ່ສາຍພົວພັນຂອງ ສອງປະເທດ, ເຮັດໃຫ້ສອງຝ່າຍມີຄວາມເຂົ້າໃຈ ແລະ ການຮັບຮູ້ຕໍ່ໂລຊິກທາງການເມືອງພາຍໃນ ຂອງກັນ ແລະ ກັນຢ່າງເປັນທຳມະຊາດ. ຖະແຫຼງການຮ່ວມຄັ້ງນີ້ໄດ້ລະບຸຢ່າງຊັດເຈນວ່າ ສອງຝ່າຍ ຈະ “ຮ່ວມກັນປົກປ້ອງລະບອບສັງຄົມນິຍົມ ແລະ ບົດບາດການນໍາພາຂອງພັກກອມມູນິດ”, ພ້ອມທັງຕັດສິນໃຈສ້າງກົນໄກການສົນທະນາດ້ານຍຸດທະສາດຂັ້ນລັດຖະມົນຕີ ໃນຮູບແບບ “3+3” ໃນຂົງເຂດການຕ່າງປະເທດ, ປ້ອງກັນຊາດ ແລະ ປ້ອງກັນຄວາມສະຫງົບ ຊຶ່ງເປັນການຫັນຄວາມໄວ້ວາງໃຈທາງການເມືອງຈາກການເຫັນພ້ອມຮ່ວມກັນດ້ານຍຸດທະສາດ ໄປສູ່ກອບລະບອບທີ່ສາມາດນໍາປະຕິບັດໄດ້ຈິງ ແລະ ຖືເປັນເຫດຜົນທີ່ເລິກເຊິ່ງ ທີ່ເຮັດໃຫ້ສາຍພົວພັນ ລາວ-ຈີນ ສາມາດຮັກສາຄວາມໝັ້ນຄົງໄດ້ຢ່າງຕໍ່ເນື່ອງ ເຖິງແມ່ນວ່າຈະຜ່ານຄວາມຜັນຜວນນານາປະການຕະຫຼອດ 65 ປີຜ່ານມາ. ການຮັບຮູ້ຮ່ວມກັນດ້ານລະບອບໄດ້ສ້າງຖານຮາກແຫ່ງຄວາມໄວ້ວາງໃຈທີ່ແໜ້ນແຟ້ນ. ຈຸດທີ່ເຮັດໃຫ້ສາຍພົວພັນລາວ-ຈີນ ແຕກຕ່າງຈາກຄວາມສຳພັນລະຫວ່າງປະເທດທົ່ວໄປ, ແມ່ນຢູ່ທີ່ພື້ນຖານແຫ່ງຄວາມໄວ້ວາງໃຈຂອງສອງຝ່າຍ ນອກຈາກມີສາຍສຳພັນດ້ານຜົນປະໂຫຍດເປັນຕົວເຊື່ອມໂຍງແລ້ວ, ຍັງມີການຮັບຮູ້ຮ່ວມກັນດ້ານລະບອບເປັນແຮງຄໍ້າຊູອີກດ້ວຍ. ສອງປະເທດຕ່າງກໍມີພັກກອມມູນິດເປັນກຳລັງນໍາພາມາເປັນເວລາຍາວນານ ແລະ ມີທັດສະນະທີ່ສອດຄ່ອງກັນຕໍ່ຄໍາຖາມທີ່ວ່າ “ເສັ້ນທາງການພັດທະນາທີ່ດີຄວນເປັນແນວໃດ”. ໃນໄລຍະສະຕິວັດທີ 20 ຊຸມປີ 1960 ຫາ 1970, ສປ ຈີນ ໄດ້ໃຫ້ການສະໜັບສະໜູນອັນລໍ້າຄ່າແກ່ພາລະກິດ ປົດປ່ອຍຊາດຂອງ ສປປ ລາວ; ໂດຍບັນດາຜູ້ນຳຮຸ່ນອາວຸໂສຂອງສອງປະເທດ ເຊັ່ນ: ເໝົາ ເຈີຕົງ, ໂຈວ ເອີນໄຫຼ ແລະ ປະທານ ໄກສອນ ພົມວິຫານ ໄດ້ຮ່ວມກັນວາງຮາກຖານສາຍສຳພັນແບບ “ສະຫາຍ ແລະ ອ້າຍນ້ອງ” ອັນເປັນຮາກຖານສໍາຄັນຂອງຄວາມສາຍພົວພັນທະວີພາຄີໃນເວລາຕໍ່ມາ. ໃນປີ 2019 ແລະ 2023, ຜູ້ນຳສູງສຸດຂອງສອງພັກ-ສອງລັດ ໄດ້ຮ່ວມກັນລົງນາມ ແລະ ຊຸກຍູ້ການຈັກຕັ້ງປະຕິບັດ “ແຜນແມ່ບົດ ວ່າດ້ວຍການສ້າງປະຊາຄົມຄູ່ຮ່ວມຊາຕາກໍາ ລາວ-ຈີນ ລະຫວ່າງ ພັກກອມມູນິດຈີນ ແລະ ພັກປະຊາຊົນປະຕິວັດລາວ”, ຕໍ່ມາໃນເດືອນມິຖຸນາ 2026, ສອງຝ່າຍໄດ້ອອກ “ຖະແຫຼງການຮ່ວມ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ປະຊາຊົນຈີນ ວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ ທີ່ເຂັ້ມແຂງໜຽວແໜ້ນໃນທຸກສະພາບຂອງຍຸກສະໃໝ່”, ໂດຍໄດ້ກໍານົດໃຫ້ຊັດເຈນຍິ່ງຂຶ້ນເຖິງການປະຕິບັດແຜນການຮ່ວມມືຂອງສອງພັກໃຫ້ດີ (ໃນໄລຍະປີ 2026-2030), ເພື່ອຊຸກຍູ້ການສ້າງ ປະຊາຄົມຄູ່ຮ່ວມຊາຕາກຳໃຫ້ກ້າວໄປສູ່ມາດຕະຖານທີ່ສູງຂຶ້ນຢ່າງຕໍ່ເນື່ອງ.
ຜົນປະໂຫຍດອັນເປັນແກນກາງໄດ້ກຳນົດແນວທາງການຢູ່ຮ່ວມກັນ. ໃນບັນຫາທີ່ກ່ຽວພັນກັບຜົນປະໂຫຍດອັນເປັນແກນກາງ ແລະ ບັນຫາທີ່ສອງຝ່າຍເອົາໃຈໃສ່, ໃຫ້ຄວາມສໍາຄັນ; ລາວ - ຈີນ ໃຫ້ການສະໜັບສະໜູນອັນໜັກແໜ້ນຊຶ່ງກັນ ແລະ ກັນຢ່າງສະເໝີມາ, ຝ່າຍລາວ ຢຶດໝັ້ນ ຢ່າງໜັກແໜ້ນໃນຫຼັກການຈີນດຽວ ແລະ ມີຈຸດຢືນທີ່ສະເໝີຕົ້ນສະເໝີປາຍ ໃນບັນຫາກ່ຽວກັບ ໄຕ້ຫວັນ, ຊິນຈຽງ, ທິເບດ ແລະ ຮົງກົງ. ຝ່າຍຈີນ ເຄົາລົບການທີ່ລາວ ເລືອກເດີນຕາມເສັ້ນທາງການພັດທະນາທີ່ສອດຄ່ອງກັບສະພາບການຕົວຈິງຂອງປະເທດຕົນ, ພ້ອມທັງສະໜັບສະໜູນ ການນໍາພາຂອງພັກປະຊາຊົນ ປະຕິວັດລາວ ແລະ ພາລະກິດການກໍ່ສ້າງສັງຄົມນິຍົມ. ໃນການປຶກສາຫາລື ລະຫວ່າງການຢ້ຽມຢາມຈີນຄັ້ງນີ້, ປະທານ ທອງລຸນ ສີສຸລິດ ໄດ້ກ່າວວ່າ ສະຫາຍ ສີຈິ້ນຜິງ ແມ່ນ “ສະຫາຍ ແລະ ມິດສະຫາຍຜູ້ໃກ້ຊິດ ທີ່ພັກ, ລັດ ແລະ ປະຊາຊົນລາວ ໃຫ້ຄວາມເຄົາລົບນັບຖື ແລະ ໄວ້ວາງໃຈຢ່າງສູງສຸດ”. ຕະຫຼອດ 65 ປີຜ່ານມາ, ສາຍພົວພັນລາວ-ຈີນ ບໍ່ເຄີຍປ່ຽນແປງໄປໃນທາງທີ່ຖົດຖອຍຢ່າງພື້ນຖານ ອັນເນື່ອງມາຈາກການປ່ຽນແປງຂອງສະພາບແວດລ້ອມພາຍນອກ; ດັ່ງນັ້ນ, ການກຳນົດຖານະສາຍພົວພັນແບບ “ທຸກສະພາບການ” ຈຶ່ງເປັນການຢືນຢັນຕໍ່ຄວາມໝັ້ນຄົງອັນຍືນຍາວດັ່ງກ່າວ.
ການແລກປ່ຽນລະຫວ່າງໂຮງຮຽນພັກໄດ້ເສີມສ້າງຖານຮາກດ້ານການບໍລິຫານປົກຄອງລັດ ໃຫ້ລົງເລິກຂຶ້ນ. ການຮ່ວມມືດ້ານການບຳລຸງກໍ່ສ້າງພະນັກງານແມ່ນໜຶ່ງໃນຮູບແບບປະຕິບັດທີ່ມີເອກະລັກທີ່ສຸດຂອງຄວາມໄວ້ວາງໃຈທາງການເມືອງ ລາວ-ຈີນ. ການຮ່ວມມືນີ້ບໍ່ແມ່ນການຖ່າຍທອດຄວາມຮູ້ແບບທາງດຽວ, ແຕ່ແມ່ນການແລກປ່ຽນຮຽນຮູ້ຢ່າງເລິກເຊິ່ງລະຫວ່າງສອງພັກສັງຄົມນິຍົມທີ່ປົກຄອງປະເທດ ກ່ຽວກັບບັນຫາ “ຈະປົກຄອງປະເທດແນວໃດ ແລະ ຈະບໍລິຫານລັດຢ່າງໃດ”. ໃນປີ 2000, ສະຫາຍ ທອງລຸນ ສີສຸລິດ ຊຶ່ງໃນເວລານັ້ນດຳລົງຕຳແໜ່ງຮອງນາຍົກລັດຖະມົນຕີ ແລະ ຄວບຕຳແໜ່ງລັດຖະມົນຕີການຕ່າງປະເທດຂອງລາວ, ໄດ້ເຂົ້າສຶກສາຢູ່ໂຮງຮຽນພັກສູນກາງຂອງພັກກອມມູນິດຈີນ ເປັນເວລາໜຶ່ງເດືອນ. ຜ່ານໄປ 26 ປີ, ສະຫາຍ ທອງລຸນ ສີສຸລິດ ໃນຖານະຜູ້ນໍາສູງສຸດຂອງລາວໄດ້ເດີນທາງກັບຄືນໄປຢ້ຽມຢາມໂຮງຮຽນພັກ ສູນກາງພັກກອມມູນິດອີກຄັ້ງ ໂດຍສະເພາະໃນລະຫວ່າງການຢ້ຽມຢາມຈີນທາງລັດຖະກິດ, ເພື່ອພົບປະຖາມຂ່າວອາຈານຜູ້ເຄີຍສິດສອນ ແລະ ຫວນຄືນຄວາມຫຼັງ, ພ້ອມທັງພົບປະກັບນັກຮຽນລາວທີ່ກຳລັງສຶກສາຢູ່ທີ່ນັ້ນຈໍານວນກວ່າ 30 ຄົນ. ຄວາມຜູກພັນກັບໂຮງຮຽນພັກສູນກາງພັກກອມມູນິດທີ່ຂ້າມພົມແດນແຫ່ງນີ້, ສະແດງໃຫ້ເຫັນວ່າການບຳລຸງກໍ່ສ້າງພະນັກງານ ໄດ້ປະສານເຂົ້າເປັນສ່ວນເລິກໃນຮາກຖານແຫ່ງຄວາມໄວ້ວາງໃຈທາງການເມືອງຂອງສອງປະເທດ. ໃນດ້ານຂອບການຮ່ວມມື, ໂຮງຮຽນພັກສູນກາງພັກກອມມູນິດຈີນ ແລະ ສະຖາບັນການເມືອງ ແລະ ການປົກຄອງແຫ່ງຊາດລາວ ໄດ້ຮັກສາການແລກປ່ຽນ ແລະ ຮ່ວມມືລະຫວ່າງສະຖາບັນຢ່າງເປັນປົກກະຕິ ໃນດ້ານລະບົບຫຼັກສູດຝຶກອົບຮົມ, ການປະເມີນຜົນຜູ້ເຂົ້າຮຽນ ແລະ ການບຳລຸງສ້າງຄູ-ອາຈານ. ໃນຂັ້ນທ້ອງຖິ່ນ, ໂຮງຮຽນພັກຂອງ 3 ແຂວງ ແລະ ເຂດຄື: ຢຸນນານ, ຫູໜານ ແລະ ກວາງຊີ ໄດ້ອາໄສຂໍ້ໄດ້ປຽບດ້ານທີ່ຕັ້ງ ແລະ ຄວາມເດັ່ນດ້ານວິຊາການຂອງຕົນ ສ້າງຮູບແບບການແບ່ງງານດ້ານການຝຶກອົບຮົມທີ່ມີຈຸດເນັ້ນແຕກຕ່າງກັນ. ຖະແຫຼງການຮ່ວມໃນການຢ້ຽມຢາມຈີນຄັ້ງນີ້ ໄດ້ສະເໜີໃຫ້ດໍາເນີນໂຄງການຝຶກອົບຮົມ ແລະ ພັດທະນາບຸກຄະລາກອນເພີ່ມຕື່ມ ຊຶ່ງເປັນສັນຍານວ່າ ລະບົບການແລກປ່ຽນຫຼາຍລະດັບນີ້ ໄດ້ກ້າວຈາກຂັ້ນການສໍາຫຼວດທາງປະຕິບັດ ໄປສູ່ການຢຶດໝັ້ນໃນພາກປະຕິບັດຕົວຈິງຢ່າງໝັ້ນຄົງແລ້ວ.
ຄໍາເຫັນ