ສອງສະມາຄົມມິດຕະພາບ ຈັດກິດຈະກຳແຂ່ງຂັນກິລາເຕະບານມິດຕະພາບ

ໃນວັນທີ 16 ພຶດສະພານີ້, ສະມາຄົມມິດຕະພາບ ລາວ-ອົສຕຣາລີ ຮ່ວມກັບ ສະມາຄົມມິດຕະພາບ ອົສຕຣາລີ-ລາວ ໄດ້ຈັດກິດຈະກຳແຂ່ງຂັນກິລາເຕະບານມິດຕະພາບ ເພື່ອສະເຫຼີມສະຫຼອງການສ້າງຕັ້ງສະມາຄົມມິດຕະພາບ ລາວ-ອົສຕຣາລີ, ອົສຕຣາລີ-ລາວ ຂຶ້ນທີ່ເດີ່ນເຕະບານເທບປັນຍາເມືອງໄຊເສດຖານະຄອນຫຼວງວຽງຈັນ. ໃຫ້ກຽດເຂົ້າຮ່ວມໃນພິທີດັ່ງກ່າວມີທ່ານ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງປະເທດສູນກາງພັກ, ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນກະຊວງແຜນການ ແລະ ການລົງທຶນປະທານສະມາຄົມມິດຕະພາບລາວ-ອົສຕຣາລີ ແລະ ທ່ານ ແດນ ເຮວເດິນອັກຄະລັດຖະທູດສະຖານທູດອົສຕຣາລີ ປະຈໍາ ສປປ ລາວ. ນອກຈາກນັ້ນ, ຍັງມີທ່ານຜູ້ຕາງໜ້າຈາກກະຊວງ, ອົງການ ແລະ ນັກກິລາຈາກພາກສ່ວນທີ່ກ່ຽວຂ້ອງຂອງ ລາວ ແລະ ອົສຕຣາລີ ເຂົ້າຮ່ວມ 150 ກວ່າຄົນ. ກິດຈະກໍາກິລາເຕະບານມິດຕະພາບຄັ້ງນີ້ ມີນັກກິລາເຂົ້າຮ່ວມຈາກສະມາຄົມມິດຕະພາບ ລາວ-ອົສຕຣາລີ, ອົສຕຣາລີ-ລາວ, ຄະນະພົວພັນຕ່າງປະເທດສູນກາງພັກ, ຫ້ອງວ່າການສູນກາງພັກ, ຄະນະໂຄສະນາອົບຮົມສູນກາງພັກ, ສະພາແຫ່ງຊາດ ແລະ ກະຊວງການຕ່າງປະເທດ.
ການຈັດງານກິລາມິດຕະພາບຄັ້ງນີ້ ນອກຈາກເປັນການສະເຫຼີມສະຫຼອງການສ້າງຕັ້ງສະມາຄົມມິດຕະພາບ ລາວ-ອົສຕຣາລີ, ອົສຕຣາລີ-ລາວ ແລ້ວ, ຍັງເປັນການຮັດແໜ້ນສາຍພົວພັນມິດຕະພາບ ແລະ ສ້າງຄວາມສາມັກຄີ ລະຫວ່າງ ບັນດາອົງການຈັດຕັ້ງ ຂອງ ລາວ ແລະ ອົສຕຣາລີ ເພື່ອເປັນການປະກອບສ່ວນພັດທະນາ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ແລະ ປະຊາຊົນສອງຊາດ ລາວ ແລະ ອົສຕຣາລີ
ສະມາຄົມມິດຕະພາບ ລາວ-ອົສຕຣາລີ ໄດ້ຮັບການສ້າງຕັ້ງຂຶ້ນໃນວັນທີ 15 ພຶດສະພາ 2023 ແລະ ກໍໄດ້ເຄື່ອນໄຫວຕາມພາລະບົດບາດ,ເງື່ອນໄຂແລະ ຄວາມສາມາດ ຮ່ວມກັບພາກສ່ວນກ່ຽວຂ້ອງຂອງ ອົສຕຣາລີ ໂດຍສະເພາະສະມາຄົມມິດຕະພາບ ອົສຕຣາລີ-ລາວ, ສະຖານທູດອົສຕຣາລີ ປະຈຳ ສປປ ລາວ ດ້ວຍການຈັດກິດຈະກຳທີ່ສອງຝ່າຍເຫັນດີຮ່ວມກັນໃນໂອກາດວັນສໍາຄັນຕ່າງໆ ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນດີງາມ ກໍຄືການພົວພັນຮ່ວມມື ລະຫວ່າງ ສອງປະເທດ ແລະ ປະຊາຊົນສອງຊາດ ລາວ ແລະ ອົສຕຣາລີ ໃຫ້ນັບມື້ນັບໄດ້ຮັບການພັດທະນາຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ ຂອງສອງປະເທດ ແລະ ເພື່ອປະກອບສ່ວນຢ່າງຕັ້ງໜ້າເຂົ້າໃນການພາລະກິດແຫ່ງສັນຕິພາບ, ມິດຕະພາບ ແລະ ການຮ່ວມມື ຂອງພາກພື້ນ ແລະ ໃນໂລກ.
(ຂ່າວ: ຄຕພ)