 |
ຈຸດປະສົງຂອງການຢ້ຽມຢາມຄັ້ງນີ້ ແມ່ນເພື່ອເພີ່ມທະວີການຮ່ວມມືລະຫວ່າງ ສະມາຊິກສະພາບໍລິຫານງານສະຖາບັນແມ່ນໍ້າຂອງ ໂດຍສະເພາະ ສປປ ລາວ ແລະ ສປ ຈີນ ລວມທັງພາກສ່ວນກ່ຽວຂ້ອງຕ່າງໆທີ່ສໍາຄັນ ຂອງ ສປ ຈີນ ເພື່ອຮ່ວມກັນສືບຕໍ່ຊຸກຍູ້ຜັນຂະຫຍາຍການຈັດຕັ້ງປະຕິບັດບັນດາແຜນວຽກ ແລະ ໂຄງການຕ່າງໆ ທີ່ນອນຢູ່ໃນແຜນຍຸດທະສາດ 5 ປີ ຂອງ ສະຖາບັນແມ່ນໍ້າຂອງ ສະບັບໃໝ່ (ປີ 2026-2030)ຢ່າງມີປະສິດທິຜົນ ແລະ ເປັນຮູບປະທໍາເທື່ອລະກ້າວ.
 |
ໃນການເຄື່ອນໄຫວຄັ້ງນີ້, ທ່ານ ສົມບູນ ສີຫານາດ, ໃນນາມປະທານສະພາບໍລິຫານງານ ສະຖາບັນແມ່ນໍ້າຂອງ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ຊູ ຮາວ(Xu Hao), ຮອງເຈົ້າແຂວງຢູນນານ ໃນນາມສະມາຊິກສະພາບໍລິຫານງານ ສະຖາບັນແມ່ນໍ້າຂອງ ຂອງ ສປ ຈີນ. ທັງສອງຝ່າຍໄດ້ຮ່ວມກັນທົບທວນຄືນໝາກຜົນຂອງການຮ່ວມມື ພາຍໃຕ້ແຜນວຽກບຸລິມະສິດ ຂອງ ສະຖາບັນແມ່ນໍ້າຂອງ ແລະ ລົງເລິກປຶກສາຫາລືກ່ຽວກັບທິດທາງການຈັດຕັ້ງຜັນຂະຫຍາຍແຜນຍຸດທະສາດ 5 ປີ ຂອງ ສະຖາບັນແມ່ນໍ້າຂອງ ໃຫ້ປາກົດຜົນເປັນຈິງ ໂດຍສະເພາະ ການເພີ່ມທະວີການຮ່ວມມືໃນຂົງເຂດການເຊື່ອມຈອດ, ການຄ້າ-ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ, ການປົກປັກຮັກສາສິ່ງແວດລ້ອມ, ການຜະລິດຢາພື້ນເມືອງ, ການພັດທະ ນາຊົນນະບົດ ແລະ ຫຼຸດຜ່ອນຄວາມທຸກຍາກ ເພື່ອນໍາເອົາຜົນປະໂຫຍດມາສູ່ປະຊາຊົນ ໃນອະນຸພາກພື້ນແມ່ນໍ້າຂອງໃນອະນາຄົດ.
 |
ນອກຈາກນີ້, ຍັງໄດ້ພົບປະກັບກົມອາຊີ, ກະຊວງການຕ່າງປະເທດ ສປ ຈີນ ໃນນາມສະມາຊິກຄະນະປະຈໍາ ສະພາບໍລິຫານງານ ສະຖາບັນແມ່ນໍ້າຂອງ (Steering Committee of the Mekong Institute) ເພື່ອປຶກສາຫາລື ກ່ຽວກັບນະໂຍບາຍການຮັດແໜ້ນການຮ່ວມມືລະຫວ່າງບັນດາປະເທດສະມາຊິກດ້ວຍກັນ ແລະ ການເພີ່ມທະວີການຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ຂອງບັນດາຄູ່ຮ່ວມພັດທະນາຕ່າງໆ ໂດຍສອດຄ່ອງກັບບັນດາກົນໄກການຮ່ວມມືທີ່ມີຢູ່ແລ້ວໃນອະນຸພາກພື້ນ ເຊັ່ນ: ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ຂອບການຮ່ວມມືອາຊຽນ-ຈີນ ແລະ ຂອບການຮ່ວມມືໜຶ່ງແລວ-ໜຶ່ງເສັ້ນທາງ ເປັນຕົ້ນ. ພ້ອມດຽວກັນນັ້ນ, ຄະນະດັ່ງກ່າວ ຍັງໄດ້ສືບຕໍ່ພົບປະປຶກສາຫາລື ກ່ຽວກັບບັນດາແຜນວຽກ ແລະ ໂຄງການທີ່ຈັດຕັ້ງປະຕິບັດຮ່ວມກັນໃນປັດຈຸບັນ ແລະ ອະນາຄົດ ຮ່ວມກັບບັນດາອົງການຈັດຕັ້ງສາກົນທີ່ສໍາຄັນຂອງ ສປ ຈີນ ທີ່ມີສໍານັກງານໃຫຍ່ຕັ້ງຢູ່ ນະຄອນຫຼວງປັກກິ່ງ ເຊັ່ນ: ທະນາຄານເພື່ອການລົງທຶນພື້ນຖານໂຄງລ່າງອາຊີ (Asian Infrastructure Investment Bank ຫຼື AIIB) ແລະ ອົງການຮ່ວມມືເພື່ອການພັດທະນາສາກົນແຫ່ງຊາດຈີນ (China International Development Cooperation Agency ຫຼື CIDCA). ໃນໄລຍະຕໍ່ມາ, ຄະນະດັ່ງກ່າວ ກໍໄດ້ສືບຕໍ່ເຄື່ອນໄຫວຢ້ຽມຢາມ ສະຖານທີ່ສໍາຄັນອື່ນໆຂອງແຂວງຢຸນນານເຊັ່ນ: ພະແນກວິທະຍາສາດ ແລະ ເຕັກໂນໂລຊີ ແຂວງຢຸນນານ (ຊຶ່ງມີ ສະຖາບັນພັດທະນາວິທະຍາສາດ ແລະ ເຕັກໂນໂລຊີ ແຂວງຢູນນານ ເປັນໜ່ວຍງານປະສານງານຂອງຝ່າຍຈີນ ກ່ຽວກັບການຮ່ວມມືຮອບດ້ານກັບ ສະຖາບັນແມ່ນໍ້າຂອງ), ມະ ຫາວິທະຍາໄລປ່າໄມ້ພາກຕາເວັນຕົກສ່ຽງໃຕ້ ແລະ ບໍລິສັດ ຕາຂ່າຍໄຟຟ້າພາກໃຕ້ຈີນ ແມ່ນ້ຳຂອງ-ລ້ານຊ້າງ ສາກົນ ຈຳກັດ.
ການເຄື່ອນໄຫວຢ້ຽມຢາມ ສປ ຈີນ ໃນຄັ້ງນີ້ໄດ້ຮັບການຕ້ອນຮັບຢ່າງອົບອຸ່ນ ແລະ ດໍາເນີນໄປບົນພື້ນຖານໄມຕີຈິດມິດຕະພາບ ແລະ ສາມາດບັນລຸຕາມຈຸດປະສົງເປົ້າໝາຍທີ່ວາງໄວ້ໃນໄລຍະການປະທານໝູນວຽນ ຂອງ ສປປ ລາວ ໃນສະພາບໍລິຫານງານສະຖາບັນແມ່ນໍ້າຂອງ ປະຈໍາປີ 2025-2027 ໃຫ້ໄດ້ຮັບຜົນສໍາເລັດຢ່າງເປັນຮູບປະທໍາ.
(ຂ່າວ: ກຕທ)
ຄໍາເຫັນ