ສປປ ລາວ ເປັນເຈົ້າພາບກອງປະຊຸມລະດັບພາກພື້ນ ກ່ຽວກັບ ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ

ໄດ້ຈັດກອງປະຊຸມສຳມະນາລະດັບພາກພື້ນ ອາຊີ-ປາຊີຟິກ ກ່ຽວກັບ ການຈັດຕັ້ງປະຕິບັດສົນທິສັນຍາດັ່ງກ່າວຂຶ້ນ ໂດຍພາຍໃຕ້ຫົວຂໍ້: “Strengthening Regional Cooperation toward Universalization and Implementation”, ໂດຍມີ ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີກະຊວງການຕ່າງປະເທດ, ຕາງໜ້າໃຫ້ຄະນະກຳມະການຄຸ້ມຄອງເເຫ່ງຊາດ ເພື່ອເເກ້ໄຂບັນຫາລະເບີດບໍ່ທັນເເຕກທີ່ຕົກຄ້າງຢູ່ ສປປ ລາວ (ຄຊກລ) ແລະ ຕາງໜ້າປະທານກອງປະຊຸມທົບທວນການຈັດຕັ້ງປະຕິບັດສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 (3RC CCM), ເຂົ້າຮ່ວມມີຄໍາເຫັນໃນພາກເປີດກອງປະຊຸມ.

ທ່ານ ຮອງລັດຖະມົນຕີກະຊວງການຕ່າງປະເທດ, ທັງເປັນຮອງປະທານ ຄຊກລ ໄດ້ສະເຫນີກ່ຽວກັບທິດທາງ ແລະ ວິໄສທັດໃນການເປັນປະທານກອງປະຊຸມທົບທວນຮອບວຽນທີ 3 ຂອງ ສປປ ລາວ ທີ່ເນັ້ນເຖິງຄວາມສໍາຄັນຂອງການຮ່ວມມືໃນລະດັບພາກພື້ນ ແລະ ສາກົນ ເພື່ອຈັດຕັ້ງຜັນຂະຫຍາຍແຜນງານສາກົນພາຍໃຕ້ສົນທິສັນຍາ CCM ໃຫ້ກາຍເປັນແຜນງານໃນລະດັບຊາດຂອງບັນດາປະເທດພາຄີ, ການສົ່ງເສີມການແລກປ່ຽນບົດຮຽນເຊິ່ງກັນແລະກັນ ຢ່າງມີປະສິດຕິຜົນ. ເຂົ້າຮ່ວມມີຄໍາເຫັນໃນພາກເປີດກອງປະຊຸມ ຍັງມີ ທ່ານ ນາງ ເອລີຊາເບັດ ເຕ (Elizabeth Te), ເອກອັກຄະລັດຖະທູດ ຟີລິບປິນ ປະຈຳ ສປປ ລາວ, ທ່ານ ນາງ ພາເມລາ ເອ ໂມຣາກາ (Pamela A. Moraga), ຫົວໜ້າໜ່ວຍງານ CCM-ISU, ແລະ ທ່ານ ນາງ ເບນີຕາ ຊອມເມີວິລ (Benita Sommerville), ຮອງທູດອົດສະຕຣາລີ ປະຈຳ ສປປ ລາວ. ບັນດາຜູ້ເຂົ້າຮ່ວມກອງປະຊຸມ ປະກອບມີບັນດາຊ່ຽວຊານ, ຜູ້ວາງແຜນນະໂຍບາຍ ແລະ ທີ່ປຶກສາກົດໝາຍແຫ່ງຊາດ ຈາກບັນດາປະເທດພາຄີ ໃນທົ່ວພາກພື້ນ ອາຊີ-ປາຊີຟິກ, ລວມທັງ ຜູ້ຕາງໜ້າບັນດາປະເທດທີ່ຍັງບໍ່ທັນເຂົ້າຮ່ວມເປັນພາຄີ, ຊ່ຽວຊານດ້ານວຽກງານເເກ້ໄຂລະເບີດບໍ່ທັນເເຕກຂອງບັນດາອົງການປະຕິບັດງານ ທັງພາຍໃນ ແລະ ຕ່າງປະເທດ ຈຳນວນ 65 ທ່ານ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສ້າງຄວາມເຂົ້າໃຈທີ່ເລິກເຊິ່ງ ແລະ ສ້າງຄວາມເຂັ້ມແຂງ ໃນລະດັບພາກພື້ນ ຕໍ່ກັບພັນທະ ແລະ ຜົນປະໂຫຍດທີ່ຈະໄດ້ຮັບໃນການເຂົ້າຮ່ວມເປັນພາຄີ ຂອງສົນທິສັນຍາ CCM, ການສະໜັບສະໜູນເພື່ອເຂົ້າຮ່ວມສົນທິສັນຍາດັ່ງກ່າວ, ການສ້າງຄວາມເຂັ້ມແຂງດ້ານວິຊາການໃນການຈັດຕັ້ງປະຕິບັດ, ສ້າງເຄືອຂ່າຍການຮ່ວມມືໃນລະດັບພາກພື້ນ ແລະ ສາກົນ, ພ້ອມທັງ ເພີ່ມຄວາມຮັບຮູ້ກ່ຽວກັບຜົນກະທົບຈາກລະເບີດທີ່ຕົກຄ້າງໂດຍຜ່ານການລົງໄປຕິດຕາມເບິ່ງການປະຕິບັດງານຕົວຈິງຢູ່ພາກສະໜາມ.

ກອງປະຊຸມລະດັບພາກພື້ນນີ້ ເປັນເວທີສໍາຄັນ ເພື່ອເປັນໂອກາດໃຫ້ບັນດາຜູ້ເຂົ້າຮ່ວມ ໄດ້ແລກ ປ່ຽນບົດຮຽນ ແລະ ປຶກສາຫາລື ໃນຫຼາຍບັນຫາທີ່ສຳຄັນ ເປັນຕົ້ນແມ່ນ ສະພາບລວມ ແລະ ທ່າຂະຫຍາຍຂອງການປະຕິບັດສົນທິສັນຍາ ໃນລະດັບສາກົນ, ພັນທະຕົ້ນຕໍຂອງສົນທິສັນຍາ ລວມທັງ ກົນໄກຂັບເຄື່ອນການຈັດຕັ້ງປະຕິບັດວຽກງານເກັບກູ້-ກວດກູ້ ລະເບີດທີ່ບໍ່ທັນແຕກ (ລບຕ), ການໂຄສະນາສຶກສາຄວາມສ່ຽງໄພຈາກ ລບຕ ເເລະ ການຊ່ວຍເຫຼືອຜູ້ໄດ້ຮັບເຄາະຮ້າຍ. ຜູ້ແທນກອງປະຊຸມຍັງໄດ້ຍົກໃຫ້ເຫັນ ຄວາມສໍາຄັນຂອງການຮ່ວມມືແບບ ໃຕ້-ໃຕ້ (South-South Cooperation) ຫຼື ລະຫວ່າງບັນດາປະເທດກໍາລັງພັດທະນານໍາກັນ ເເລະ ຄວາມຮຽກຮ້ອງຕ້ອງການໃນການຈັດຕັ້ງປະຕິບັດວຽກງານ ຢູ່ໃນບັນດາປະເທດເກາະດອນນ້ອຍ (Small Islands Developing States ຫລື SIDs). ກອງປະຊຸມຍັງໄດ້ຮັບຟັງ ການແລກປ່ຽນປະສົບການ ຈາກຜູ້ທີ່ລອດຊີວິດອັນເກີດຈາກ ລບຕ, ຄວາມສໍາຄັນໃນການບັນລຸເປົ້າໝາຍການພັດທະນາເເບບຍືນຍົງ (SDGs) ໂດຍສະເພາະເເມ່ນເປົ້າໝາຍທີ 18 (ຊີວິດປອດໄພຈາກ ລບຕ) ແລະ ຮັບຟັງການນຳະເໜີຂອງຫ້ອງການ ຄຊກລ (NRA) ແຫ່ງຊາດ ກ່ຽວກັບບົດຮຽນຕົວຈິງຂອງ ສປປ ລາວ ໃນການຜັນຂະຫຍາຍແຜນປະຕິບັດງານ ໂລຊານ (Lausanne Action Plan) ຂອງສາກົນ ເຂົ້າໃນແຜນງານລະດັບປະເທດ.

ໃນໂອກາດນີ້ ຄະນະຜູ້ແທນທັງໝົດຍັງໄດ້ລົງໄປຢ້ຽມຢາມພາກສະໜາມ ຢູ່ ເມືອງກາສີ, ແຂວງວຽງຈັນ ເພື່ອເຫັນເຖິງສະພາບການປະຕິບັດງານຕົວຈິງຢູ່ພາກສະຫນາມ ຂອງກອງກວດກູ້ລະເບີດເພື່ອມະ ນຸດສະທຳ ໂດຍພາຍໃຕ້ສູນແກ້ໄຂບັນຫາລະເບີດບໍ່ທັນແຕກ ແລະ ບັນເທົາໄພພິບັດ ຂອງກອງທັບປະຊາຊົນລາວ (ສູນ 523), ເພື່ອໃຫ້ຜູ້ເຂົ້າຮ່ວມໄດ້ເຫັນສະພາບຄວາມເປັນຈິງ ຂອງການຕົກຄ້າງຂອງ ລບຕ ຢູ່ໃນພື້ນທີ່ຕ່າງໆຂອງ ສປປ ລາວ ແລະ ຂັ້ນຕອນການສຳຫຼວດພື້ນທີ່, ການເກັບກູ້ ແລະ ການທຳລາຍລະເບີດທີ່ຄົ້ນພົບ, ລວມທັງ ການໂຄສະນາສຶກສາອົບຮົມຄວາມສ່ຽງໄພຈາກ ລບຕ ແລະ ການມີສ່ວນຮ່ວມຂອງຊຸມຊົນ ໃນວຽກງານແກ້ໄຂບັນຫາດັ່ງກ່າວ.

ການເປັນເຈົ້າພາບຈັດກອງປະຊຸມລະດັບພາກພື້ນຄັ້ງນີ້ ແມ່ນສະແດງເຖິງຄວາມໝາຍໝັ້ນອັນແຮງກ້າ ຂອງ ສປປ ລາວ ໃນຖານະເປັນປະທານສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ປະຈຳປີ 2026 ແລະ ການກະກຽມເປັນເຈົ້າພາບກອງປະຊຸມທົບທວນການຈັດຕັ້ງປະຕິບັດ ຮອບວຽນທີ 3 ຂອງສົນທິສັນຍາ CCM ລະດັບສາກົນ ຊຶ່ງຈະຈັດຂຶ້ນທີ່ນະຄອນຫຼວງວຽງຈັນ ໃນລະຫວ່າງວັນທີ 14-18 ກັນຍາ 2026 ນີ້, ເພື່ອຊຸກຍູ້ໃຫ້ການຈັດຕັ້ງປະຕິບັດສົນທິສັນຍາ CCM ມີປະສິດທິຜົນໃນທົ່ວໂລກ. ໃນຖານະເປັນໜຶ່ງໃນບັນດາປະເທດທີ່ຖືກກະທົບຫຼາຍກວ່າຫມູ່, ຜ່ານມາ ສປປ ລາວ ໄດ້ມີສ່ວນຮ່ວມຢ່າງຕັ້ງຫນ້າໃນຂະບວນການສ້າງສົນທິສັນຍາ CCM ແລະ ທັງໄດ້ຮັບກຽດເປັນເຈົ້າພາບກອງປະຊຸມລັດພາຄີຄັ້ງທຳອິດ ທີ່ ນະຄອນຫຼວງວຽງຈັນ ໃນປີ 2010. ນັບແຕ່ນັ້ນເປັນຕົ້ນມາ, ສປປ ລາວ ໄດ້ຢືນຢູ່ແຖວໜ້າເພື່ອຮຽກຮ້ອງໃຫ້ບັນດາປະເທດໃນທົ່ວໂລກ ຂະຫຍາຍການຮ່ວມມືເພື່ອຮັບປະກັນໃຫ້ໂລກນີ້ປາສະຈາກໄພຂົ່ມຂູ່ຈາກລະເບີດລູກຫວ່ານ, ພ້ອມທັງ ໄດ້ກໍານົດໃຫ້ວຽກງານເກັບກູ້ລະເບີດບໍ່ທັນແຕກ ເຂົ້າໃນບຸລິມະສິດຂອງແຜນພັດທະນາເສດຖະກິດ-ສັງຄົມແຫ່ງຊາດ ແລະ ຮັບຮອງໃຫ້ເປັນເປົ້າໝາຍການພັດທະນາແບບຍືນຍົງທີ 18 (SDG18). ການປະກອບສ່ວນຢ່າງຫ້າວຫັນ ແລະ ສະເໝີຕົ້ນສະເໝີປາຍ ຂອງ ສປປ ລາວ ໃນວຽກງານຂອງສົນທິສັນຍາສາກົນນີ້ ໄດ້ສ້າງຄວາມເຊື່ອໝັ້ນຈາກວົງຄະນາຍາດສາກົນ ໃຫ້ ສປປ ລາວ ເປັນປະທານກອງປະຊຸມທົບທວນຂອງສົນທິສັນຍາ CCM ຮອບວຽນທີ 3 ໃນປີ 2026 ນີ້.

(ຂ່າວ: ກຕທ; ພາບ: ສຳນານ)