ທະຫານແຂວງ ບິ່ງດິ້ງ ຢ້ຽມຢາມ ແລະ ເຮັດວຽກ ຢູ່ກອງບັນຊາການທະຫານແຂວງ ອັດຕະປື.

ໃນກອງປະຊຸມ, ທັງສອງຝ່າຍ ໄດ້ແລກປ່ຽນສະພາບການ, ເຊິ່ງກັນ ແລະ ກັນ ເປັນຕົ້ນແມ່ນທາງດ້ານຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ຂົງເຂດວຽກງານການເມືອງ, ວັດທະນະທຳ, ເສດຖະກິດ-ສັງຄົມ, ການພົວພັນຮ່ວມມືກັບສາກົນ ແລະ ການຊ່ວຍເຫຼືອທຶນຮອນການກໍ່ສ້າງຕ່າງໆ. ຈາກນັ້ນ, ຄະນະຜູ້ແທນທັງສອງຝ່າຍ ກໍໄດ້ຮ່ວມກັນລົງນາມເຊັນບົດບັນທຶກ ມອບ-ຮັບ ທຶນຊ່ວຍເຫຼືອຈາກກອງບັນຊາການທະຫານແຂວງ ບິ່ງດິ້ງ ກອງທັບປະຊາຊົນຫວຽດນາມ ເປັນເງິນຈຳນວນ 1 ຕື້ 800 ລ້ານດົ້ງ ເພື່ອກໍ່ສ້າງສະໂມສອນຫຼັງໄໝ່ ຢູ່ກອງບັນຊາການທະຫານແຂວງ ອັດຕະປື ບົນພື້ນຖານການຮ່ວມມືກັນໃນປີ 2024, ທັງນີ້ ກໍເພື່ອຮັດແໜ້ນສາຍພົວພັນມິດຕະພາບລະຫ່ວາງ ສອງພັກ-ສອງລັດເວົ້າລວມສະເພາະກໍແມ່ນ ສອງກໍາລັງວຽກງານປ້ອງກັນຊາດໃຫ້ມີຄວາມໜັ້ນຄົງ ຮັກສາສະຖຽນລະພາບທາງດ້ານການເມືອງໃຫ້ມີຄວາມສະຫງົບປອດໄພ ເຊິ່ງກັນ ແລະ ກັນ ບົນຈິດໃຈມິດຕະພາບ, ການຮ່ວມມືຮອບດ້ານ ທີ່ເຄີຍມີມູນເຊື້ອມານານແສນນານ.

(ພາບ-ຂ່າວ: ສຸກສະໄໝ ນວນມະລິນ)