ທ່ານ  ຄໍາພັນ ພົມມະທັດ ຢ້ຽມຢາມ ສູນສົ່ງເສີມເຕັກນິກກະສິກໍາ ແລະ ປ່າໄມ້ຮ່ວມມືລາວ-ຫວຽດນາມ ເມືອງຊຳເໜືອ

ເມື່ອບໍ່ດົນມານີ້, ທ່ານ  ຄໍາພັນ ພົມມະທັດ ກໍາມະການກົມການເມືອງສູນກາງພັກ ເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະທີມງານຈາກຄະນະກວດກາສູນກາງພັກ ແລະ ຄະນະນໍາຂອງແຂວງຫົວພັນ ໄດ້ລົງເຄື່ອນໄຫວຢ້ຽມຢາມສູນສົ່ງເສີມເຕັກນິກກະສິກໍາ ແລະ ປ່າໄມ້ຮ່ວມມືລາວ-ຫວຽດນາມ ທີ່ບ້ານອົ້ງ ເມືອງຊໍາເໜືອ ແຂວງຫົວພັນ ໃນໂອກາດທີ່ລົງເຄື່ອນໄຫວວຽກງານຢູ່ແຂວງຫົວພັນ ໂດຍການຕ້ອນຮັບຂອງທ່ານ ແອຊໍາ ວິໄລຈິດ ຫົວໜ້າສູນສົ່ງເສີມເຕັກນິກກະສິກໍາ ແລະ ປ່າໄມ້ຮ່ວມມືລາວ-ຫວຽດນາມ ພ້ອມດ້ວຍຄະນະ.                                                                                                             
ໂອກາດນີ້ ທ່ານ ແອຊໍາ ວິໄລຈິດ ໄດ້ລາຍງານ ສະພາບລວມຂອງການ​ຈັດ​ຕັ້ງປະ​ຕິ​ບັດ​​ແຜນ​ພັດ​ທະ​ນາເສດຖະກິດ-ສັງຄົມຂອງສູນກາງ ກໍຄືຂອງແຂວງວາງອອກ​ ແລະ ການເຄື່ອນໄຫວວຽກງານ 6 ເດືອນ​ຕົ້ນ​ປີ 2023, ໂດຍມີບາງເນື້ອໃນວ່າ: ສູນສົ່ງເສີມເຕັກນິກກະສິກໍາ ແລະ ປ່າໄມ້ຮ່ວມມືລາວ-ຫວຽດນາມ (ສກປ) ມີພາລະບົດບາດເປັນເສນາທິການໃຫ້ແກ່ພະແນກກະສິກໍາ ແລະ ປ່າໄມ້ແຂວງ ຊຶ່ງຕັ້ງຢູ່ບ້ານອົ້ງ ເມືອງຊໍາເໜືອ, ມີເນື້ອທີທັງໜົດ 15,2 ເຮັກຕາ, ເນື້ອທີ່ປ່າໄມ້ 72%, ປະກອບມີ 4 ກຸ່ມວຽກ: ກຸ່ມວຽກບໍລິຫານ ແຜນການ ແລະ ການເງິນ, ກຸ່ມວຽກຝຶກອົບຮົມ ແລະ ບໍລິການກະຈາຍຂໍ້ມູນຂ່າວສານ, ກຸ່ມວຽກສົ່ງເສີມ ແລະ ບໍລິການເຕັກນິກການຜະລິດກະສິກໍາ ແລະ ປ່າໄມ້, ກຸ່ມວຽກ​ຈັດ​ຕັ້ງກຸ່ມ ແລະ ສະ​ຫະ​ກອນ. ມີພະນັກງານ-ລັດຖະກອນທັງໝົດ 13  ຄົນ ຍິງ 6 ຄົນ, ພະນັກງານອາສາສະມັກຕາມ​ສັນຍາ 3  ຄົນ ຍິງ 1 ຄົນ. ໃນນັ້ນ ມີ 5 ກິດຈະກໍາຕົ້ນຕໍຄື: ກິດຈະກໍາລ້ຽງເປັດ, ໄກ່, ກິດຈະກໍາປູກໄມ້ໃຫ້ໝາກ ແລະ ສວນກ້າເບ້ຍໄມ້, ກິດຈະກໍາປູກພືດຜັກອິນຊີ; ກິດຈະກໍາການລ້ຽງປາໃນໜອງ, ກິດຈະກໍາລ້ຽງໝູ. ໃນປີ 2023 ໄດ້ເພີ່ມອີກ 2 ກິດຈະກໍາ ຄື: ລ້ຽງແບ້ແບບຂັງ ແລະ ປະສົມພັນກົບ. ໃນໄລຍະຜ່ານມາໄດ້ລົງຊຸກຍູ້ສົ່ງເສີມບໍລິການສັກຢາປ້ອງກັນພະຍາດສັດໃຫຍ່ ໃຫ້ແກ່ປະຊາຊົນ 9 ບ້ານອອກຂ້າງ, ກອງຮ້ອຍຜະລິດ ກອງບັນຊາການທະຫານແຂວງ, ກອງພັນ 163, ລົງຕິດຕາມແນວພັນໝາກພຸກ, ຫມາກກ້ຽງ ທີ່ສູນແຈກຢາຍໃຫ້ປະຊາຊົນຈໍານວນ 9 ຄອບຄົວ ມີ 1.​700 ຕົ້ນ, ສຳເລັດການຈັດຝືກອົບຮົມວຽກງານການປູກ-ການລ້ຽງໃຫ້ກັບຊາວກະສິກອນ ແລະ ພະນັກງານວິຊາການຂັ້ນເມືອງ 10 ເມືອງທົ່ວແຂວງ; ​ສາມາດກ້າເບ້ຍໄມ້ ໄດ້ຈໍານວນ 28. 090 ເບ້ຍ, ໄມ້ອຸດສາຫະກໍາ ຈໍານວນ 25.287 ເບ້ຍ, ເບ້ຍກາເຟ, ໝາກນາວ, ໝາກກ້ຽງ, ໝາກມ່ວງ, ໝາກມາດ ແລະ ດອກຄາຍປ່າ ຈໍານວນ 2.803 ເບ້ຍ, ສຽບ​ຍອດ​ໝາກ​ໝັ້ນ​ໃຫ​ຍ່ ແລະ ໝາ​ກ​ຄາຍ​ໃຫຍ່ ​ພັນຈາກ ສ​ສ​ ຫວຽດ​ນາມ ໃສ່​ກັບ​ຕົ້ນ​ໝາກ​ຄາຍ​ນ້ອຍ​ຢູ່ສູນ ຈຳ​ນວນ 15 ຕົ້​ນ, ລ້ຽງໄກ່ພໍ່ແມ່ພັນຊະນິດພື້ນເມືອງໄດ້ 3.680 ໂຕ, ພໍ່-ແມ່ພັນສັດປີກທົ່ວໄປ 274 ໂຕ, ຜະລິດເປັດນ້ອຍ-ໄກ່ນ້ອຍ ໄດ້ 2.​906 ໂຕ, ສາມາດສະໜອງຊີ້ນສັດປີກອອກສູ່ຕະຫຼາດໄດ້ 1.253 ກິໂລ, ​ບໍ​ລິ​ການ​ຝັກ​ໄຂ່ໄດ້ 2,611 ໜ່ວຍ, ຈໍາ​ໜ່າຍ​ປາ​ອອກ​ສູ່​ສັງ​ຄົມ​ໄດ້​ຈຳ​ນວນ 2.​512 ກິ​ໂລ, ມີພໍ່-ແມ່ພັນໝູຈໍານວນ 28 ໂຕ, ຈໍາໝ່າຍຊີ້ນໝູໄດ້ 3.​164 ກິໂລ, ຈໍາໝ່າຍໝູນ້ອຍ 263 ໂຕ, ຈໍາໝ່າຍປະເພດຜັກຕ່າງໆໄດ້ 1.​700 ກວ່າກິໂລ, ທົດລອງປູກໝາກແຕງແຄນຕະລຸບ 235 ຖົງ; ຂາຍຢາປິ່ນປົວສັດໄດ້ 10.​079. 000 ກີບ; ຂາຍອາຫານເສີມສັດລ້ຽງໄດ້ 1.​042.000 ກີບ, ຂາຍປູນຂາວຂ້າເຊື້ອຈໍານວນ 40 ກິໂລ; ສ້າງຄອກແບ້ສໍາເລັດ ຈຳ​ນວນ 2 ຄອກ; ນໍາແນວພັນແບ້ເຂົາມາລ້ຽງຈໍານວນ 17 ໂຕ, ກະກຽມສ່ວນຫຍ້າອາຫານສັດໄດ້ປະມານ 3,3 ຮັກຕາ; ແບ້​ເກີດ​ໃໝ່ ຈຳ​ນວນ 3 ໂຕ. 
ໃນໂອກາດດັ່ງກ່າວ: ທ່ານ ຄໍາພັນ ພົມມະທັດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຕໍ່ຄະນະນໍາ ແລະ ພະນັກງານຫຼັກແຫຼ່ງຂອງສູນ ໃຫ້ພ້ອມກັນສືບຕໍ່ຜັນຂະຫຍາຍບັນດາໜ້າວຽກທີ່ມີຢູ່ແລ້ວ ໃຫ້ໄດ້ຮັບການຈັດຕັ້ງປະຕິບັດໄປຕາມແຜນການ ແລະ ທິດຊີ້ນໍາຂອງຂັ້ນເທິງເວົ້າລວມ, ເວົ້າສະເພາະກໍແມ່ນພະແນກກະສິກໍາ ແລະ ປ່າໄມ້ແຂວງວາງອອກ ໃຫ້ມີຜົນສໍາເລັດຍິ່ງຂຶ້ນກວ່າເກົ່າ, ຕ້ອງສຸມໃສ່ໃນການປະຕິບັດໜ້າວຽກຕົວຈິງ ໄປຄຽງຄູ່ກັບທິດສະດີ ເພື່ອສາມາດແຈກຢາຍແນວພັນພຽງພໍກັບຄວາມຕ້ອງການຂອງພໍ່ແມ່ປະຊາຊົນ ພ້ອມທັງໃຫ້ຄໍາແນະນໍາ, ສາທິດການປູກ, ການລ້ຽງ ແລະ ຕິດຕາມ, ປະເມີນ ຢ່າງເປັນລະບົບ ເພື່ອໃຫ້ຫົວໜ່ວຍຄອບຄົວມີລາຍຮັບ ແລະ ສູນມີຄວາມເຂັ້ມແຂງ, ສາມາດຕອບສະໜອງຄວາມຕ້ອງການຂອງຕະຫຼາດໄດ້ໃນໄລຍະຍາວ. ຈາກນັ້ນ, ທ່ານ ຄໍາພັນ ພົມມະທັດ ຍັງໄດ້ໃຫ້ກຽດປູກຕົ້ນໄມ້ ແລະ ລົງເບິ່ງບັນດາຄອກສັດລ້ຽງ, ໜອງປາ, ຕົ້ນໄມ້ກິນໝາກພາຍໃນສູນອີກດ້ວຍ.                               ຂ່າວ-ພາບ: ຄຳຫວັນ ຈັນທະວົງ