ທ່ານ ລິນຄຳ ດວງສະຫວັນ ຕ້ອນຮັບທູດສິງກະໂປ ເຂົ້າຢ້ຽມອຳລາ

ໂອກາດດັ່ງກ່າວ, ທ່ານ ລິນຄໍາ ດວງສະຫວັນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານທູດ ທີ່ໄດ້ສຳເລັດວາລະການປະຕິບັດໜ້າທີ່ ໃນນາມເອກອັກຄະລັດຖະທູດສິງກະໂປ ປະຈຳ ສປປ ລາວ ຊຶ່ງຕະຫຼອດໃນໄລຍະປະຕິບັດໜ້າທີ່, ທ່ານທູດໄດ້ເອົາໃຈໃສ່ຢ່າງຕັ້ງໜ້າເຂົ້າໃນການປະກອບສ່ວນເສີມຂະຫຍາຍສາຍພົວພັນອັນດີງາມ ແລະ ເປັນມູນເຊື້ອລະຫວ່າງ ລາວ ແລະ ສິງກະໂປ ທີ່ມີມາແຕ່ດົນນານໃຫ້ນັບມື້ມີບາດກ້າວຂະຫຍາຍຕົວຂຶ້ນຢ່າງບໍ່ຢຸດຢັ້ງ ເວົ້າລວມ, ເວົ້າສະເພາະ ກໍແມ່ນການພົວພັນຮ່ວມມືກັບກະຊວງກະສິກຳ ແລະ ສິ່ງແວດລ້ອມ ໂດຍສະເພາະແມ່ນວຽກງານກາກບອນເຄຣດິດ, ວຽກງານການຄ້ຳປະກັນທາງດ້ານສະບຽງອາຫານ, ວຽກງານການຄຸ້ມຄອງ ແລະ ຈັດການນ້ຳ ແລະ ອື່ນໆ. ນອກນັ້ນ ທ່ານລັດຖະມົນຕີກະຊວງກະສິກໍາ ແລະ ສິ່ງແວດລ້ອມ ກໍຍັງໄດ້ອວຍພອນໃຫ້ ທ່ານທູດຈົ່ງປະສົບຜົນສຳເລັດໃນການປະຕິບັດໜ້າທີ່ໃໝ່ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

ໂອກາດດຽວກັນນີ້, ທ່ານ Sudesh Maniar ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈ ທີ່ໄດ້ໃຫ້ຄວາມຮ່ວມມື ແລະ ອຳນວຍຄວາມສະດວກໃນໄລຍະການປະຕິບັດໜ້າທີ່ການທູດປະຈຳ ສປປ ລາວ ຈົນໄດ້ຮັບຜົນສຳເລັດເປັນຢ່າງດີ.

ຂ່າວ: ກສ