ທ່ານ ມະໄລທອງ ກົມມະສິດ ຕ້ອນຮັບ ເອກະອັກຄະລັດຖະທູດສະວິດ

ທ່ານລັດຖະມົນຕີ ສະແດງຄວາມຊົມເຊີຍ ແລະ ຂອບໃຈມາຍັງລັດຖະບານສະວິດ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ໃນການຈັດຕັ້ງປະຕິບັດໂຄງການຕ່າງໆໃນໄລຍະຜ່ານມາ ເຊັ່ນ: ການສະໜັບສະໜູນຈັດຕັ້ງປະຕິບັດໂຄງການໃຫ້ຄໍາປຶກສາ ແລະ ການຊ່ວຍເຫຼືອດ້ານນະໂຍບາຍ, ການສະໜັບສະໜູນຈັດຕັ້ງປະຕິບັດໂຄງການສົ່ງເສີມການທ່ອງທ່ຽວແບບຍືນຍົງ, ການຜະລິດທີ່ສະອາດ ແລະ ຄວາມສາມາດໃນການສົ່ງອອກ (ໄລຍະທີ 1 ແລະ 2), ການສະໜັບສະໜູນຈັດຕັ້ງປະຕິບັດໂຄງການສ້າງຄວາມເຂັ້ມແຂງໃຫ້ກັບຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ຂອງ ສປປ ລາວ ເພື່ອຮັບມືກັບຜົນກະທົບຈາກການແຜ່ລະບາດຂອງໂຄວິດ-19.

ໃນຕອນທ້າຍທັງສອງຝ່າຍ ໄດ້ສະເໜີສືບຕໍ່ປຶກສາຫາລືຮ່ວມກັນໃນການສຶກສາຄວາມເປັນໄປໄດ້ໃນການສ້າງສັນຍາການຄ້າສອງຝ່າຍ ລາວ-ສະວິດ ເພື່ອສົ່ງເສີມການຄ້າ ແລະ ການລົງທຶນ, ສະເໜີການສະໜັບສະໜູນຊຸກຍູ້ ແລະ ຍົກລະດັບການພັດທະນາວຽກງານອຳນວນຄວາມສະດວກທາງດ້ານການຄ້າ, ການຄ້າເອເລັກໂຕຣນິກ, ອຸດສາຫະກຳສະອາດ, ພະລັງງານສະອາດ ແລະ ການຮ່ວມມືດ້ານແຮ່ທາດສີຂຽວ ແລະ ປຶກສາຫາລື ກ່ຽວກັບສິນຄ້າລະຫວ່າງ 2 ປະເທດ ນໍາເຂົ້າ-ສົ່ງອອກ. ເປັນຕົ້ນແມ່ນສິນຄ້າຫຼັກທີ່ ສປປ ລາວ ນໍາເຂົ້າ: ແກ້ວປະເສີດ ຫຼື ເຄິ່ງປະເສີດ (ເພັດພອຍ); ຜະລິດຕະພັນການຢາ (ເພສັດຊະກໍາ); ຜະລິດຕະພັນທາງເຄມີ; ໄຮໂດຣຄາບອນ; ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ເຄື່ອງໄຟຟ້າ ແລະ ອຸປະກອນໄຟຟ້າ ແລະ ສິນຄ້າຫຼັກທີ່ ສປປ ລາວ ສົ່ງອອກ: ຄໍາປະສົມ, ຄຳແທ່ງ; ເຄື່ອງນຸງຫົ່ມ; ເກີບ, ຊາ (ບໍ່ທັນໄດ້ປຸງແຕ່ງ); ເກີບ; ເສັ້ນດ້າຍ) ນັບແຕ່ປີ 2008 ຮອດປັດຈຸບັນ ເຫັນວ່າການລົງທຶນຂອງ ສະວິດ ໃນ ສປປ ລາວ (ສະເພາະໃນຂະແໜງກິດຈະການທົ່ວໄປ ບໍ່ກວມເອົາຂົງເຂດເສດຖະກິດພິເສດ ແລະ ເຂດສໍາປະທານ) ມີຈໍານວນວິສາຫະກິດທັງໝົດ 12 ຫົວໜ່ວຍ ແລະ ມີມູນຄ່າການລົງທຶນ 11.5 ຕື້ໂດລາ, ໃນນັ້ນ ອຸດສາຫະກໍາປຸງແຕ່ງ ກວມເອົາ 8:1 ສ່ວນ.

(ແຫຼ່ງຂ່າວ: ຂ່າວສານ ອຄ)