ໃນຕອນບ່າຍຂອງວັນທີ 2 ພະຈິກ ນີ້ ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເປໂດຣ ຊະວາເລັນ (Pedro Zwahlen) ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສະມາພັນທະລັດ ສະວິດ ປະຈຳ ລາວ ຊຶ່ງມີສໍານັກງານຕັ້ງຢູ່ ບາງກອກ ຣາຊະອານາຈັກໄທ.
ທ່ານ ຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍ ຕໍ່ ທ່ານ ເປໂດຣ ຊະວາເລັນ ທີ່ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສະມາພັນທະລັດ ສະວິດ ປະຈໍາ ສປປ ລາວ. ພ້ອມກັນນີ້, ທ່ານ ຮອງນາຍົກລັດຖະມົນຕີ ກໍໄດ້ຕີລາຄາສູງຕໍ່ການພົວພັນ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສະວິດ ຕະຫຼອດໄລຍະຜ່ານມາ ນັບຕັ້ງແຕ່ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 4 ກັນຍາ 1963, ສປປ ລາວ ແລະ ສະວິດ ໄດ້ມີການພົວພັນຮ່ວມມືອັນດີນຳກັນ ແລະ ມີທ່າເຕີບໃຫຍ່ຂະຫຍາຍຕົວຂຶ້ນເລື້ອຍໆ ຊຶ່ງປີນີ້້ຖືເປັນປີທີ່ມີຄວາມໝາຍສໍາຄັນທີ່ສອງຝ່າຍຮ່ວມກັນ ສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສະວິດ ຄົບຮອບ 60 ປີ ແລະ ພິທີສະເຫຼີມສະຫຼອງດັ່ງກ່າວ ກໍມີຂຶ້ນໃນຄ່ຳຄືນຂອງມື້ດຽວກັນນີ້ (ວັນທີ 2 ພະຈິກ 2023). ນອກນີ້, ທ່ານ ສະເຫຼີມໄຊ ກົມມະສິດ ໄດ້ແຈ້ງໃຫ້ຊາບ ກ່ຽວກັບ ການກະກຽມເປັນປະທານ ອາຊຽນ ຂອງ ສປປ ລາວ ແລະ ເປີດປີທ່ອງທ່ຽວລາວ ໃນປີ 2024.
ຂະນະດຽວກັນ, ທ່ານ ເອກອັກຄະລັດຖະທູດ ເປໂດຣ ຊະວາເລັນ ກໍໄດ້ສະແດງຄວາມຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນຂອງ ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ, ທັງຍັງໄດ້ສະແດງຄວາມຍິນດີທີ່ຈະສືບຕໍ່ການຮ່ວມມື ແລະ ການຊ່ວຍເຫຼືອແກ່ ສປປ ລາວ, ລວມເຖິງການເປັນປະທານອາຊຽນຂອງ ສປປ ລາວ ໃຫ້ປະສົບຜົນສໍາເລັດຕາມລະດັບຄາດໝາຍ ແລະ ຍັງໄດ້ສະແດງຄວາມຫວັງວ່າ ໃນໄລຍະການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ຈະເຮັດສຸດຄວາມສາມາດເພື່ອສືບຕໍ່ເສີມຂະຫຍາຍ ການພົວພັນຮ່ວມມື ລະຫວ່າງ ສອງປະເທດ ສະວິດ-ລາວ ໃຫ້ນັບມື້ນັບດີຂຶ້ນ.
(ຂ່າວ:ກະຊວງການຕ່າງປະເທດ, ພາບ: ສຸກສະຫວັນ)
ຄໍາເຫັນ