 |
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມປິຕິຍິນດີ ແລະ ຄວາມຂອບໃຈ ທີ່ໄດ້ມີໂອກາດເຂົ້າເຝົ້າສົມເດັດ ອົງມົງກຸດລາຊະກຸມມານ ອາກິຊິໂນະ ແລະ ພະຊາຍາ ຄິໂກະ ໃນຄັ້ງນີ້ ໃນທ່າມກາງທີ່ ສປປ ລາວ ແລະ ຍີ່ປຸ່ນ ໄດ້ຊຸກຍູ້ຂະຫຍາຍສາຍພົວພັນມິດຕະພາບອັນເປັນມູນເຊື້ອ.
ໃນຂະນະດຽວກັນ, ສົມເດັດ ອົງມົງກຸດລາຊະກຸມມານ ອະກິຊິໂນະ ກໍໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ການເດີນທາງຢ້ຽມຢາມຂອງ ທ່ານ ທອງສະຫວັນ ພົມວິຫານ ພ້ອມດ້ວຍພັນລະຍາ ແລະ ຄະນະ ໃນຄັ້ງ ນີ້, ພ້ອມທັງໄດ້ອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ລະຫວ່າງສອງປະເທດ ຍີ່ປຸ່ນ ແລະ ລາວ ຈະເລີນງອກງາມຍິ່ງໆຂຶ້ນ.
 |
ສປປລາວ ແລະ ຍີ່ປຸ່ນ ໄດ້ສ້າງຕັ້ງສາຍພົວພັນການທູດນໍາກັນໃນວັນທີ 5 ມີນາ 1955, ຕະຫຼອດໄລຍະ 7 ທົດສະວັດກວ່າທີ່ຜ່ານມາ, ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສປປ ລາວ ແລະ ຍີ່ປຸ່ນໄດ້ຮັບການຮັດແໜ້ນ ແລະ ເສີມຂະຫຍາຍຢ່າງບໍ່ຢຸດຢັ້ງ. ພິເສດໃນປີ 2025 ຜ່ານມາ, ສປປ ລາວ ແລະ ຍີ່ປຸ່ນໄດ້ຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 70 ປີ ແລະ ການນໍາຂອງສອງປະເທດ ລາວ ແລະ ຍີ່ປຸ່ນ ໄດ້ເຫັນດີເປັນເອກະພາບໃນການຍົກລະດັບສາຍພົວພັນທາງການທູດຈາກ ຄູ່ຮ່ວມຍຸດທະສາດ ມາເປັນຄູ່ຮ່ວມຍຸດທະສາດຮອບດ້ານ, ໄດ້ກາຍເປັນຂີດໝາຍສໍາຄັນທາງປະຫວັດສາດຂອງການພົວພັນຮ່ວມມືລາວ-ຍີ່ປຸ່ນເພື່ອພ້ອມກັນສືບຕໍ່ຊຸກຍູ້ສົ່ງເສີມການພົວພັນຮ່ວມມືຂອງສອງປະເທດໃຫ້ກ້າວຂຶ້ນສູ່ລະດັບສູງໃໝ່ໃນຊຸມປີຕໍ່ໜ້າ; ແລະ ປີ 2025 ຍັງແມ່ນການຄົບຮອບ 60 ປີທີ່ລັດຖະບານຍີ່ປຸ່ນໄດ້ສົ່ງອາສາສະໝັກຂອງຕົນມາປະຕິບັດໜ້າທີ່ຢູ່ສປປລາວຫຼາຍກວ່າ 1,000 ເທື່ອຄົນ ອັນໄດ້ສະແດງໃຫ້ເຫັນເຖິງຄວາມສາມັກຄີຮັກແພງ ແລະ ຄວາມສະໜິດສະໜົມກໍຄືການແລກປ່ຽນ ແລະ ການໄປມາຫາສູ່ຂອງປະຊາຊົນສອງຊາດລາວ-ຍີ່ປຸ່ນຢ່າງສະໜິດແໜ້ນອີກດ້ວຍ.ປັດຈຸບັນມີອາສາສະໝັກຍີ່ປຸ່ນ 52 ຄົນທີ່ກໍາລັງປະຕິບັດໜ້າທີ່ຢູ່ ສປປ ລາວ.
ຂ່າວ: ກະຊວງການຕ່າງປະເທດ
ຄໍາເຫັນ