ທ່ານ ວັນໄຊ ພອງສະຫວັນ ຕ້ອນຮັບຄະນະຜູ້ແທນຊ່ຽວຊານ ສສ ຫວຽດນາມ

ໂອກາດນີ້, ທ່ານ ວັນໄຊ ພອງສະຫວັນ ໄດ້ສະແດງຄວາມຍິນດີຕ້ອນຮັບ ຄະນະຊ່ຽວຊານ ທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ພ້ອມນີ້ ກໍໄດ້ສະແດງຄວາມຂອບໃຈຕໍ່ຄະນະຊ່ຽວຊານ ທີ່ໃຫ້ກຽດມາປາຖະກະຖາເອກະສານບົດຮຽນ ສສ ຫວຽດນາມ ກ່ຽວກັບວຽກງານກວດກາພັກ, ກວດກາລັດ, ຕ້ານການສໍ້ລາດບັງຫຼວງ ແລະ ການຫັນເປັນທັນສະໄໝໃນວຽກງານກວດກາ ໃຫ້ພະນັກງານກວດກາຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ, ບັນດາກະຊວງ-ອົງການ ແລະ ຖ້ອງຖິ່ນຂອງ ສປປ ລາວ, ພ້ອມນີ້ທ່ານຍັງໄດ້ກ່າວຕື່ມອີກວ່າ: ຂ້າພະເຈົ້າຫວັງວ່າທ່ານຈະນໍາເອົາບົດຮຽນອັນມີຄຸນຄ່າຂອງຫວຽດນາມມາເເບ່ງປັນໃຫ້ພະນັກງານກວດກາ ສປປ ລາວ ຂອງພວກຂ້າພະເຈົ້າ ໄດ້ຮັບຮູ້ ແລະ ເຂົ້າໃຈ ແລະ ສາມາດນຳມາໝູນໃຊ້ເຂົ້າໃນການເຄື່ອນໄຫວວຽກງານກວດກາຂອງ ສປປ ລາວ ໃນຕໍ່ໜ້າ.

ພ້ອມນີ້, ທ່ານ ວັນໄຊ ພອງສະຫວັນ ຍັງໄດ້ຝາກຄວາມຢື້ຢາມຖາມຂ່າວເຖິງສະຫາຍປະທານກຳມະການກວດກາສູນກາງພັກ ແລະ ປະທານອົງການກວດກາລັດຖະບານ ສສ ຫວຽດນາມ ອີກດ້ວຍ.

ທ່ານ ຫວຽນ ດິ່ງ ຮອກ ກໍໄດ້ສະແດງຄວາມຂອບໃຈທີ່ໄດ້ໃຫ້ກຽດຕ້ອນຮັບຄະນະຊ່ຽວຊານຢ່າງອົບອຸ່ນໃນຄັ້ງນີ້, ການເດີນທາງມາຢ້ຽມຢາມຂອງຄະນະຊ່ຽວຊານຄັ້ງນີ້ແມ່ນເພື່ອເພີ່ມພູນຄູນສ້າງສາຍພົວພັນມິດຕະພາບຂອງສອງພັກ-ສອງລັດ ລາວ-ຫວຽດນາມ ເວົ້າລວມ ເວົ້າສະເພາະກໍຄື ສອງອົງການກວດກາພັກ-ລັດ ສປປ ລາວ ແລະ ສສ ຫວຽດນາມ ໃຫ້ມີຜົນສຳເລັດຫຼາຍຂຶ້ນກວ່າເກົ່າ. ພ້ອມນີ້ຍັງໄດ້ກ່າວຕື່ມອີກວ່າພວກເຮົາຈະພະຍາຍາມຖອດຖອນບົດຮຽນທີ່ພວກເຮົາມີໃຫ້ພະນັກງານກວດກາ ສປປ ລາວໃນຄັ້ງນີ້ໃຫ້ໄດ້ຫຼາຍທີ່ສຸດເທົ່າທີ່ຈະເຮັດໄດ້.

(ຂ່າວ: ຕູ່ນ່າ)