ທ່ານສະເຫຼີມໄຊກົມມະສິດກ່າວຄຳເຫັນຕໍ່ກອງປະຊຸມພາກອະພິປາຍທົ່ວໄປຂອງຄະນະກຳມາທິການເສດຖະກິດ-ສັງຄົມ ປະຈຳພາກພື້ນອາຊີ - ປາຊີຟິກສະໄໝທີ80

ໃນວັນທີ23ເມສາ ນີ້ທີ່ບາງກອກປະເທດໄທ, ທ່ານສະເຫຼີມໄຊກົມມະສິດຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດແຫ່ງສປປລາວໄດ້ນຳພາຄະນະຜູ້ແທນທາງການຂອງສປປລາວສືບຕໍ່ເຂົ້າຮ່ວມແລະກ່າວຄຳເຫັນຕໍ່ກອງປະຊຸມພາກອະພິປາຍທົ່ວໄປຂອງຄະນະກຳມາທິການເສດຖະກິດ-ສັງຄົມປະຈຳພາກພື້ນອາຊີ - ປາຊີຟິກສະໄໝທີ80ໂດຍໄດ້ຍົກໃຫ້ເຫັນເຖິງຄວາມສໍາຄັນຂອງການນໍາໃຊ້ນະວັດຕະກໍາດີຈີຕອນທີ່ທັນສະໄໝເພື່ອເລັ່ງລັດການຈັດຕັ້ງປະຕິບັດວາລະ2030ເພື່ອການພັດທະນາແບບຍືນຍົງແລະການພັດທະນາເສດຖະກິດ-ສັງຄົມພາຍໃນປະເທດໂດຍສະເພາະການສົ່ງເສີມການຜະລິດ, ການຄ້າ, ການເງິນ, ການສຶກສາ, ການບໍລິການແລະອື່ນໆ. ເຖິງວ່າ ຈະມີຫຼາຍປະເທດສາມາດນຳໃຊ້ນະວັດຕະກຳດ້ານດີຈີຕອນໄດ້ຢ່າງມີປະສິດທິຜົນ, ແຕ່ເຫັນວ່າຍັງມີຄວາມແຕກໂຕນແລະຄວາມບໍ່ສະເໝີພາບໃນການພັດທະນານະວັດຕະກຳດ້ານດີຈີຕອນເຮັດໃຫ້ບາງປະເທດຍັງປະເຊີນກັບຄວາມທ້າທາຍໃນການພັດທະນາພື້ນຖານໂຄງລ່າງດ້ານເຕັກໂນໂລຊີແລະການສ້າງຄວາມສາມາດດ້ານນະວັດຕະກຳດີຈີຕອນ. ທ່ານຮອງນາຍົກລັດຖະມົນຕີຍັງໄດ້ກ່າວເຖິງຄວາມພະຍາຍາມຂອງລັດຖະບານໃນການຫັນເປັນທັນສະໄໝກໍຄືການຈັດຕັ້ງປະຕິບັດວິໄສທັດການພັດທະນາເສດຖະກິດດີຈີຕອນແຫ່ງຊາດ20ປີ (2021-2040), ຍຸດທະສາດການພັດທະນາເສດຖະກິດດີຈີຕອນແຫ່ງຊາດ10ປີ (2021-2030) ແລະແຜນພັດທະນາເສດຖະກິດດີຈີຕອນ5ປີ (2021-2025) ແນໃສ່ຮັດແຄບຄວາມແຕກໂຕນດ້ານການພັດທະນາເຕັກໂນໂລຊີພ້ອມທັງເລັ່ງລັດການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງແລະສະໜັບສະໜູນໃຫ້ສປປລາວສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາພາຍໃນປີ2026. 
ສຳລັບການຮ່ວມມືລະດັບພາກພື້ນ, ສປປລາວໄດ້ສະໜັບສະໜູນແຜນແມ່ບົດດີຈີຕອນອາຊຽນປີ2025ທີ່ເລັ່ງລັດໃຫ້ແກ່ການເຊື່ອມໂຍງດີຈີຕອນທົ່ວພາກພື້ນແລະສຳລັບການເປັນປະທານໝູນວຽນອາຊຽນໃນປີ2024ກໍໄດ້ກໍານົດເອົາ9ບຸລິມະສິດຊຶ່ງລວມທັງການຂ້າມຜ່ານໄປສູ່ອະນາຄົດດີຈີຕອນແນໃສ່ສົ່ງເສີມໃຫ້ອາຊຽນກ້າວໄປສູ່ເສດຖະກິດດີຈີຕອນໃນແຖວໜ້າແລະສ້າງການເຊື່ອມຈອດທົ່ວອາຊຽນແລະທົ່ວໂລກໃຫ້ນັບມື້ນັບເລິກເຊິ່ງຂຶ້ນກວ່າເກົ່າ. ນອກຈາກນັ້ນ, ທ່ານຮອງນາຍົກລັດຖະມົນຕີຍັງໄດ້ຮຽກຮ້ອງໃຫ້ປະຊາຄົມໂລກເພີ່ມທະວີການຊ່ວຍເຫຼືອບັນດາປະເທດທີ່ມີສະພາບເງື່ອນໄຂພິເສດພ້ອມທັງໄດ້ຢືນຢັນຄືນຄວາມໝາຍໝັ້ນຂອງສປປລາວ ໃນການຮ່ວມມືໃນລະດັບພາກພື້ນແລະສາກົນເພື່ອພ້ອມກັນນຳໃຊ້ທ່າແຮງດ້ານນະວັດຕະກຳດີຈີຕອນ ເພື່ອການພັດທະນາແບບຍືນຍົງແລະພ້ອມກັນກ້າວໄປ.
ນອກຈາກນີ້, ຄະນະຜູ້ແທນສປປລາວກໍໄດ້ປະກອບຄຳເຫັນໃນວາລະທີ3ກ່ຽວກັບການຮ່ວມມືສໍາລັບປະເທດດ້ອຍພັດທະນາ (LDCs), ປະເທດກຳລັງພັດທະນາທີ່ບໍ່ມີຊາຍແດນຕິດທະເລ (LLDCs) ແລະປະເທດເກາະດອນນ້ອຍກຳລັງພັດທະນາ (SIDs) ກ່ຽວກັບການນຳໃຊ້ດີຈີຕອນເຂົ້າໃນການພັດທະນາເສດຖະກິດ-ສັງຄົມໃນບັນດາປະເທດທີ່ມີສະພາບເງື່ອນໄຂພິເສດດັ່ງກ່າວຊຶ່ງສປປລາວເປັນທັງປະເທດບໍ່ມີຊາຍແດນຕິດທະເລແລະປະເທດດ້ອຍພັດທະນາ.
ກອງປະຊຸມດັ່ງກ່າວເປັນໂອກາດສຳຄັນໃນການປຶກສາຫາລືກ່ຽວກັບການຮັດແໜ້ນການຮ່ວມມືໃນລະດັບພາກພື້ນແລະສາກົນເພື່ອໝູນໃຊ້ນະວັດຕະກຳດີຈີຕອນເຂົ້າໃນການເລັ່ງລັດການຈັດຕັ້ງປະຕິບັດວາລະ2030ເພື່ອເປົ້າໝາຍການພັດທະນາແບບຍືນຍົງ, ຮັດແຄບຄວາມແຕກໂຕນແລະຄວາມບໍ່ສະເໝີພາບດ້ານດີຈີຕອນ, ລະດົມຂົນຂວາຍຊັບພະຍາກອນແລະທຶນຮອນກໍຄືເຕັກນິກວິຊາການຢ່າງມີປະສິດທິຜົນ.
    ໃນໂອກາດເຂົ້າຮ່ວມກອງປະຊຸມຄັ້ງນີ້, ທ່ານສະເຫຼີມໄຊ ກົມມະສິດ ໄດ້ພົບປະກັບທ່ານນາງອາມີດາຊໍເຊຍອາລີສຈາບານາເລຂາບໍລິຫານງານຄະນະກຳມາທິການເສດຖະກິດ-ສັງຄົມປະຈຳພາກພື້ນອາຊີ-ປາຊີຟິກແລະທ່ານໄຄຣັດຊາຣີເບເລຂາທິການໃຫຍ່, ກອງປະຊຸມວ່າດ້ວຍການປຶກສາຫາລືແລະການສ້າງມາດຕະການໄວ້ເນື້ອເຊື່ອໃຈກັນໃນອາຊີ (Conference on Interaction and Confidence Building Measures in Asia -CICA) ເພື່ອປຶກສາຫາລືກ່ຽວກັບບັນຫາທີ່ທັງສອງຝ່າຍມີຄວາມສົນໃຈຮ່ວມກັນ.
ຂ່າວ-ພາບ:ກະຊວງການຕ່າງປະເທດ