ພິທີພົບປະແລກປ່ຽນບົດຮຽນລະຫວ່າງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ)ແຂວງສະຫວັນນະເຂດ ສປປ ລາວ ແລະ ພະແນກຖະແຫຼງຂ່າວ ແລະ ການສື່ສານແຂວງກວາງຈິ ສສ ຫວຽດນາມໄດ້ຈັດຂຶ້ນໃນລະຫວ່າງວັນທີ 15-16 ພະຈິກນີ້ທີ່ພະແນກ ຖວທ ແຂວງສະຫວັນນະເຂດ ໂດຍການເຂົ້າຮ່ວມຂອງທ່ານ ໂພສີສ້ອຍ ກຸທິລາດ ຫົວໜ້າພະແນກ ຖວທ ແຂວງສະຫວັນນະເຂດ ພ້ອມຄະນະ, ຝ່າຍແຂວງກວາງຈິນຳໂດຍທ່ານ ຫວງຽນ ຮວ່ານ ຮອງຫົວໜ້າພະແນກຖະແຫຼງຂ່າວ ແລະ ການສື່ສານແຂວງກວາງຈິພ້ອມຄະນະ.
ການພົບປະຄັ້ງນີ້ທັງສອງຝ່າຍໄດ້ລາຍໂດຍຫຍໍ້ກ່ຽວກັບສະພາບການຈັດຕັ້ງປະຕິບັດວຽກງານທີ່ຕົນຮັບຜິດຊອບໃນໄລຍະຜ່ານມາຊຶ່ງມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າຍທາຍທົດສອບຫຼາຍຢ່າງ ໂດຍສະເພາະດ້ານວຽກງານຖະແຫຼງຂ່າວ ແລະ ສື່ມວນຊົນ ພາຍຫຼັງທີ່ມີສື່ແບບໃໝ່ເຂົ້າມາມີອິດທິພົນເຮັດໃຫ້ຄຸນຄ່າ ແລະ ຄວາມສົນໃຈຂອງສັງຄົມໃນການບໍລິໂພກຂໍ້ມູນຂ່າວສານຈາກສື່ແບບເກົ່ານັບມື້ຫຼຸດໜ້ອຍຖອຍລົງ. ສະນັ້ນຈຶ່ງເປັນຈຸດສຳຄັນເຮັດໃຫ້ສື່ວິທະຍຸ, ໂທລະພາບ ແລະ ໜັງສືພິມຕ້ອງໄດ້ມີການປັບປຸງທາງດ້ານຄຸນນະພາບໃຫ້ຫັນເປັນທັນສະໄໝສ້າງສິ່ງດຶງດູດຈາກຜູ້ຊົມ, ຜູ້ຟັງໃຫ້ຫຼາຍຂຶ້ນ.
ໃນພິທີທັງສອງຝ່າຍໄດ້ຮ່ວມລົງນາມເຊັນບົດບັນທຶກ ການຮ່ວມມືດ້ານວຽກງານສື່ມວນຊົນຕື່ມອີກ ຊຶ່ງເນື້ອໃນບົດບັນທຶກການຮ່ວມມືໄດ້ລະບຸວ່າ: ທັງ 2 ຝ່າຍສືບຕໍ່ເພີ່ມທະວີການຮ່ວມມືດ້ານການສື່ສານ, ໂຄສະນາ ແລະ ແນະນຳກ່ຽວກັບປະຫວັດສາດ ແລະ ວັດທະນະທຳ,ຮີດຄອງປະເພນີອັນດີງາມຂອງຊາດ ກໍຄືຂອງທ້ອງຖິ່ນ; ຂໍ້ມູນກ່ຽວກັບແນວທາງແຜນນະໂຍບາຍ, ຄວາມສາມາດບົ່ມຊ້ອນ ແລະ ຄວາມໄດ້ປຽບຂອງແຕ່ລະແຂວງ ແລະ ແຕ່ລະປະເທດໃນການຮຽກຮ້ອງ ແລະ ດຶງດູດເອົາການລົງທຶນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງແຂວງ, ຮຽບຮຽງບັນດາຜະລິດຕະພັນການພິມ ແລະ ສາລະຄະດີໂທລະພາບເພື່ອເຜີຍແຜ່ແຜນນະໂຍບາຍ ແລະ ແນວທາງຂອງແຕ່ລະປະເທດ, ໂຄສະນາເຜີຍແຜ່ກ່ຽວກັບ ຄວາມສາມາດບົ່ມຊ້ອນ ແລະ ຄວາມໄດ້ປຽບຂອງ 2 ແຂວງດ້ວຍພາສາ: ຫວຽດນາມ, ອັງກິດ, ລາວ ເພື່ອໂຄສະນາເຜີຍແຜ່ໃນໜ້າໜັງສືພິມຂອງ 2 ແຂວງ, ເນື້ອໃນການສື່ສານທີ່ສະແດງອອກຜ່ານບັນດາຜະລິດຕະພັນໜັງສືພິມ (ໜັງສືພິມເອເລັກໂຕຣນິກ) ໂດຍສອງຝ່າຍໄດ້ຮຽບຮຽງດ້ວຍເອກະສານທີ່ເປັນລາຍລັກອັກສອນ, ພາບນິ້ງ, ພາບເຄື່ອນໄຫວ, ພາບແຕ້ມ, ສຽງທີ່ເປັນພາສາຫວຽດນາມ, ອັງກິດ, ລາວ ພ້ອມທັງຊຸກຍູ້ການເຄື່ອນໄຫວແລກປ່ຽນການສື່ສານລະຫວ່າງບັນດາສື່ມວນຊົນ ລວມທັງການສື່ສານຜ່ານສະຖານີວິທະຍຸ, ໂທລະພາບ, ໜັງສືພິມ ແລະ ສື່ສັງຄົມອອນລາຍ. ບັນດາການເຄື່ອນໄຫວແລກປ່ຽນບົດຄວາມ, ຂໍ້ມູນຂ່າວສານ, ເອກະສານ ແລະ ປະສົບການໃນຂົງເຂດສື່ມວນຊົນຊຶ່ງຈະໄດ້ຮັບການຈັດຕັ້ງປະຕິບັດ ເພື່ອແນໃສ່ເພີ່ມທະວີຄວາມເຂົ້າໃຈກ່ຽວກັບປະເທດ, ຄົນ, ວັດທະນະທຳ ແລະ ປະຫວັດສາດຂອງສອງແຂວງ.ຮ່ວມລົງນາມຄັ້ງນີ້ຝ່າຍແຂວງສະຫວັນນະເຂດໂດຍແມ່ນທ່ານ ໂພສີສ້ອຍ ກຸທິລາດ ແລະ ຝ່າຍແຂວງກວາງຈິໂດຍແມ່ນທ່ານ ຫງວຽນຮວ່ານ.
ຂ່າວ-ພາບ: ອັກສອນສິນ ພົມມະຈັນ
ກອງທຶນ NT2DF ອະນຸມັດງົບ 343 ລ້ານກີບ ຟື້ນຟູປ່ານາກາຍ ສືບຕໍ່ພັດທະນາຊຸມຊົນ
ກອງປະຊຸມຄັ້ງທີ 9 ຂອງຄະນະກໍາມະການຊີ້ນໍາກອງທຶນພັດທະນານໍ້າເທີນ 2ໄດ້ຈັດຂຶ້ນໃນວັນທີ 24 ກນຍາຜ່ານມາທີ່ຫ້ອງວ່າການແຂວງຄໍາມ່ວນ ເພື່ອທົບທວນຜົນການດໍາເນີນງານ, ຮັບຮອງແຜນງານ ແລະ ກໍານົດທິດທາງພັດທະນາກອງທຶນໃນໄລຍະຕໍ່ໜ້າ, ໂດຍການເປັນປະທານຮ່ວມຂອງ ທ່ານ ສົມສະອາດ ອຸ່ນສີດາ ປະທານຄະນະປົກຄອງແຂວງຄໍາມ່ວນ ແລະ ທ່ານ ມາກ-ອັງຕວນ ຣຸບ ຜູ້ອໍານວຍການໃຫຍ່ ບໍລິສັດ ໄຟຟ້ານໍ້າເທີນ 2 ຈໍາກັດ.
ຄໍາເຫັນ