ທູດຍີ່ປຸ່ນ ຈັດພິທີຕ້ອນຮັບອາສາສະໝັກໄຈກາ

ໃນວັນທີ 5 ມີນານີ້ ທີ່ສະຖານທູດຍີ່ປຸ່ນປະຈຳ ສປປ ລາວ ໄດ້ຈັດພິທີຕ້ອນຮັບອາສາສະໝັກໄຈກາໃໝ່ 6 ທ່ານ ທີ່ຫາກໍເດີນທາງມາເຖິງປະເທດລາວ ໂດຍມີທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ, ທ່ານນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ, ທ່ານ ນາງ ມີຢະໂກະ ໂຄບະຢະຊິ ປະທານອົງການໄຈກາປະຈໍາລາວ ແລະ ພາກສ່ວນກ່ຽວຂ້ອງເຂົ້າຮ່ວມຕ້ອນຮັບ.
ທ່ານທູດຍີ່ປຸ່ນ ປະຈຳ ລາວ ກ່າວວ່າ: ປະເທດລາວເປັນປະເທດທໍາອິດທີ່ຍີ່ປຸ່ນສົ່ງອາສາສະໝັກ JOCV ໄປຕ່າງປະເທດໃນປີ 1965, ມາຮອດປັດຈຸບັນ ມີຫຼາຍກ່ວາ 1.065 ທ່ານ ທີ່ຖືກສົ່ງມາປະເທດລາວ. ບັນດາກິດຈະກຳ ແລະ ວຽກງານຕ່າງໆທີ່ພວກເຂົາສ້າງມາເປັນເວລາຍາວນານຫຼາຍປີແມ່ນໄດ້ຮັບການຕີລາຄາສູງ ແລະ ຖືກຊື່ນຊົມໂດຍຄົນລາວ ແລະ ໃນທຸກໆປີ ພວກເຂົາກໍໄດ້ຮັບໂອກາດເຂົ້າຢ້ຽມຂ່ຳນັບທ່ານນາຍົກລັດຖະມົນຕີຂອງ ສປປ ລາວ ນຳອີກ.”
     ທ່ານທູດ ກ່າວຕື່ມອີກວ່າ: “ປີ 2025 ແມ່ນປີຄົບຮອບ 60 ປີ ຂອງການສົ່ງອາສາສະໝັກມາປະເທດລາວ, ຫວັງເປັນຢ່າງຍິ່ງວ່າ ອາສາສະໝັກແຕ່ລະທ່ານ ຈະເຮັດກິດຈະກຳແລກປ່ຽນຕ່າງໆກັບຄົນທ້ອງຖິ່ນຢ່າງເລິກເຊິ່ງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດລາວ, ຂໍໃຫ້ມ່ວນຊື່ນ ແລະ ພາກພູມໃຈທີ່ສາມາດມາເຮັດກິດຈະກຳໃນປະເທດລາວ ຊຶ່ງແມ່ນໜຶ່ງໃນສະຖານທີ່ທີ່ພິເສດທີ່ສຸດໃນບັນດາຈຸດໝາຍປາຍທາງຂອງ JOCV ທົ່ວໂລກ."
ພວກເຮົາຫວັງວ່າ ບັນດາ JOCV ໃໝ່ທັງ 6 ທ່ານຈະສ້າງຄວາມຜູກພັນຢ່າງເລິກເຊິ່ງກັບປະເທດລາວ ແລະ ບັນດາເພື່ອນຮ່ວມງານຫ້ອງການທີ່ພວກເຂົາຈະຖືກສົ່ງໄປປະຈຳໃນອະນາຄົດ.
(ຂ່າວ-ພາບ: ສຳນານ)