ທູດໄທ ປະຈຳ ສປປ ລາວ ຈັດງານລ້ຽງ ສະຫຼອງວັນຄ້າຍວັນພະບໍຣົມຣາດຊະສົມພົບຂອງພະບາດສົມເດັດພະບໍຣົມຊະນະກາທິເບດ ມະຫາພູມິພົນອະດຸນຍະເດດມະຫາຣາດ ບໍຣົມມະນາດບໍພິດວັນຊາດ ແລະ ວັນພໍ່ແຫ່ງຊາດ

ສະຖານເອກອັກຄະຣາຊະທູດໄທ ປະຈຳ ສປປ ລາວ ໄດ້ຈັດງານລ້ຽງຮັບຮອງເນື່ອງໃນໂອກາດວັນຄ້າຍວັນພະບໍຣົມຣາດຊະສົມພົບຂອງພະບາດສົມເດັດພະບໍຣົມຊະນະກາທິເບດ ມະຫາພູມິພົນອະດຸນຍະເດດມະຫາຣາດ ບໍຣົມມະນາດບໍພິດວັນຊາດ ແລະ ວັນພໍ່ແຫ່ງຊາດ 5 ທັນວາ ຂຶ້ນໃນວັນທີ 5 ທັນວາຜ່ານມາ. ໂດຍມີ ທ່ານ ອາລຸນໄຊ ສູນນະລາດ ລັດຖະມົນຕີຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ມີບັນດາລັດຖະມົນຕີ, ຮອງລັດຖະມົນຕີ ແລະ ແຂກຖືກເຊີນເຂົ້າຮ່ວມ.
ທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດໄທ ປະຈຳ ສປປ ລາວ ໄດ້ກ່າວວ່າ: ໄທ ແລະ ສປປ ລາວ ເປັນປະເທດບ້ານໃກ້ເຮືອນຄຽງ, ປະຊາຊົນໄປມາຫາສູ່ກັນ ມີຄວາມເຂົ້າໃຈກັນ, ຄວາມຫ່ວງໃຍ ແລະ ຊ່ວຍເຫຼືອຊຶ່ງກັນ ແລະ ກັນ. ໄລຍະຜ່ານມາ, ທັງສອງປະເທດໃຫ້ຄວາມສຳຄັນຕໍ່ການສົ່ງເສີມການເຊື່ອມໂຍງທາງກາຍະພາບທາງບົກລະຫວ່າງກັນ ໂດຍສະເພາະທາງລົດ ແລະ ທາງລົດໄຟ ຊຶ່ງຈະຊ່ວຍສົ່ງເສີມການໄປມາຫາສູ່ລະຫວ່າງປະຊາຊົນ ແລະ ການຂົນສົ່ງສິນຄ້າ. ນອກຈາກນີ້, ເອກອັກຄະຣາຊະທູດ ໄດ້ເນັ້ນຄວາມພ້ອມຂອງໄທທີ່ຈະສະໜັບສະໜູນການເປັນປະທານອາຊຽນຂອງ ສປປ ລາວ ແລະ ປີທ່ອງທ່ຽວໃນປີ 2024.
ພາຍໃນງານມີການບັນເລງດົນຕີ ແລະ ຂັບຮ້ອງເພງໂດຍທ່ານນາງ ນັດວະດີ ພວງສຸວັນ ອາສາສະໝັກເພື່ອນໄທ, ວົງດຸຣິຍາງທະຫານອາກາດ, ຄະນະນັກຮ້ອງປະສານສຽງຈາກວິທະຍາໄລສິລະປະສຶກສາ ແລະ ວິທະຍາໄລສິລະປະແຫ່ງຊາດ ສປປ ລາວ. ນອກຈາກນີ້, ໜ່ວຍງານພາກລັດໃນຈັງຫວັດໜອງຄາຍ, ພາກທຸລະກິດ ແລະ ຊຸມຊົນໄທ ໃນ ສປປ ລາວ ລວມທັງ, ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ໄດ້ຮ່ວມມືຮ່ວມໃຈກັນຈັດຊຸ້ມ (ຮ້ານ) ອາຫານ, ເຂົ້າໜົມໄທ ແລະ ເຄື່ອງດື່ມ ແລະ ຊຸ້ມທຸລະກິດພາກບໍລິການຂອງປະເທດໄທ, ບໍລິການທາງການແພດຈາກໂຮງໝໍຊັ້ນນຳຂອງປະເທດໄທອີກດ້ວຍ.
ຂ່າວ-ພາບ: ສະຖານທູດໄທ