ວາລະສານອາລຸນໃໝ່ ໄປຢ້ຽມຢາມ ແລະ ເຮັດວຽກກັບວາລະສານຊິວສື

ການເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້, ເພື່ອສືບຕໍ່ຈັດຕັ້ງຜັນຂະຫຍາຍຄວາມເປັນເອກະພາບຂອງການນໍາຂັ້ນສູງລະຫວ່າງສອງພັກ, ສອງລັດທີ່ໄດ້ມີການຕົກລົງເຫັນດີນໍາກັນ ໃນການເພີ່ມທະວີການແລກປ່ຽນ, ຖອດຖອນບົດຮຽນຊຶ່ງກັນ ແລະ ກັນ ລະຫວ່າງວາລະສານອະລຸນໃໝ່ ແລະ ວາລະສານຊິວສື ດ້ວຍຮູບແບບແລກປ່ຽນຢ້ຽມຢາມ ຊຶ່ງກັນ ແລະ ກັນ; ທັງເປັນການຟື້ນຟູສາຍພົວພັນຮ່ວມມື ທີ່ເປັນມູນເຊື້ອຂອງສອງວາລະສານ, ເພີ່ມພູນຄູນສ້າງຄວາມສາມັກຄີມິດຕະພາບອັນດີງາມ, ຍົກລະດັບການຄົ້ນຄວ້າ, ຮ່ວມມືໃນຂົງເຂດແນວຄິດ-ທິດສະດີ ກໍຄືການເຜີຍແຜ່ໂຄສະນາສຶກສາອົບຮົມກ້າວສູ່ລວງເລິກ ແລະ ກວ້າງຂວາງກວ່າເກົ່າ; ປະກອບສ່ວນໃນການເສີມຂະຫຍາຍສາຍພົວພັນທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ກໍຄືການຈັດຕັ້ງປະຕິບັດແຜນແມ່ບົດຄູ່ຮ່ວມຊາຕາກຳລາວ-ຈີນ, ຈີນ-ລາວ ໃຫ້ເປັນຮູບປະທໍາ ແລະ ເກີດດອກອອກຜົນໃນທຸກດ້ານ.

ໂອກາດນີ້, ທັງສອງຝ່າຍໄດ້ແຈ້ງສະພາບລວມທີ່ພົ້ນເດັ່ນໂດຍຫຍໍ້ຂອງສອງປະເທດໃຫ້ກັນຮັບຊາບ ແລະ ໄດ້ຍົກໃຫ້ເຫັນບົດບາດຄວາມສຳຄັນຂອງທັງສອງວາລະສານ ຊຶ່ງເປັນວາລະສານທິດສະດີຂອງສູນກາງພັກ, ເປັນກະບອກສຽງ-ເປັນສື່ມວນຊົນຂອງພັກ; ພ້ອມດຽວກັນນັ້ນ, ຍັງໄດ້ມີການສົນທະນາ, ແລກປ່ຽນບົດຮຽນດ້ານວິຊາສະເພາະ, ວຽກງານວາລະສານກໍຄືບາງຫົວຂໍ້ທີ່ສົນໃຈຕັ້ງຂຶ້ນຢ່າງກົງໄປກົງມາ, ມີລັກສະນະສ້າງສັນ, ໄດ້ທັງເນື້ອໃນ ແລະ ມີບັນຍາກາດຟົດຟື້ນ. ທັງສອງຝ່າຍໄດ້ຕີລາຄາສູງ ແລະ ເອກະພາບໃນໝາກຜົນການຮ່ວມມືໄລຍະຜ່ານມາ; ພ້ອມນີ້, ກໍຢືນຢັນຈະສືບຕໍ່ອອກແຮງເສີມຂະຫຍາຍການພົວພັນຮ່ວມມືນໍາກັນເປັນຕົ້ນແມ່ນສືບຕໍ່ແລກປ່ຽນຂໍ້ມູນຂ່າວສານ ແລະ ບັນດາບົດຂຽນເພື່ອໂຄສະນາຈັດພິມເຜີຍແຜ່ໃນຜະລິດຕະພັນຂອງຕົນ, ແລກປ່ຽນປຶ້ມວາລະສານ, ຮ່ວມກັນຄົ້ນຄວ້າປັບປຸງເນື້ອໃນບົດບັນທຶກຊ່ວຍຈໍາການຮ່ວມມືສອງຝ່າຍເພື່ອກ້າວໄປເຖິງການລົງນາມໃນອະນາຄົດ.

ນອກນັ້ນ, ຄະນະຜູ້ແທນວາລະສານອະລຸນໃໝ່ຍັງໄດ້ໄປພົບປະແລກປ່ຽນບົດຮຽນກັບວາລະສານແນວໜ້າຂອງນະຄອນຫຼວງປັກກິ່ງ ແລະ ໄດ້ເດີນທາງໄປເຄື່ອນໄຫວເຮັດວຽກຢູ່ນະຄອນຊົງຊິງ; ພ້ອມທັງ, ໄດ້ໄປຢ້ຽມຊົມຫໍພິພິທະພັນ, ສະຖານທີ່ທາງດ້ານປະຫວັດສາດ ແລະ ວັດທະນະທໍາຂອງ ສປ ຈີນ ອີກດ້ວຍ.

(ແຫຼ່ງຂ່າວ: ວາລະສານອາລຸນໃໝ່)