 |
ເປັນກຽດໃນພິທີ ມີທ່ານ ທອງລີ ສີສຸລິດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ແລະ ໃນນາມປະທານກິດຕິມະສັກ, ທ່ານນາງ ມຸກດາວັນ ສີສຸລິດ ຫົວໜ້າກົມອົງການຈັດຕັ້ງສາກົນ ກະຊວງການຕ່າງປະເທດ, ທັງເປັນຫົວໜ້າກອງເລຂາປະທານ ຄຊກລ ແລະ ເລຂາຊາວໜຸ່ມກະຊວງການຕ່າງປະເທດ, ມີບັນດາທ່ານເອກອັກຄະລັດຖະທູດ, ທູຕານຸທູດ, ຜູ້ຕາງໜ້າບັນດາອົງການເຄືອຄ່າຍ ສປຊ, ອົງການປະຕິບັດງານ ແລະ ຕາງໜ້ານັກສຶກສາ, ຊາວໜຸ່ມ, ເຍົາວະຊົນຈາກໂຮງຮຽນມັດຖະຍົມສົມບູນຈໍານວນ 5 ແຫ່ງເຂົ້າຮ່ວມ ຫຼາຍກວ່າ 400 ທ່ານ.
ໃນໂອກາດດັ່ງກ່າວ, ທ່ານ ທອງລີ ສີສຸລິດ ໄດ້ໃຫ້ກຽດກ່າວເປີດພິທີຢ່າງເປັນທາງການ; ວັນທີ 4 ເມສາ ເປັນວັນສາກົນວ່າດ້ວຍການສົ່ງເສີມຄວາມຮັບຮູ້ ແລະ ການຊ່ວຍເຫຼືອວຽກງານແກ້ໄຂບັນຫາລະເບີດບໍ່ທັນແຕກ ຊຶ່ງຖືກປະກາດໂດຍອົງການສະຫະປະຊາຊາດ ໃນປີ 2005 ໂດຍມີເປົ້າໝາຍເພື່ອປູກຈິດສຳນຶກກ່ຽວກັບຄວາມອັນຕະລາຍຂອງລະເບີດບໍ່ທັນແຕກ ແລະ ລະດົມທຶນເຂົ້າໃນການແກ້ໄຂບັນຫາດັ່ງກ່າວໃນທົ່ວໂລກ ໂດຍສະເພາະປະເທດທີ່ໄດ້ຮັບຜົນກະທົບຈາກລະເບີດດັ່ງກ່າວ. ການສະເຫຼີມສະຫຼອງປີນີ້ ແມ່ນໄດ້ຈັດຂຶ້ນພາຍໃຕ້ຫົວຂໍ້: “ລົງທຶນເພື່ອສັນຕິພາບ, ລົງທຶນໃສ່ການແກ້ໄຂບັນຫາລະເບີດບໍ່ທັນແຕກ” (Invest in Peace, Invest in Mine Action), ປີນີ້ຢູ່ ສປປ ລາວ ໄດ້ສົ່ງເສີມການມີສ່ວນຮ່ວມຂອງໄວໜຸ່ມ ແລະ ເປີດໂອກາດໃຫ້ຊາວໜຸ່ມໄດ້ສຳຜັດກັບວຽກງານຕົວຈິງໃນຂະແໜງ ລບຕ ໂດຍຜ່ານການສາທິດທາງດ້ານເຕັກນິກ ແລະ ການສຳມະນາໃຫ້ຄວາມຮູ້ຈາກບັນດາທີມງານວິຊາການຂອງອົງການປະຕິບັດງານ, ພ້ອມທັງໄດ້ເຂົ້າຮ່ວມສາທິດການສໍາຫຼວດກວດກູ້ລະເບີດບໍ່ທັນແຕກ (UXO Clearance) ຕົວຈິງ ເພື່ອສະແດງໃຫ້ເຫັນເຖິງຂັ້ນຕອນການສໍາຫຼວດ ແລະ ມາດຕະຖານຄວາມປອດໄພທີ່ເຂັ້ມງວດໃນການເຮັດໃຫ້ເນື້ອທີ່ດິນປອດໄພເພື່ອມອບຄືນໃຫ້ຊຸມຊົນ. ຜູ້ເຂົ້າຮ່ວມຍັງໄດ້ເຂົ້າຮ່ວມກອງປະຊຸມສຳມະນາກ່ຽວກັບຄວາມເປັນມາຂອງວຽກງານ ລບຕ ໃນລາວ, ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຫຼື CCM, ການໂຄສະນາຜົນກະທົບ ລບຕ (EORE) ແລະ ການຊ່ວຍເຫຼືອຜູ້ເຄາະຮ້າຍ (VA) ເປັນຕົ້ນ.
ພິເສດ, ພາຍໃນງານ, ຍັງໄດ້ມີການປະກາດຢ່າງເປັນທາງການ ຂະບວນການສົ່ງເສີມການມີສ່ວນຮ່ວມຂອງຊາວໜຸ່ມໃນການປະກອບສ່ວນເປັນກະບອກສຽງໃນການແກ້ໄຂບັນຫາ ລບຕ ພາຍໃຕ້ຫົວຂໍ້:“ ສຽງຜ່ານຍຸກສະໄໝ: ສ້າງຄວາມເຂັ້ມແຂງໃຫ້ແກ່ຊາວໜຸ່ມ-ເຍົາວະຊົນລາວໃນວຽກງານການຫຼຸດຜ່ອນອາວຸດເພື່ອມະນຸດສະທຳ” ແລະ ທັງເປັນໂອກາດຊຸກຍູ້ຂໍ່ານັບຮັບຕ້ອນການເປັນປະທານ ແລະ ເຈົ້າພາບຈັດກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານຮອບວຽນທີ 3 (3RCCCM) ທີ່ຈະຈັດຂຶ້ນ ໃນລະຫວ່າງ ວັນທີ 13-18 ກັນຍາ 2026 ທີ່ນະຄອນຫຼວງວຽງຈັນ ອີກດ້ວຍ.
ຈຸດປະສົງການຈັດງານມື້ນີ້, ທ່ານນາງ ມຸກດາວັນ ສີສຸລິດ ໄດ້ເນັ້ນໜັກວ່າ: ຊາວໜຸ່ມລາວຄື: “ກຳລັງແຮງທີ່ແທ້ຈິງ” ແລະ ເປັນ “ກະບອກສຽງອັນສຳຄັນ” ໃນການສົ່ງຕໍ່ຂໍ້ຄວາມແຫ່ງຄວາມມຸ່ງມາດປາຖະໜາເຖິງອະນາຄົດທີ່ປອດໄພ, ສົດໃສ ແລະ ປາສະຈາກຄວາມຢ້ານກົວຈາກລະເບີດບໍ່ທັນແຕກທີ່ຕົກຄ້າງປາງສົງຄາມ. ພ້ອກກັນນັ້ນ, ການທີ່ ສປປ ລາວ ໄດ້ຮັບກຽດເປັນເຈົ້າພາບ ແລະ ປະທານກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານຮອບວຽນທີ 3 (3RC CCM) ປຽບເໝືອນ “ການກັບຄືນສູ່ບ້ານ” (Coming Home) ຂອງສົນທີສັນຍາດັ່ງກ່າວ, ເນື່ອງຈາກນະຄອນຫຼວງວຽງຈັນ ແມ່ນສະຖານທີ່ ທີ່ໄດ້ຈັດກອງປະຊຸມຄັ້ງທຳອິດ ຂອງລັດພາຄີຂອງສົນທິສັນຍາດັ່ງກ່າວ ແລະ ສປປ ລາວ ຍັງເປັນໜຶ່ງໃນປະເທດທຳອິດທີ່ໄດ້ຊຸກຍູ້ການສ້າງຕັ້ງ ແລະ ຮັບຮອງສົນທິສັນຍາສະບັບນີ້.
ການເປັນເຈົ້າພາບ ແລະ ການເປັນປະທານ 3RC CCM ຄັ້ງນີ້ ຍັງຈະເປັນການຍົກບົດບາດການນໍາພາຂອງ ສປປ ລາວ ໃນວຽກງານມະນຸດສະທໍາ ແລະ ຍົກລະດັບການຮ່ວມມືສາກົນໃນວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ, ພ້ອມທັງຊຸກຍູ້ໃຫ້ວົງຄະນະຍາດສາກົນ ສືບຕໍ່ໃຫ້ການຮ່ວມມື ແລະ ສະໜັບສະໜູນປະກອບສ່ວນທັງດ້ານທຶນຮອນ ແລະ ເຕັກນິກທີ່ຈໍາເປັນໃນການແກ້ໄຂບັນຫາທີ່ສະລັບສັບຊ້ອນ ແລະ ສິ່ງທ້າທາຍຂອງລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໃຫ້ມີປະສິດທິພາບ ແລະ ປະສິດທິຜົນທີ່ດີຂຶ້ນກວ່າເກົ່າ, ທັງນີ້ກໍເພື່ອຮັບປະກັນຄວາມປອດໄພ ຂອງປະຊາຊົນບັນດາເຜົ່າ ແລະ ເຮັດໃຫ້ສາມາດບັນລຸເປົ້າໝາຍການພັດທະນາແບບຍືນຍົງກໍຄືເປົ້າໝາຍການພັດທະນາໂດຍລວມຂອງປະເທດ.
ຄຽງຄູ່ກັບຂະບວນການສົ່ງເສີມການມີສ່ວນຮ່ວມຂອງຊາວໜຸ່ມລະດັບຊາດ, ໂອກາດນີ້, ກອງເລຂາປະທານ ຄຊກລ ໄດ້ປະກາດການປະກວດແຕ້ມຮູບທົ່ວປະເທດ, ໂດຍໄດ້ເຊີນຊວນໃຫ້ຊາວໜຸ່ມສົ່ງຜົນງານແຕ້ມຮູບດ້ວຍມື ພາຍໃຕ້ຫົວຂໍ້: “Messages to the Past and Future: ຂໍ້ຄວາມຈາກອະດີດເຖິງອະນາຄົດ” ຊຶ່ງຈະເປີດຮັບຜົນງານຈົນເຖິງວັນທີ 19 ກໍລະກົດ 2026, ໂດຍຊຸກຍູ້ໃຫ້ນັກສິລະປິນ, ເຍົາວະຊົນ ແລະ ຊາວໜຸ່ມລາວ, ອາຍຸລະຫວ່າງ 9-35 ປີ, ຮ່ວມກິດຈະກໍາ, ຜູ້ຖືກຄັດເລືອກຈະໄດ້ຮັບທຶນການສຶກສາສູງສຸດເຖິງ 10 ລ້ານກີບ ແລະ ພິເສດຍັງຈະໄດ້ເຂົ້າຮ່ວມງານກັບຕົວແທນຊາວໜຸ່ມຈາກສາກົນ ເພື່ອສ້າງສັນຜົນງານສິລະປະ ໃສ່ປອກລູກຫວ່ານ ທີ່ປອດໄພແລ້ວເພື່ອເປັນສັນຍາລັກແຫ່ງສັນຕິພາບ ແລະ ວາງສະແດງຜົນງານຂອງຕົນໃຫ້ແກ່ບັນດາຜູ້ແທນ ແລະ ການນໍາລະດັບສູງທີ່ຈະມາເຂົ້າຮ່ວມກອງປະຊຸມ 3RC CCM ທີ່ຈະຈັດຂຶ້ນ ໃນລະຫວ່າງວັນທີ 13-18 ກັນຍາ2026 ທີ່ນະຄອນຫຼວງວຽງຈັນ.
(ຂ່າວ: ແສງຈັນ)
ຄໍາເຫັນ