 |
ພາຍຫຼັງ ທີ່ໄດ້ຮັບຟັງການລາຍງານ, ການຕີລາຄາຄືນ, ຜົນສຳເລັດການພົວພັນຮ່ວມມືຮອບດ້ານ ຂອງທັງສອງຝ່າຍ ໃນໄລຍຜ່ານມາ ໃຫ້ກັນ ແລະ ກັນໄດ້ຮັບຊາບ, ເພື່ອເປັນການສືບຕໍ່ການພົວພັນຮ່ວມມື ນັບຈາກນີ້ຮອດ 2030 ທັງສອງຝ່າຍ ໄດ້ເປັນເອກະພາບກັນສືບຕໍ່ພົວພັນຮ່ວມມືຫຼາຍດ້ານ ໂດຍສະເພາະ ເພີ່ມທະວີການແລກປ່ຽນຂໍ້ມູນຂ່າວສານ ແລະ ແລກປ່ຽນບົດຮຽນໃນຂົງເຂດວຽກງານການ ກໍ່ສ້າງພັກ, ລະບົບການເມືອງ ໂດຍຜັດປ່ຽນກັນຈັດກອງປະຊຸມພົບປະຄະນະຜູ້ແທນລະດັບສູງ ແລະ ຄະນະຜູ້ແທນພະແນກການ, ສ້າງເງື່ອນໄຂໃຫ້ບັນດາອົງການພັກ, ອົງການປົກຄອງ, ອົງການຈັດຕັ້ງມະຫາຊົນ, ພະແນກການ ແລະ ທ້ອງຖິ່ນຂອງທັງສອງຝ່າຍທີ່ໄດ້ຮ່ວມມື, ແລກປ່ຽນບົດຮຽນ ແລະ ຊ່ວຍເຫຼືອເຊິ່ງກັນ ແລະ ກັນ, ຊ່ວຍສະໜອງຂໍ້ມູນ, ແນະນໍາໂອກາດການຮ່ວມມື, ການລົງທຶນ ນະໂຍບາຍໃຫ້ແກ່ນັກທຸລະກິດຂອງທັງສອງຝ່າຍ, ຜັດປ່ຽນກັນຈັດກອງປະຊຸມຮອບວຽນ, ກອງປະຊຸມສໍາມະນາ ເພື່ອສົ່ງເສີມການລົງທຶນ, ການຄ້າ, ອໍານວຍຄວາມສະດວກໃນການໂຄສະນາຜະລິດຕະພັນທ່າແຮງບົ່ມຊ້ອນ ໃນງານວາງສະແດງສິນຄ້າພາຍໃນ ແລະ ສາກົນ, ສົ່ງເສີມພັດທະນາການທ່ອງທ່ຽວ, ການຂົນສົ່ງທາງບົກ, ສຳຫຼວດທ່າແຮງການທ່ອງທ່ຽວຮ່ວມກັນ, ເຊື່ອມໂຍງການຄົມມະນາຄົມຂອງສອງແຂວງ, ສືບຕໍ່ສອງຝ່າຍປະສານງານກັນໃນການຈັດກິດຈະກຳແລກປ່ຽນວັດທະນະທຳ, ແລກປ່ຽນພົບປະ, ຍົກສູງຄຸນນະພາບດ້ານຊັບພະຍາກອນມະນຸດຂອງສອງແຂວງ ແລະ ຮ່ວມມືສຶກສາຄົ້ນຄວ້າ, ນໍາໃຊ້ວິທະຍາສາດ ແລະ ເຕັກໂນໂລຊີ ທີ່ທັນສະໄໝ ເພື່ອຫັນໄປສູ່ລະບົບດີຈີຕອນ.
 |
ຈາກນັ້ນ, ທັງສອງຝ່າຍ ກໍໄດ້ຮ່ວມລົງນາມເຊັນບົດບັນທຶກ ການພົວພັນຮ່ວມມືກັນ ໂດຍ ແຂວງເຊກອງ ແມ່ນທ່ານ ບຸນຫຼາຍ ບຸດທິດ ແລະ ທ່ານ ຫງວຽນ ວັນ ເຟືອງ, ມີທ່ານ ບຸນທະວີ ນະຄອນສິດ ຮອງປະທານຄະນະກຳມະການປົກຄອງແຂວງເຊກອງ, ທ່ານ ຮວາງ ນາມ ຮອງປະທານຄະນະກຳມະການປະຊາຊົນແຂວງກວາງຈິ ໂດຍມີຄະນະນຳ, ຂະແໜງການກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ໂອກາດນີ້, ທ່ານ ຫງວຽນ ວັນ ເຟືອງ ຍັງໄດ້ມອບເງິນຈຳນວນ 500.000.000 ດົ້ງ (ສະກຸນເງິນຫວຽດນາມ) ໃຫ້ແຂວງເຊກອງ ເພື່ອຊຸກຍູ້ສົ່ງເສີມເຂົ້າໃນການພັດທະນາແຂວງເຊກອງ.
(ຂ່າວ: ອັດສະວິນ)
ຄໍາເຫັນ