ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ທີ່ຂື້ນກັບກະຊວງກະສິກໍາ ແລະ ປ່າໄມ້ ແມ່ນສູນໜຶ່ງ ທີ່ສ້າງຂຶ້ນບົນເນື້ອໃນຈິດໃຈຂອງສອງປະມຸກລັດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກໄທ ໃນວັນທີ 8 ເມສາ ປີ 1994. ມີສະຖານທີ່ຕັ້ງຢູ່ ບ້ານ ນາຍາງ, ເມືອງ ນາຊາຍທອງ, ນະຄອນຫຼວງວຽງຈັນ. ສູນດັ່ງກ່າວໄດ້ເປັນສັນຍາລັກແຫ່ງການຮ່ວມມື ທາງດ້ານວິຊາການກ່ຽວກັບວຽກງານກະສິກໍາ ຂອງ 2 ຊາດ ລາວ-ໄທ, ເຊິ່ງມີຈຸດປະສົງເພື່ອເສີມສ້າງສາຍພົວພັນ ການຮ່ວມມື, ແລກປ່ຽນ ວັດທະນະທໍາ ແລະ ຮີດຄອງປະເພນີອັນດີງາມຖານບ້ານໃກ້ເຮືອນຄຽງ ບ້ານພີ່ ເມືອງນ້ອງ ທີ່ມີມາແຕ່ດົນນານນັ້ນ ໃຫ້ເກີດດອກອອກຜົນຍິ່ງໆຂຶ້ນເວົ້າລວມ ເວົ້າສະເພາະແມ່ນການບໍລິການເຕັກນິກກະສິກຳ ດ້ວຍການນຳເອົາບົດຮຽນຜົນສຳເລັດຕົວຈິງໃນການພັດທະນາເຕັກນິກ, ເຕັກໂນໂລຊີດ້ານກະສິກຳຂອງຣາຊະອານາຈັກໄທ ມາສາທິດ ຖ່າຍທອດ ທາງດ້ານທິດສະດີ ແລະ ພາກປະຕິບັດຕົວຈິງກັບທີ່ ໃຫ້ນັກວິຊາການ, ຊາວກະສິກອນ, ຜູ້ປະກອບການ ແລະ ນັກຮຽນ-ນັກສຶກສາ ໃນ ສປປ ລາວ.
ເນື່ອງໃນໂອກາດຄົບຮອບ 30 ປີ ໃນການສ້າງຕັ້ງສູນແຫ່ງນີ້, ຂໍເຊີນຊວນບັນດາທ່ານ, ພະນັກງານ, ລັດຖະກອນ, ທະຫານ, ຕໍາຫຼວດ, ຊາວກະສິກອນ, ນັກທຸລະກິດ ເຂົ້າຮ່ວມສະເຫຼີມສະຫຼອງງານດັ່ງກ່າວ ເຊິ່ງໃນງານນີ້ຈະມີກິດຈະກໍາການສໍາມະນາດ້ານວິຊາການຫຼາຍຫົວຂໍ້ເຊັ່ນ: ການບໍລິຫານຈັດການກຸ່ມຜູ້ນໍາໃຊ້ນໍ້າຊົນລະປະທານ, ວຽກງານພັດທະນາການລ້ຽງສັດ, ວຽກງານປະມົງ ແລະ ວຽກງານພັດທະນາທີ່ດິນ ນໍາສະເໜີໂດຍທີມງານຝ່າຍລາວ ແລະ ຝ່າຍໄທ ພ້ອມນີ້ ກໍຈະມີການວາງສະແດງ, ຈໍາໜ່າຍຜົນຜະລິດ ແລະ ຜະລິດຕະພັນກະສິກໍາລາວ ທີ່ຫຼາກຫຼາຍ ຈາກບັນດາກິດຈະກໍາການຜະລິດຂອງສູນ, ຄອບຄົວຕົວແບບ, ບັນດາທຸລະກິດດ້ານກະສິກໍາ ທີ່ມາຈາກໝູ່ບ້ານອ້ອມຂ້າງສູນ ແລະ ຜູ້ປະກອບການດ້ານກະສິກໍາຕ່າງໆ ໃຫ້ບັນດາທ່ານໄດ້ຢ້ຽມຊົມ, ຮຽນຮູ້ ແລະ ເລືອກຊື້. ງານດັ່ງກ່າວຈະຈັດຂື້ນໃນລະຫວ່າງວັນທີ 12-14 ມັງກອນ 2024 ນີ້ ທີ່ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ບ້ານນາຍາງ, ເມືອງນາຊາຍທອງ, ນະຄອນຫຼວງວຽງຈັນ.
ສໍາລັບວາລະການສໍາມະນາຈະຈັດຂື້ນໃນວັນທີ 13 ມັງກອນ 2024 ເວລາ 8:30-16:30 ໂມງ,ຜູ້ສົນໃຈສາມາດແຈ້ງລົງທະບຽນເຂົ້າຮ່ວມຮັບຟັງການສໍາມະນາໄດ້ທີ່ໜ້າງານ ຫຼື ລົງທະບຽນຜ່ານທາງອອນລາຍhttps://forms.gle/kgK3bjTZXLEFs6tv8ສອບຖາມເພີ່ມຕື່ມໄດ້ທີ່ 020 5827 4699 ນ. ພອນພຸດ ວົງມະນີ ຮອງຂະແໜງສົ່ງເສີມ-ຝຶກອົບຮົມ.
ຄໍາເຫັນ