ຄະນະຜູ້ແທນແຂວງຊຽງຂວາງນຳໂດຍທ່ານ ໜໍບີ ຫາຕົ່ງປາວ ຮອງເລຂາພັກແຂວງ ຜູ້ຊີ້ນຳວຽກວຽກງານການເມືອງແນວຄິດ ພ້ອມດ້ວຍຄະນະ ໄດ້ເດີນທາງໄປນະຄອນຈ້າວທົ້ງ ແຂວງຢຸນໜານ ສປຈີນ ເພື່ອລົງນາມສັນຍາວ່າດ້ວຍການສ້າງສາຍພົວພັນມິດຕະພາບ ລະຫ່ວາງ ແຂວງຊຽງຂວາງ ສປປລາວ ແລະ ນະຄອນຈ້າວທົ້ງ ແຂວງຢຸນໜານ ສປຈີນ, ຢູ່ທີ່ໂຮງແຮມເວີນເຕີມູ້ ນະຄອນຈ້າວທົ້ງ, ຝ່າຍແຂວງຊຽງຂວາງລົງນາມໂດຍທ່ານ ໜໍບີ ຫາຕົ່ງປາວ, ຝ່າຍແຂວງນະຄອນຈ້າວທົ້ງ ລົງນາມໂດຍທ່ານ ຖາງຢວນ ຮອງເລຂາພັກ ນະຄອນຈ້າວທົ້ງ ໂດຍຊ້ອງໜ້າຄະນະຜູ້ແທນທັງສອງຝ່າຍ.
ເນື້ອໃນການລົງນາມຮ່ວມມືຄັ້ງນີ້, ທັງສອງຝ່າຍເຫັນດີຊຸກຍູ້ ສົ່ງເສີມແລກປ່ຽນ ແລະ ຮ່ວມມືກັນຫຼາຍຮູບແບບ ຫຼາຍລະດັບ ໃນຂົງເຂດເສດຖະກິດ-ການຄ້າ, ວິທະຍາສາດເຕັກໂນໂລຊີ, ການສຶກສາ, ສາທາລະນະສຸກ, , ວັດທະນະທຳ, ການພັດທະນາຊັບພະຍາກອນມະນຸດ, ບົນພື້ນຖານສາຍພົວພັນຄູ່ຍຸດທະສາດຮ່ວມມືຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການສ້າງຄູ່ຮ່ວມສະຕາກຳລາວ-ຈີນ ຊຸກຍູ້ການພົວພັນຮ່ວມມືຂອງສອງທ້ອງຖິ່ນໃຫ້ແໜ້ນແຟ້ນຍິ່ງຂຶ້ນ.
ໂອກາດນີ້, ຄະນະຜູ້ແທນແຂວງຊຽງຂວາງ ໄດ້ເຂົ້າຮ່ວມພິທີເປີດຊຸດອົບຮົມວິທະຍາໄລວິຊາຊີບຈ້າວທົ້ງ-ເຕັກນິກວິຊາຊີບແຂວງຊຽງຂວາງ, ຢ້ຽມຢາມໂຮງງານ ແລະ ສວນໝາກໂປ່ມຂອງບໍລິສັດ ຊ້າວເຢ້ຍເຂດຈ້າວຢາງ, ໂຮງງານປຸງແຕ່ງມັນຝຼັ່ງ, ຢ້ຽມຢາມໂຮງງານຂອງບໍລິສັດຢຸນອາລູມີນຽມຮາຍຊິນອາລູມີນຽມຈຳກັດ, ການຝຶກຊ້ອມກູ້ໄພທາງນ້ຳແຫ່ງຊາດ (ຈ້າວທົ້ງ), ບ້ານຢຸນຈິງມ້ຽວຈ່າຍເມືອງຢີຫຼຽນ.
(ຂ່າວ: ບຸນມີແສງທຸມມີ)
ຄໍາເຫັນ