 |
ການເລືອກຕັ້ງ ສສຊ ແລະ ສະມາຊິກສະພາປະຊາຊົນຂັ້ນແຂວງ (ສສຂ) ເປັນສ່ວນໜຶ່ງໃນການປັບປຸງ, ບູລະນະກົງຈັກການຈັດຕັ້ງ ແລະ ບຸກຄະລາກອນ ໃນລະບົບການເມືອງ ຢູ່ຂັ້ນສູນກາງ ແລະ ຂັ້ນທ້ອງຖິ່ນ ເພື່ອເຮັດໃຫ້ມີຄວາມເຂັ້ມແຂງ, ໜັກແໜ້ນ ສາມາດປະຕິບັດໜ້າທີ່ການເມືອງໃນໄລຍະໃໝ່ ຢ່າງມີປະສິດທິພາບ ແລະ ປະສິດທິຜົນ. ສະນັ້ນ, ການເລືອກຕັ້ງ ແມ່ນໜ້າທີ່ການເມືອງ, ເປັນຄວາມຮັບຜິດຊອບຂອງພັກ, ລັດ ແລະ ທຸກພາກສ່ວນ ທັງສູນກາງ ຮອດທ້ອງຖິ່ນ ເພື່ອປະກອບສ່ວນເຂົ້າໃນການກະກຽມ ແລະ ດຳເນີນການເລືອກຕັ້ງ ພ້ອມທັງປຸກລະດົມປະຊາຊົນລາວບັນດາເຜົ່າເຂົ້າຮ່ວມ ໃຫ້ເປັນຂະບວນຟົດຟື້ນ ຖືເອົາການເລືອກຕັ້ງເປັນຄືປາງບຸນໃຫຍ່ຂອງຊາດ ດຳເນີນໄປດ້ວຍບັນຍາກາດເບີກບານມ່ວນຊື່ນ ຮັບປະກັນໄດ້ 4 ຄາດໝາຍຄື: ເຂົ້າຮ່ວມການປ່ອນບັດຢ່າງຄົບຖ້ວນ, ປ່ອນບັດຖືກຕາມລະບຽບ, ມີຄວາມໂປ່ງໃສ ແລະ ຮັບປະກັນຄວາມສະຫງົບ.
 |
ການລົງໂຄສະນາຫາສຽງນີ້, ຜູ້ສະໜັກຮັບເລືອກຕັ້ງ ໄດ້ມີການສະເໜີຊື່, ແນະນຳຕົນເອງ ແລະ ປະຫວັດການເຄື່ອນໄຫວຂອງຕົນໂດຍຫຍໍ້ ເພື່ອໃຫ້ປະຊາຊົນໄດ້ຮັບຮູ້ ແລະ ທຳຄວາມເຂົ້າໃຈ ຕາມລຳດັບຄື: ທ່ານ ມອນໄຊ ລາວມົວຊົ່ງ ກຳມະການສູນກາງພັກຮອງປະທານສູນກາງແນວລາວສ້າງຊາດ ຜູ້ສະໝັກຮັບເລືອກຕັ້ງ ນໍ້າເບີ 1 ແລະ ນໍ້າເບີ 3 ທ່ານ ນາງ ຄຳສີ ສິດທິວໍລະດາ ຄະນະປະຈຳພັກແຂວງຫົວໜ້າຄະນະໂຄສະນາອົບຮົມແຂວງ, ນໍ້າເບີ 7 ທ່ານ ຄຳເພັດ ດວງມາລາ ກຳມະການພັກແຂວງຮອງປະທານຄະນະກວດກາພັກ ອົງການກວດກາລັດ, ນໍ້າເບີ 8 ທ່ານ ນິກອນ ນາມມະໄຊ ຮອງຫົວໜ້າອົງການໄອຍະການປະຊາຊົນແຂວງ, ນໍ້າເບີ 9 ທ່ານ ດົວຊົ່ງ ເລຍໂກ້ ຫົວໜ້າພະແນກວັດທະນະທຳ ແລະ ການທ່ອງທ່ຽວແຂວງ, ຊຶ່ງແຕ່ລະທ່ານກໍລ້ວນແລ້ວແຕ່ມີຄວາມຮູ້, ຄວາມສາມາດ, ມີມາດຖານ ແລະ ເງືອນໄຂຄົບຖ້ວນ. ພ້ອມດຽວກັນນັ້ນ ຜູ້ສະໜັກຮັບເລືອກຕັ້ງ ໄດ້ຝາກເຖິງປະຊາຊົນບັນດາເຜົ່າ, ພົນລະເມືອງລາວທຸກຄົນ ໂດຍບໍ່ຈຳແນກເພດ, ເຜົ່າ, ຖານະທາງດ້ານເສດຖະກິດ-ສັງຄົມ, ຄວາມເຊື່ອຖື, ສາສະໜາ, ທີ່ຕັ້ງພູມລຳເນົາ ລ້ວນແຕ່ມີສິດປ່ອນບັດເລືອກຕັ້ງ ນັບແຕ່ອາຍຸ 18 ປີຂຶ້ນໄປ ໂດຍມີມາດຕະຖານຄົບຖ້ວນຕາມກົດໝາຍ. ພ້ອມນັ້ນ ໃນຕອນບ່າຍຂອງວັນດຽວກັນ ຜູ້ແທນສະໝັກຮັບເລືອກຕັ້ງ 5 ທ່ານ ໄດ້ລົງເຄື່ອນໄຫວໂຄສະນາຫາສຽງ ພົບປະ ປະຊາຊົນ ຢູ່ຕາແສງນາໂພ ເມືອງລ້ອງຊານ ຕື່ມອີກ. ສະນັ້ນ, ຈຶ່ງຂໍເຊີນຊວນປະຊາຊົນລາວບັນດາເຜົ່າພ້ອມຈິດພ້ອມໃຈໄປປ່ອນບັດເລືອກຕັ້ງໃນວັນທີ 22 ກຸມພາ 2026 ທີ່ຈະມາເຖິງນີ້ດ້ວຍ.
(ຂ່າວ: ສີລິພອນ ສົງຄຳ)
ຄໍາເຫັນ