 |
ພິທີມອບ-ຮັບຈັດຂຶ້ນໃນວັນທີ 3 ມິຖຸນານີ້ ທີ່ບໍລິສັດລາວຄາຍຢວນໂດຍມີ ທ່ານ ສົມວິໄຊ ວົງທິລາດ ຫົວໜ້າພະແນກອຸດສາຫະກຳ ແລະ ການຄ້າແຂວງຄຳມ່ວນ, ພ້ອມດ້ວຍພາກສ່ວນກ່ຽວຂ້ອງຂັ້ນແຂວງ, ເມືອງ ແລະ ການຈັດຕັ້ງຈາກ 7 ບ້ານເຂົ້າຮ່ວມ.
ທ່ານ ຫວັງປິງ ຮອງຜູ້ອໍານວຍການບໍລິສັດກ່າວວ່າ: ຕະຫຼອດໄລຍະທີ່ຜ່ານມາ ບໍລິສັດໄດ້ຢຶດໝັ້ນໃນແນວຄິດ “ຮ່ວມໃຈພັດທະນາ, ແບ່ງປັນຜົນປະໂຫຍດ, ຮ່ວມກັນເຕີບໃຫຍ່” ພ້ອມທັງສືບຕໍ່ປະຕິບັດພັນທະດ້ານສັງຄົມ ແລະ ຮ່ວມມືກັບທ້ອງຖິ່ນໃນການພັດທະນາຊຸມຊົນຢ່າງຕໍ່ເນື່ອງ. ນັບຕັ້ງແຕ່ເຂົ້າມາດຳເນີນທຸລະກິດໃນແຂວງຄຳມ່ວນ ບໍລິສັດໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ໂດຍໄດ້ມອບພາສີ ແລະ ອາກອນໃຫ້ລັດຖະບານລາວຫຼາຍກວ່າ 200 ລ້ານໂດລາ, ສ້າງວຽກເຮັດງານທຳໃຫ້ແຮງງານຫຼາຍກວ່າ 10,000 ຄົນ ແລະ ລົງທຶນກວ່າ 11 ລ້ານໂດລາ ໃນໂຄງການພັດທະນາສັງຄົມທ້ອງຖິ່ນ. ການມອບປຸ໋ຍໃນຄັ້ງນີ້ ຖືເປັນອີກໜຶ່ງກິດຈະກຳສຳຄັນທີ່ສະແດງໃຫ້ເຫັນເຖິງຄວາມມຸ່ງໝັ້ນຂອງບໍລິສັດໃນການສົ່ງເສີມການຜະລິດກະສິກຳ, ສ້າງລາຍຮັບໃຫ້ແກ່ປະຊາຊົນ ແລະ ຮ່ວມພັດທະນາຊຸມຊົນໃຫ້ມີຄວາມເຂັ້ມແຂງ ແລະ ຍືນຍົງ. ພ້ອມກັນນີ້ ບໍລິສັດຍັງໄດ້ຢືນຢັນຈະສືບຕໍ່ລົງທຶນໃນດ້ານສາທາລະນະປະໂຫຍດ, ການພັດທະນາຊົນນະບົດ ແລະ ການສົ່ງເສີມການຜະລິດກະສິກຳ ເພື່ອສ້າງຄຸນນະພາບຊີວິດທີ່ດີຂຶ້ນໃຫ້ແກ່ປະຊາຊົນໃນເຂດໂຄງການ ແລະ ພື້ນທີ່ໃກ້ຄຽງຕໍ່ໄປ.
ໂອກາດດັ່ງກ່າວນີ້ ບໍລິສັດ ລາວຄາຍຢວນບໍ່ແຮ່ ຈຳກັດ ຍັງໄດ້ມອບກອງທຶນພັດທະນາບ້ານປະຈຳປີ 2026ຈຳນວນ 70 ລ້ານກີບ ໃຫ້ແກ່ 7 ບ້ານ ເພື່ອນໍາໄປໃຊ້ໃນການພັດທະນາທ້ອງຖິ່ນ ແລະ ສາທາລະນະປະໂຫຍດ.
 |
ທ່ານ ສົມວິໄຊ ວົງທິລາດ ໄດ້ສະແດງຄວາມຂອບໃຈຕໍ່ການຊ່ວຍເຫຼືອສັງຄົມຂອງບໍລິສັດ ບໍ່ວ່າໃນໄລຍະຜ່ານມາກໍຄືປັດຈຸບັນ, ພ້ອມທັງໄດ້ຮຽກຮ້ອງມາຍັງການຈັດຕັ້ງບ້ານ ໃນ 7 ບ້ານທີ່ໄດ້ຮັບເອົາການຊ່ວຍເຫຼືອໃນຄັ້ງນີ້ ຈົ່ງໄດ້ນໍາເອົາຜົນການຊ່ວຍເຫຼືອດັ່ງກ່າວ ໄປແຈກຢາຍໃຫ້ປະຊາຊົນໃນຂອບເຂດບ້ານຂອງຕົນ ເພື່ອນໍາໃຊ້ເຂົ້າໃນການຜະລິດກະສິກຳໃຫ້ໄດ້ຮັບໝາກຮັບຜົນ ແລະ ມີປະສິດທິພາບສູງ ເຮັດໃຫ້ຊີວິດການເປັນຢູ່ນັບມື້ໄດ້ຮັບການພັດທະນາດີຂຶ້ນ.
ຂ່າວ: ມະນີວັນ
ຄໍາເຫັນ