 |
ໃນໂອກາດດັ່ງກ່າວ, ທ່ານ ບຸນເຫຼືອ ພັນດານຸວົງ ໄດ້ສະແດງຄວາມຊົມເຊີຍຕໍ່ທ່ານເອກອັກຄະລັດຖະທູດ ທີ່ໄດ້ສໍາເລັດການປະຕິບັດໜ້າທີ່ການທູດ ຢູ່ ສປປ ລາວ ຢ່າງຈົບງາມ, ຕະຫຼອດໄລຍະທີ່ຜ່ານມາທ່ານທູດໄດ້ເຄື່ອນໄຫວຢ່າງຫ້າວຫັນ ອັນໄດ້ປະກອບສ່ວນທີ່ສໍາຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ລາວ-ມາເລເຊຍ, ທັງໄດ້ຊຸກຍູ້ສົ່ງເສີມການພົວພັນຮ່ວມມືລະຫວ່າງ 2 ປະເທດ ໃນຂົງເຂດຕ່າງໆເປັນຕົ້ນດ້ານການສຶກສາ, ການຄ້າ-ການລົງທຶນ, ການທ່ອງທ່ຽວ ແລະ ດ້ານອື່ນໆ ພ້ອມທັງເຊື່ອໝັ້ນວ່າ ພາຍຫຼັງສໍາເລັດໜ້າທີ່ກັບຄືນປະເທດແລ້ວ, ທ່ານທູດຍັງຈະສືບຕໍ່ໃຫ້ການສະໜັບສະໜູນ ແລະ ຊຸກຍູ້ການພົວພັນຮ່ວມມືລາວ-ມາເລເຊຍໃນຕໍ່ໜ້າ ພ້ອມນັ້ນ, ທ່ານ ບຸນເຫຼືອ ພັນດານຸວົງ ຍັງໄດ້ຢືນຢັນຄືນຄວາມໝາຍໝັ້ນໃນການຊຸກຍູ້ສົ່ງເສີມການພົວພັນຮ່ວມມືດ້ານພັກ ລະຫວ່າງ ພັກ ປປ ລາວ ກັບ ບັນດາພັກການເມືອງໃນມາເລເຊຍ ເພື່ອປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມື ລະຫວ່າງ 2 ປະເທດໃຫ້ຂະຫຍາຍຕົວຍິ່ງໆຂຶ້ນ.
ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈເປັນຢ່າງສູງທີ່ໄດ້ມີໂອກາດເຂົ້າຢ້ຽມຂໍ່ານັບອໍາລາ ທ່ານຫົວໜ້າຄະນະພົວພັນຕ່າງປະເທດສູນກາງພັກ, ຕີລາຄາສູງຕໍ່ການພົວພັນຮ່ວມມືລະຫວ່າງ 2 ປະເທດ ມາເລເຊຍ-ລາວ ໃນໄລຍະຜ່ານມາກໍຄືປັດຈຸບັນ, ສະແດງຄວາມຂອບໃຈຕໍ່ພັກ, ລັດຖະບານ ສປປ ລາວ ກໍຄື ຄະນະພົວພັນຕ່າງປະເທດສູນກາງພັກ ທີ່ຍາມໃດກໍໃຫ້ການສະໜັບສະໜູນຊ່ວຍເຫຼືອສະຖານທູດມາໂດຍຕະຫຼອດ ເຮັດໃຫ້ສະຖານທູດສໍາເລັດໜ້າທີ່ອັນສໍາຄັນທຸກຢ່າງທີ່ປະເທດຊາດມອບໝາຍໃຫ້ ພ້ອມທັງຢືນຢັນວ່າ ພາຍຫຼັງກັບຄືນປະເທດແລ້ວ ບໍ່ວ່າຢູ່ໃນຖານະໃດກໍຕາມ, ຕົນເອງຈະສືບຕໍ່ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງ ມາເລເຊຍ - ສປປ ລາວ ໃຫ້ນັບມື້ແຕກດອກອອກຜົນຍິ່ງໆຂຶ້ນ ໂດຍການຊຸກຍູ້ພາກສ່ວນກ່ຽວຂ້ອງຂອງມາເລເຊຍໃນການເພີ່ມທະວີການພົວພັນຮ່ວມມື ກັບ ສປປ ລາວ ໃຫ້ຫຼາຍຂຶ້ນ.
ໃນຕອນທ້າຍ, ທ່ານຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ, ປະສົບຜົນສຳເລັດໃນໜ້າທີ່ວຽກງານໃໝ່ ແລະສືບຕໍ່ເປັນຂົວຕໍ່ເຊື່ອມມິດຕະພາບທີ່ດີງາມ ລະຫວ່າງ 2 ປະເທດ ລາວ-ມາເລເຊຍ ໃຫ້ນັບມື້ໄດ້ຮັບການເສີມຂະຫຍາຍຍິ່ງໆຂຶ້ນ.
(ຂ່າວ: ແສງຈັນ)
ຄໍາເຫັນ