ຫົວໜ້າ ຄຕພ ຕ້ອນຮັບຄະນະຜູ້ແທນດ້ານການທ່ອງທ່ຽວ ແຫ່ງ ສາທາລະນະລັດ ຕາຕາສະຖານ

ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນດ້ານການທ່ອງທ່ຽວ ຂອງ ສາທາລະນະລັດ ຕາຕາສະຖານສະຫະພັນຣັດເຊຍ ນໍາໂດຍ ທ່ານ ເຊີເກ ອີວານົບ ຫົວໜ້າກໍາມາທິການແຫ່ງລັດດ້ານການທ່ອງທ່ຽວ ແຫ່ງ ສາທາລະນະລັດ ຕາຕາສະຖານສະຫະພັນຣັດເຊຍ.

ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ ການຢ້ຽມຢາມລາວຂອງຄະນະຜູ້ແທນໃນຄັ້ງນີ້ ທີ່ໄດ້ເຄື່ອນໄຫວຢ່າງຫ້າວຫັນໃນການເສີມຂະຫຍາຍການຮ່ວມມືດ້ານການທ່ອງທ່ຽວ ລະຫວ່າງ ສາທາລະນະລັດ ຕາຕາສະຖານ ກໍຄື ສະຫະພັນຣັດເຊຍ ກັບ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ແໜ້ນແຟ້ນ ແລະ ມີໝາກຜົນຍິ່ງໆຂຶ້ນ, ໂດຍໄດ້ມີການລົງນາມສັນຍາຮ່ວມມືດ້ານການທ່ອງທ່ຽວນໍາກັນ ລະຫວ່າງ ບໍລິສັດທ່ອງທ່ຽວພັດທະນາຈໍາປາໃໝ່ ຂອງລາວ ແລະ ກຸ່ມບໍລິສັດທ່ອງທ່ຽວຂອງ ຕາຕາສະຖານ.

ຄຽງຄູ່ກັນນີ້, ທ່ານ ທອງສະຫວັນ ພົມວິຫານ ຍັງໄດ້ແຈ້ງໃຫ້ຊາບກ່ຽວກັບພາລະບົດບາດຂອງ ຄະນະພົວພັນຕ່າງປະເທດສູນກາງພັກ ໂດຍສະເພາະການປະກອບສ່ວນຊຸກຍູ້ສາຍພົວພັນຮ່ວມມືລະຫວ່າງປະເທດ ທາງສາຍພັກ, ສາຍລັດ ແລະ ວຽກງານການທູດປະຊາຊົນ, ພ້ອມທັງໄດ້ຕີລາຄາການພົວພັນຮ່ວມມື ລາວ-ຣັດເຊຍ ໃນໄລຍະຜ່ານມາ ກໍຄື ໃນໄລຍະໃໝ່ ໂດຍສະເພາະສົ່ງເສີມການຮ່ວມມືດ້ານເສດຖະກິດ, ການຄ້າ, ການລົງທຶນ, ພະລັງງານ, ການສຶກສາ, ວິທະຍາສາດ-ເຕັກນິກ, ການທ່ອງທ່ຽວ ແລະ ອື່ນໆ ຊຶ່ງໄດ້ຍົກໃຫ້ເຫັນວ່າ ໃນປີ 2023 ຜ່ານມາ ມີນັກທ່ອງທ່ຽວຣັດເຊຍ ເຂົ້າມາລາວເຫັນວ່າຍັງບໍ່ທັນຫຼາຍ ຖ້າທຽບໃສ່ປະເທດອື່ນ, ເຫັນຄວນສືບຕໍ່ຊຸກຍູ້ວຽກງານດັ່ງກ່າວໃຫ້ມີທ່າອ່ຽງເພີ່ມຂຶ້ນໃນອະນາຄົດ ພ້ອມທັງຄົ້ນຄວ້າເປີດຖ້ຽວບິນກົງ ລະຫວ່າງ ລາວ-ຣັດເຊຍ ຄືນໃໝ່. ຫົວໜ້າຄະນະພົວພັນ ຍັງໄດ້ຖືໂອກາດນີ້ ເຊື້ອເຊີນ ແລະ ຍິນດີຕ້ອນຮັບ ນັກທ່ອງທ່ຽວຈາກ ສຣັດເຊຍ ກໍຄືຈາກ ສາທາລະນະລັດ ຕາຕາສະຖານ ເຂົ້າມາທ່ອງທ່ຽວລາວ ໃຫ້ຫຼາຍຂຶ້ນ.

ທ່ານ ເຊີເກ ອີວານົບ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງຫົວໜ້າ ຄຕພຊຶ່ງເປັນການຢ້ຽມຢາມລາວ ຄັ້ງທໍາອິດ ແລະ ເຫັນດີເປັນເອກະພາບຕໍ່ການຕີລາຄາການຮ່ວມມື ລະຫວ່າງ ສອງປະເທດ ລາວ-ຣັດເຊຍ ທີ່ໄດ້ຮັບການເສີມຂະຫຍາຍຢ່າງຮອບດ້ານ, ໃນນັ້ນ ກໍມີດ້ານການທ່ອງທ່ຽວ. ພ້ອມກັນນີ້, ທ່ານ ເຊີເກ ອີວານົບ ຍັງໄດ້ກ່າວວ່າ ສປປ ລາວ ເປັນປະເທດທີ່ມີທ່າແຮງບົ່ມຊ້ອນຫຼາຍດ້ານ ແລະ ມີແຫຼ່ງທ່ອງທ່ຽວທາງປະຫວັດສາດ-ທໍາມະຊາດອັນສວຍສົດງົດງາມ ທີ່ດຶງດູດນັກທ່ອງທ່ຽວຈາກທົ່ວທຸກມູມໂລກ ແລະ ເຊື່ອໝັ້ນວ່າ ການທ່ອງທ່ຽວລາວ ຈະເຕີບໃຫຍ່ຂະຫຍາຍຕົວ ແລະ ພັດທະນາຍິ່ງໆຂຶ້ນໃນຕໍ່ໜ້າ ພ້ອມທັງສະແດງຄວາມຍິນດີຄົ້ນຄວ້າທ່າແຮງການຮ່ວມມືລະຫວ່າງ ລັດຕາຕາສະຖານ ກັບ ສປປ ລາວ ໃນດ້ານອື່ນໆຕື່ມອີກ.

ໃນຕອນທ້າຍ, ຫົວໜ້າຄຕພໄດ້ອວຍພອນໃຫ້ ທ່ານ ເຊີເກ ອີວານົບ ພ້ອມຄະນະຜູ້ແທນດ້ານການທ່ອງທ່ຽວ ຂອງ ສາທາລະນະລັດ ຕາຕາສະຖານ, ສະຫະພັນຣັດເຊຍ ຈົ່ງປະສົບຜົນສໍາເລັດໃນການເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.(ຂ່າວ: ຄຕພ, ພາບ: ສຸກສະຫວັນ)