 |
ເຄືອຈັກກະພົບ ບາຮາມາສ ໄດ້ຮັບເອກະລາດໃນວັນທີ 10 ກໍລະກົດ 1973 ຈາກປະເທດອັງກິດ, ມີນະຄອນຫຼວງຊື່ວ່າ ນັສເຊົາ (Nassau). ບາຮາມາສ ມີລະບົບການປົກຄອງແບບເຄືອຈັກກະພົບ ໂດຍມີກະສັດອັງກິດເປັນປະມຸກລັດ ຊຶ່ງມີຜູ້ສໍາເລັດຣາຊະການ ເປັນຜູ້ຕາງໜ້າ ແລະ ນາຍົກລັດຖະມົນຕີເປັນຫົວໜ້າລັດຖະບານ; ບາຮາມາສ ເປັນປະເທດເກາະດອນ ປະກອບດ້ວຍເກາະດອນໃຫຍ່ ແລະ ນ້ອຍກວ່າ 700 ດອນ, ມີເນື້ອທີ່ທັງໝົດ: 13,943 ກິໂລຕາແມັດ; ຕັ້ງຢູ່ມະຫາສະໝຸດອັດລັງຕິກ; ມີປະຊາກອນ ປະມານ 412,628 ຄົນ; ພາສາທາງການ: ອັງກິດ, ນັບຖືສາສະໜາຄຣິສ ເປັນສ່ວນໃຫຍ່ (ໂປຣແຕັສແຕັງ, ກາໂຕລິກ) ແລະ ຖືສາສະໜາອື່ນໆ ແລະ ໃຊ້ສະກຸນເງິນ: Bahamian dollar (BSD). ລາຍໄດ້ສະເລ່ຍຕໍ່ຫົວຄົນຕໍ່ປີ ປະມານ 35,257 ໂດລາ(2024). ທ່າແຮງດ້ານເສດຖະກິດທີ່ສຳຄັນ ແມ່ນການທ່ອງທ່ຽວ (ປະມານ 11 ລ້ານຄົນໃນປີ 2024), ການບໍລິການດ້ານການເງິນ, ສາຂາສະຖາບັນການເງິນທີ່ສໍາຄັນຂອງໂລກຈໍານວນໜຶ່ງ ແລະ ອື່ນໆ.
ເຄືອຈັກກະພົບ ບາຮາມາສ ໄດ້ເຂົ້າເປັນສະມາຊິກອົງການສະຫະປະຊາຊາດ ໃນວັນທີ 18 ກັນຍາ 1973, ໃນຖານະທີ່ເປັນສະມາຊິກຂອງສະຫະປະຊາຊາດ, ບາຮາມາສ ໄດ້ປະກອບສ່ວນຢ່າງຫ້າວຫັນໃນຂົງເຂດຕ່າງໆຂອງ ສປຊ ລວມທັງ ເປັນສະມາຊິກຂອງ ສະພາເສດຖະກິດ-ສັງຄົມ ສປຊ (ECOSOC) ການລົງສະໝັກເປັນສະມາຊິກບໍ່ຖາວອນສະພາຄວາມໝັ້ນຄົງຂອງອົງການສະຫະປະຊາຊາດ ສໍາລັບສົກປີ 2032-2033 ຊຶ່ງສະແດງໃຫ້ເຫັນຄວາມມຸ່ງໝັ້ນທີ່ຈະປະກອບສ່ວນການເຄື່ອນໄຫວໃນຂອບວຽກ ອົງການ ສປຊ ຢ່າງຕັ້ງໜ້າ ເພື່ອເຮັດບົດບາດປະກອບສ່ວນການແກ້ໄຂບັນຫາຕ່າງໆ ເຊັ່ນ: ສະພາບການປ່ຽນແປງດິນຟ້າອາກາດ ແລະ ການແກ້ໄຂບັນຫາດ້ານການພັດທະນາຂອງບັນດາປະເທດທີ່ເກາະດອນນ້ອຍກຳລັງພັດທະນາ (SIDS). ນອກຈາກນັ້ນ, ຍັງມີບົດບາດການເຄື່ອນໄຫວຢ່າງຫ້າວຫັນໃນນາມເປັນສະມາຊິກຂອງ ຂະບວນການບໍ່ຮ່ວມກຸ່ມ NAM ແລະ ກຸ່ມ G77 ແລະ ສປ.ຈີນ.
 |
ໃນໂອກາດດຽວກັນນີ້, ທັງສອງຝ່າຍ ຍັງໄດ້ຢືນຢັນຄືນໃນການສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມືໃນດ້ານຕ່າງໆໃນຕໍ່ໜ້າ, ລວມທັງ ການສະໜັບສະໜູນເຊິ່ງກັນ ແລະ ກັນ ໃນເວທີສາກົນ. ປັດຈຸບັນ, ສປປ ລາວ ພວມເຮັດໜ້າທີ່ເປັນສະມາຊິກສະພາບໍລິຫານອົງການ ອຸຍນີເຊັບ ແລະ ສະພາບໍລິຫານງານກຸ່ມປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ (LLDCs). ການສ້າງຕັ້ງສາຍພົວພັນການທູດຄັ້ງນີ້ ເປັນການປະກອບສ່ວນໃຫ້ແກ່ການຈັດຕັ້ງປະຕິບັດແນວທາງການຕ່າງປະເທດ ຂອງ ສປປ ລາວ “ສັນຕິພາບ, ເອກະລາດ, ມິດຕະພາບແລະການຮ່ວມມື” ອັນສະເໝີຕົ້ນສະເໝີປາຍ ຂອງ ສປປ ລາວ ແລະ ເຮັດໃຫ້ສປປ ລາວ ມີສາຍພົວພັນການທູດກັບຕ່າງປະເທດເພີ່ມຂຶ້ນເປັນ 153ປະເທດ ໃນທົ່ວໂລກ.
(ຂ່າວ: ກຕທ)
ຄໍາເຫັນ