ຄະນະຜູ້ແທນຫ້ອງການພົວພັນຕ່າງປະເທດ ແຂວງຢຸນນານ ຢ້ຽມຢາມແຂວງບໍ່ແກ້ວ

ການເດີນທາງມາຢ້ຽມຢາມຄັ້ງນີ້, ຄະນະຜູ້ແທນຫ້ອງການພົວພັນຕ່າງປະເທດແຂວງຢຸນນານ ໄດ້ເຂົ້າຢ້ຽມຂໍ່ານັບ ທ່ານ ເຄື່ອນເພັດ ວົງຈັນ ຮອງເຈົ້າແຂວງບໍ່ແກ້ວ; ໂອກາດນີ້, ທ່ານຮອງເຈົ້າແຂວງບໍ່ແກ້ວກ່າວວ່າ: ພາຍໃຕ້ກົນໄກການຮ່ວມມືພາກເໜືອ ສປປ ລາວ-ແຂວງຢຸນນານ, ສປ ຈີນ ນັ້ນ, ການຮ່ວມມືລະຫວ່າງແຂວງບໍ່ແກ້ວ ແລະ ແຂວງຢຸນນານໄດ້ຮັບຄວາມຄືບໜ້າໃໝ່ເລື້ອຍໆ, ຂອບເຂດການຮ່ວມມືນັບມື້ນັບກວ້າງຂວາງ ແລະ ເລິກເຊິ່ງ. ແຂວງບໍ່ແກ້ວ ມີ “ສະໜາມບິນສາກົນບໍ່ແກ້ວ” ແລະ ເຂດເສດຖະກິດພິເສດ ສາມຫຼ່ຽມຄໍາ ຊຶ່ງມີທ່າແຮງດ້ານການລົງທຶນ ແລະ ການພັດທະນາທີ່ດີ, ການລົງທຶນຂອງປະຊາຊົນຈີນ ໄດ້ກາຍເປັນແຫຼ່ງລົງທຶນຂອງຕ່າງປະເທດທີ່ໃຫຍ່ທີ່ສຸດຂອງແຂວງບໍ່ແກ້ວ; ສໍາລັບການລົງທຶນ ແມ່ນໄດ້ກວມເອົາຂົງເຂດກະສິກໍາ, ພະລັງງານ ແລະ ແຮ່ທາດ, ອຸດສາຫະກໍາການຄ້າ, ການບໍລິການ, ການທ່ອງທ່ຽວ ແລະ ອື່ນໆ. ພ້ອມນີ້, ທ່ານ ຮອງເຈົ້າແຂວງບໍ່ແກ້ວ ຍັງໄດ້ສະແດງຄວາມຫວັງເປັນຢ່າງຍິ່ງວ່າ ທັງສອງແຂວງຈະສືບຕໍ່ຮັກສາການພົວພັນພົບປະ ແລະ ແລກປ່ຽນບົດຮຽນ ລະຫວ່າງ ຄະນະຜູ້ແທນລະດັບສູງ ແລະ ວິຊາການຢ່າງເປັນປົກກະຕິ, ພ້ອມທັງສືບຕໍ່ສະໜັບສະໜູນ ແລະ ຮ່ວມມືໃນຂົງເຂດພື້ນຖານໂຄງລ່າງ, ຊັບພະຍາກອນມະນຸດ, ກະສິກໍາ, ທ່ອງທ່ຽວ, ຄວາມສະຫງົບ ແລະ ຂົງເຂດອື່ນໆຂອງແຂວງບໍ່ແກ້ວ.

ນອກນີ້, ຄະນະດັ່ງກ່າວ ຍັງໄດ້ເຄື່ອນໄຫວລົງສໍາຫຼວດສຶກສາເຂດເສດຖະກິດພິເສດ ສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໂດຍໄດ້ຢ້ຽມຢາມສະຖານທີ່ກະສິກໍາ, ສູນການຂົນສົ່ງ, ສະໜາມກ໊ອຟພູກິ່ວລົມ, ໂຮງຮຽນປະຖົມດອກງິ້ວສາມຫຼ່ຽມຄໍາ, ດ່ານສາກົນສາມຫຼ່ຽມຄໍາ ແລະ ສະຖານທີ່ອື່ນໆ, ພ້ອມທັງໄດ້ເປີດກອງປະຊຸມສຶກສາ ແລະ ສໍາຫຼວດ ໂດຍການເຮັດວຽກກັບ ທ່ານ ບຸນທອງ ແສງສີກອງ ຫົວໜ້າອົງການຄຸ້ມຄອງ-ບໍລິຫານເຂດເສດຖະກິດພິເສດ ສາມຫຼ່ຽມຄໍາ ພ້ອມດ້ວຍບັນດາພະແນກການທີ່ກ່ຽວຂ້ອງ. ກອງປະຊຸມຄັ້ງນີ້, ທ່ານ ບຸນທອງ ແສງສີກອງ ໄດ້ລາຍງານກ່ຽວກັບສະພາບການພັດທະນາຂອງເຂດເສດຖະກິດພິເສດ ສາມຫຼ່ຽມຄໍາ ໃນໄລະຍະເວລາ 18 ປີທີ່ຜ່ານມາ ແລະ ອະທິບາຍລາຍລະອຽດ ກ່ຽວກັບກົນໄກການຄຸ້ມຄອງເຂດເສດຖະກິດພິເສດຂອງລັດຖະບານ ເປັນຕົ້ນແມ່ນມາດຕະການຕ້ານອາຊະຍາກໍາຂ້າມຊາດ, ຊຸກຍູ້ການຫັນເປັນອຸດສາຫະກໍາ, ຮັກສາຄວາມສະຫງົບປອດໄພ, ຄວາມໝັ້ນຄົງ ແລະ ຄວາມສະຖຽນລະພາບຂອງພາກພື້ນ. ນອກນັ້ນ, ຜູ້ຮັບຜິດຊອບຂອງພະແນກການທີ່ກ່ຽວຂ້ອງ ຍັງໄດ້ແນະນໍາກ່ຽວກັບການຈັດຕັ້ງວາງແຜນ ແລະ ການປະຕິບັດວຽກງານຂອງເຂດເສດຖະກິດພິເສດ ສາມຫຼ່ຽມຄໍາ ໃນຂົງເຂດກະສິກໍາ, ການທ່ອງທ່ຽວ, ການຂົນສົ່ງ ແລະ ການຄ້າ ລວມທັງການເປັນເຂດເສດຖະກິດພິເສດລະດັບຊາດ ທີ່ລັດຖະບານ ສປປ ລາວ ແລະ ວິສາຫະກິດ ສປ ຈີນ ຮ່ວມກັນສ້າງຕັ້ງຂຶ້ນ ແລະ ຄວາມມຸ່ງໝັ້ນທີ່ຈະສ້າງແບບຢ່າງການຮ່ວມມືໃນພາກພື້ນ ພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”.

 ຂະນະທີ່, ທ່ານ ເສີນ ຢົງເຈ ໄດ້ໃຫ້ຄວາມເຫັນວ່າ: ຜ່ານການສຶກສາ ແລະ ສໍາຫຼວດ, ຄະນະຜູ້ແທນໄດ້ມີຄວາມເຂົ້າໃຈຢ່າງຈະແຈ້ງ ກ່ຽວກັບສະພາບຂອງເຂດເສດຖະກິດພິເສດ ສາມຫຼ່ຽມຄໍາ ແລະ ຮູ້ສຶກດີໃຈຕໍ່ກັບບັນດາໝາກຜົນທີ່ເຂດເສດຖະກິດພິເສດ ສາມຫຼ່ຽມຄໍາ ບັນລຸໄດ້ໃນໄລຍະຊຸ່ມປີບໍ່ດົນມານີ້ ແລະ ມີຄວາມເຊື່ອໝັ້ນຕໍ່ເຂດເສດຖະກິດພິເສດ ສາມຫຼ່ຽມຄໍາ ໃນອະນາຄົດຢ່າງສຸດໃຈ; ພ້ອມດຽວກັນນີ້, ກໍໄດ້ສະແດງຄວາມເຊື່ອໝັ້ນວ່າ: ພາຍໃຕ້ການນໍາພາຂອງລັດຖະບານ ສປປ ລາວ ນັ້ນ, ການພັດທະນາໃນອະນາຄົດຂອງເຂດເສດຖະກິດພິເສດ ສາມຫຼ່ຽມຄໍາ ຈະກ້າວເຂົ້າສູ່ໄລຍະໃໝ່.

(ຂ່າວ-ພາບ: ຫ້ອງການໂຄສະນາ ເຂດເສດຖະກິດ ສາມຫຼ່ຽມຄໍາ)