ໄດ້ເຄື່ອນໄຫວຢ້ຽມຢາມ-ພົບປະ ແລະ ເຮັດວຽກຮ່ວມກັບນະຄອນໂຮ່ຈິມິນ ສສ ຫວຽດນາມ ໃນລະຫວ່າງວັນທີ 13-19 ພະຈິກ ນີ້ ໂດຍການຕ້ອນຮັບຈາກ ສະຫາຍ ຟານ ວັນ ໝາຍ ກໍາມະການສູນກາງພັກ ປະທານຄະນະກໍາມະການປະຊາຊົນນະຄອນໂຮ່ຈິມິນ, ມີສະຫາຍ ວັນໄຊ ແກ້ວວິໄລ ຕາງໜ້າກົງສຸນໃຫຍ່ ແຫ່ງ ສປປ ລາວ ປະຈໍານະຄອນໂຮ່ຈິມິນ ພ້ອມດ້ວຍຄະນະຜູ້ແທນຂັ້ນສູງຂອງນະຄອນໂຮ່ຈິມິນ ໃຫ້ກຽດຕ້ອນຮັບ.
ໃນໄລຍະເຄື່ອນໄຫວຢ້ຽມຢາມນະຄອນໂຮ່ຈິມິນ, ຄະນະຜູ້ແທນຂັ້ນສູງແຂວງສະຫວັນນະເຂດ ໄດ້ຢ້ຽມຢາມສູນຜະລິດພັນເຂົ້າ ແລະ ພັນພືດຂອງບໍລິສັດແນວພັນພືດພາກໃຕ້ (SSC) ຊຶ່ງເປັນບໍລິສັດທີ່ມີຊື່ສຽງ ແລະ ໄດ້ຮັບການສ້າງຕັ້ງຂຶ້ນໃນປີ 1976 ແລະ ໃນປີ 2002 ໄດ້ມີການປັບປຸງຈາກເງິນລົງທຶນ 60 ລ້ານດົງ ຂຶ້ນເປັນ 150 ລ້ານດົງໃນປັດຈຸບັນ. ຈາກນັ້ນ, ຄະນະຜູ້ແທນຂັ້ນສູງແຂວງສະຫວັນນະເຂດ ແລະ ນະຄອນໂຮ່ຈິມິນ ກໍໄດ້ເຂົ້າຮ່ວມພິທີພົບປະກັນຢ່າງເປັນທາງການ. ໂອກາດນີ້, ສະຫາຍ ບຸນໂຈມ ອຸບົນປະເສີດ ແລະ ສະຫາຍ ຟານ ວັນ ໝາຍ ກໍໄດ້ທົບທວນຄືນການຮ່ວມມືຮອບດ້ານ ແລະ ຄວາມສາມັກຄີແບບພິເສດ ລະຫວ່າງສອງພັກ, ສອງລັດ ແລະ ປະຊາຊົນທັງສອງຊາດ ລາວ-ຫວຽດນາມ ໃນໄລຍະຜ່ານມາ ເວົ້າລວມ, ເວົ້າສະເພາະກໍແມ່ນ ຄະນະການນຳຂັ້ນສູງແຂວງສະຫວັນນະເຂດ ແລະ ຄະນະການນຳຂັ້ນສູງນະຄອນໂຮ່ຈິມິນ, ຊຶ່ງໄດ້ເປັນເອກະພາບທາງດ້ານເນື້ອໃນການຮ່ວມມື ໃນນີ້: ສອງຝ່າຍເຫັນດີສືບຕໍ່ ຜັນຂະຫຍາຍສາຍພົວພັນຮ່ວມມືຕາມເນື້ອໃນບົດບັນທຶກຊ່ວຍຈຳ ທີ່ໄດ້ລົງນາມຮ່ວມກັນ ສອງຝ່າຍສ້າງເງື່ອນໄຂອຳນວຍຄວາມສະດວກໃຫ້ແກ່ບັນດາ ອົງການຈັດຕັ້ງພັກ, ອົງການປົກຄອງ, ພະແນກການ, ຂະແໜງການ ແລະ ບັນດາອົງການຈັດຕັ້ງມະຫາຊົນຂອງແຕ່ລະຝ່າຍ ໄດ້ເດີນທາງໄປ-ມາ, ຢ້ຽມຢາມ, ແລກປ່ຽນບົດຮຽນເຊິ່ງກັນ ແລະ ກັນ. ນະຄອນໂຮ່ຈິມິນ ຍິນດີຊ່ວຍກໍ່ສ້າງຊັບພະຍາກອນມະນຸດເພີ່ມຕື່ມ ຈາກທີ່ມອບທຶນການສຶກສາ ໃຫ້ແຂວງສະຫວັນນະເຂດ 30 ທຶນຕໍ່ປີ ໃນລະດັບປະລິນຍາຕີ, ປະລິນຍາໂທ ແລະ ປະລິນຍາເອກ, ພ້ອມດຽວກັນນີ້ ນະຄອນໂຮ່ຈິມິນຈະສະໜັບສະໜູນ ໃນການຝຶກອົບຮົມພະນັກງານວິຊາການໃນຂະແໜງການຕ່າງໆ ທັງໄລຍະສັ້ນ ແລະ ໄລຍະຍາວໃນຂະແໜງການຕ່າງໆ. ເນື່ອງໃນໂອກາດການສະເຫຼີມສະຫຼອງ 3 ວັນປະຫວັດສາດໃນປີ 2025 ທີ່ຈະມາເຖິງນີ້ ນະຄອນໂຮ່ຈີມິນຍິນດີທີ່ຈະໃຫ້ການຊ່ວຍເຫຼືອຮ່ວມມືສ້າງຟີມສາລະຄະດີ ກ່ຽວກັບຄວາມໝາຍຄວາມສຳຄັນຂອງວັນດັ່ງກ່າວ ແລະ ໃນຕອນທ້າຍ, ນະຄອນໂຮ່ຈິມິນ ໄດ້ສະເໜີໃຫ້ນະຄອນໄກສອນພົມວິຫານ ແຮກສ່ຽວກັບເມືອງໃດ ເມື່ອງໜຶ່ງຂອງນະຄອນໂຮ່ຈິມິນ ຊຶ່ງການນຳທັງສອງຝ່າຍໄດ້ມອບໝາຍໃຫ້ຂະແໜງວິຊາການປຶກສາຫາລືກັນໃນລາຍລະອຽດຕໍ່ໄປ.
(ແຫຼ່ງຂ່າວ: ແຂວງສະຫວັນະເຂດ)
ຄໍາເຫັນ