ກອງປະຊຸມຖອດຖອນບົດຮຽນວຽກງານສື່ສານເພື່ອການປ່ຽນແປງພຶດຕິກຳ

ທ່ານ ວັນນະໄຊ ຊາດຕະກຸນ ໄດ້ກ່າວວ່າ: ກອງປະຊຸມທົບທວນວຽກງານສື່ສານລະດົມຊຸມຊົນກ່ຽວກັບ ວສຊ ໂປລີໂອ 2026 ຊຶ່ງເປັນກອງປະຊຸມທີ່ສໍາຄັນທີ່ຈະໄດ້ມາປຶກສາຫາລືໃນວຽກງານໂຄສະນາລະດົມຊຸມຊົນໃຫ້ມີຄວາມຮູ້ ຄວາມເຂົ້າໃຈໃນການກັນພະຍາດ ແລະ ສົ່ງເສີມສຸຂະພາບ ໂດຍສະເພາະແມ່ນການສ້າງຄວາມເຂົ້າໃຈກ່ຽວກັບວຽກງານການໃຫ້ວັກຊິນກັນພະຍາດຂອງເດັກນ້ອຍທີ່ມີອາຍຸຕ່ຳກວ່າ 5 ປີ ໃຫ້ໄດ້ຮັບວັກຊິນຄົບຕາມເກນອາຍຸ ແລະ ຄົບຕາມຕາຕະລາງການໃຫ້ວັກຊິນ; ວຽກງານສື່ສານລະດົມຊຸມຊົນ ຫຼື ທີ່ຮູ້ຈັກກັນໃນນາມວຽກງານໂຄສະນາສຸຂະສຶກສາເປັນວຽກງານທີ່ປູກຈິດສຳນຶກໃຫ້ປະຊາຊົນຊົນ, ຄົນໃນຊຸມຊົນມີຄວາມຮູ້, ຄວາມເຂົ້າໃຈ ແລະ ໃຫ້ຄວາມສຳຄັນໃນການຮັກສາສຸຂະພາບ ໂດຍປະຕິບັດພຶດຕິກຳການດຳລົງຊີວິດໃຫ້ຖືກສຸຂະລັກສະນະ ຊຶ່ງເປັນພື້ນຖານການປະຕິບັດອະນາໄມ 3 ສະອາດຄື: ກິນສະອາດ, ດື່ມສະອາດ, ຢູ່ສະອາດ, ໃນການກັນພະຍາດ ແລະ ສົ່ງເສີມສຸຂະພາບ ໜຶ່ງໃນນັ້ນກໍຄືເດັກນ້ອຍທີ່ເກີດມາຕ້ອງໄດ້ຮັບວັກຊິນໃຫ້ຄົບໂດສ ຕາມຕາຕະລາງການໃຫ້ວັກຊິນກັນພະຍາດແຫ່ງຊາດກ່ອນເດັກຈະອາຍຸໄດ້ 5 ປີ, ສິ່ງດັ່ງກ່າວຍັງເປັນບັນຫາ ແລະ ສິ່ງທ້າທາຍສຳລັບສາທາລະນະສຸກຍ້ອນພູມສັນຖານຂອງປະເທດເຊັ່ນ: ບ້ານເຮືອນຂອງປະຊາຊົນຕັ້ງຢູ່ເຂດຫ່າງໄກ, ເຂດທີ່ເຂົ້າເຖິງຍາກ, ພາສາປາກເວົ້າທີ່ແຕກຕ່າງກັນ, ຄວາມເຊື່ອດັ່ງເດີມ ລວມໄປເຖິງຄວາມບໍ່ເຊື່ອໝັ້ນຕໍ່ວັກຊິນ, ສັກແລ້ວລູກເຈັບ, ສັກແລ້ວລູກໄຂ້, ສັກແລ້ວຈະພາໃຫ້ລູກເສຍຊີວິດ ຫຼື ບໍ່ເຂົ້າໃຈວ່າສັກຢາກັນພະຍາດ, ສັກໄປເພື່ອຫຍັງ, ສັກຍ້ອນແພດມາສັກ, ສັກຍ້ອນມີແຈ້ງການຈາກການຈັດຕັ້ງ, ສິ່ງເຫຼົ່ານັ້ນແມ່ນຕິດພັນກັບວຽກງານສື່ສານໃນການລະດົມຊຸມຊົນ ຫຼື ການໂຄສະນາສຸຂະສຶກສາ ຈະຕ້ອງໄດ້ອອກແຮງເພື່ອສ້າງຄວາມເຊື່ອໝັ້ນກັບຊຸມຊົນເພື່ອເອົາຊະນະຕໍ່ກັບອຸປະສັກ ແລະ ຄວາມເຊື່ອຕ່າງໆທີ່ບໍ່ຖືກຕ້ອງຕໍ່ກັບວຽກງານການໃຫ້ວັກຊິນ ແລະ ເພື່ອເປັນການເພີ່ມອັດຕາປົກຄຸມວັກຊິນກັນພະຍາດ ໂດຍສະເພາະແມ່ນພະຍາດໂປລີໂອ ແລະ ພະຍາດໝາກແດງ, ທາງກະຊວງສາທາລະນະສຸກກໍຄືສູນສຸຂະພາບແມ່ ແລະ ເດັກ ຮ່ວມກັບຄູ່ຮ່ວມພັດທະນາ, ກໍໄດ້ຈັດຕັ້ງປະຕິບັດຂະບວນການຢອດວັກຊິນກັນພະຍາດ ໂປລີໂອ ແລະ ສັກວັກຊິນກັນພະຍາດໝາກແດງໃຫຍ່-ໝາກແດງນ້ອຍ ເພື່ອເພີ່ມພູມຄຸ້ມກັນໃຫ້ກຸ່ມເດັກອາຍຸລຸ່ມ 5 ປີ ໃນຂອບເຂດທົ່ວປະເທດ ແລະ ເພື່ອຮັບປະກັນໃຫ້ເດັກນ້ອຍໃນກຸ່ມເປົ້າໝາຍທຸກຄົນທັງໃນຕົວເມືອງ ແລະ ຊົນນະບົດໃຫ້ໄດ້ຮັບວັກຊິນທຸກຖ້ວນໜ້າໂດຍບໍ່ໃຫ້ມີເດັກຄົນໃດພາດໂອກາດ.

ທ່ານ ວັນນະໄຊ ຊາດຕະກຸນ ໄດ້ກ່າວຕື່ມວ່າ: ການລາຍງານກໍລະນີທີ່ພົບເຊື້ອພະຍາດ ໂປລີໂອ ແລະ ພະຍາດໝາກແດງໃນ ສປປ ລາວ ທີ່ຖືກຢັ້ງຢືນຈາກຫ້ອງວິເຄາະຈາກປະເທດຍີປຸ່ນ ແລະ ສູນວິເຄາະລະບາດວິທະຍາຂອງລາວ ໃນປີ 2025 ແລະ ໄດ້ຖືກປະກາດເປັນປະເທດທີ່ມີການລະບາດຂອງພະຍາດໂປລີໂອ. ນອກຈາກນັ້ນ, ໃນການເຂົ້າເຖິງເດັກທີ່ພາດໂອກາດ, ຄົວເຮືອນເຄື່ອນຍ້າຍ, ກຸ່ມຊົນເຜົ່າ ແລະ ກຸ່ມປະຕິເສດວັກຊິນຂອງບາງກຸ່ມ, ທົບທວນຄືນກ່ຽວກັບຄຸນນະພາບ ແລະ ຄວາມຈະແຈ້ງຂອງຂໍ້ຄວາມສຳຄັນຂອງການໂຄສະນາ ແລະ ການລະດົມຊຸມຊົນ ລວມທັງການນຳໃຊ້ໂປສເຕີ, ວິທະຍຸ, ໂທລະໂຄ່ງ, ສື່ສັງຄົມອອນລາຍ ແລະ ທັກສະການສື່ສານຕ່າງໆ ລວມທັງຈະພັດທະນາຮູບແບບໃໝ່ ຫຼື ນະວັດຕະກຳອັນໃໝ່ ແລະ ທັນສະໄໝ ເພື່ອໃຫ້ຂໍ້ມູນຂ່າວສານໄດ້ເຂົ້າເຖິງກຸ່ມເປົ້າໝາຍໂດຍໄວ ແລະ ມີຄຸນນະພາບ. ໃນຕະຫຼອດໄລຍະ 50 ປີຜ່ານມາ ການພັດທະນາ ສປປ ລາວ ແມ່ນໄດ້ຕິດພັນກັບການເຕີບໃຫຍ່ຂະຫຍາຍຕົວຂອງວຽກງານສາທາລະນະ, ພັກ ແລະ ລັດຖະບານ ແຫ່ງ ສປປ ລາວ ໄດ້ມີຄວາມພະຍາຍາມເອົາໃຈໃສ່ສົ່ງເສີມ ແລະ ເອົາໃຈໃສ່ໃນການຮັກສາສຸຂະພາບໃຫ້ແກ່ເດັກນ້ອຍທີ່ເກີດມາທຸກຄົນ ກໍຄືການກັນພະຍາດໃນການຫຼຸດຜ່ອນອັດຕາການເຈັບເປັນ ແລະ ການເສຍຊີວິດຈາກພະຍາດທີ່ສາມາດກັນໄດ້ດ້ວຍວັກຊິນ.

ຂ່າວ-ພາບ: ບຸນອູ້ມ