 |
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ມາເລເຊຍ ຕະຫຼອດໄລຍະ 60 ປີ ຜ່ານມາສືບຕໍ່ໄດ້ຮັບການພັດທະນາ ແລະ ເສີມຂະຫຍາຍໃຫ້ເລິກເຊິ່ງຍິ່ງໆຂຶ້ນໃນຫຼາຍຂົງເຂດການຮ່ວມມື, ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ບົດບາດອັນຕັ້ງໜ້າຂອງທ່ານທູດ ຕະຫຼອດໄລຍະ 3 ປີກວ່າຜ່ານມາດ້ວຍຜົນສໍາເລັດອັນຈົບງາມ ຊຶ່ງໄດ້ປະກອບສ່ວນອັນສໍາຄັນເຂົ້າໃນການເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ ມາເລເຊຍ ໂດຍສະເພາະແມ່ນ ດ້ານການເມືອງ, ເສດຖະກິດ, ການຄ້າ, ການລົງທຶນ, ການພັດທະນາຊັບພະຍາກອນມະນຸດ, ພະລັງງານສະອາດ, ການທ່ອງທ່ຽວ, ກະສິກໍາ, ທະນາຄານ, ການໄປມາຫາສູ່ລະຫວ່າງປະຊາຊົນສອງຊາດ ແລະ ອື່ນໆ ລວມທັງການສະໜັບສະໜູນຊຶ່ງກັນ ແລະ ກັນຢ່າງຕໍ່ເນື່ອງລະຫວ່າງສອງປະເທດທັງໃນຂອບສອງຝ່າຍ ແລະ ຫຼາຍຝ່າຍ ກໍຄືໃນຂອບອາຊຽນ ໂດຍສະເພາະການສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024 ທີ່ຜ່ານມາ. ສໍາລັບການຊ່ວຍເຫຼືອດ້ານການພັດທະນາຊັບພະຍາກອນມະນຸດ ຢູ່ ສປປ ລາວ ໂດຍຜ່ານການໃຫ້ທຶນຝຶກອົບຮົມ ແລະ ທຶນການສຶກສາພາຍໃຕ້ໂຄງການຮ່ວມມືດ້ານວິຊາການຂອງມາເລເຊຍ (MTCP: Malaysia Technical Cooperation Programme) ຊຶ່ງນັບແຕ່ປີ 1991 ມາເຖິງປັດຈຸບັນ ມີພະນັກງານລັດຖະກອນຈາກຂະແໜງການຕ່າງໆຂອງລາວ ເຂົ້າຮ່ວມຫຼາຍກ່ວາ 2000 ຄົນ. ນອກຈາກນີ້, ທ່ານທູດ ຍັງມີຜົນງານອັນພົ້ນເດັ່ນໃນຖານະເປັນຫົວໜ້າຄະນະທູດຕ່າງປະເທດ ປະຈໍາ ສປປ ລາວ ນັບແຕ່ວັນທີ 13 ມີນາ 2025 ເປັນຕົ້ນມາ ຊຶ່ງໄດ້ນໍາພາຄະນະທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ເດີນທາງຢ້ຽມຢາມ ແຂວງຫົວພັນ ແລະ ແຂວງບໍ່ແກ້ວ ເພື່ອຕິດຕາມສະພາບການພັດທະນາເສດຖະກິດ-ສັງຄົມ ແລະ ຊອກຫາທ່າແຮງໃນການຊຸກຍູ້ສົ່ງເສີມການຮ່ວມມືດ້ານການຄ້າ ແລະ ການລົງທຶນ ພ້ອມທັງໄດ້ຊ່ວຍອຳນວຍຄວາມສະດວກໃຫ້ແກ່ການລົງທຶນຂອງມາເລເຊຍໃນ ສປປ ລາວ ໂດຍສະເພາະແມ່ນການຈັດກອງປະຊຸມສຸດຍອດສະພາທຸລະກິດອາຊຽນ-ມາເລເຊຍ ຄັ້ງທີ 1 ຢູ່ ສປປ ລາວ ໃນທ້າຍປີຜ່ານນີ້. ພ້ອມດຽວກັນນັ້ນ, ທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຫວັງວ່າທ່ານທູດຈະສືບຕໍ່ຊຸກຍູ້, ສົ່ງເສີມນັກທຸລະກິດ ແລະ ນັກທ່ອງທ່ຽວມາເລເຊຍ ໃຫ້ເຂົ້າມາລົງທຶນ ແລະ ທ່ອງທ່ຽວ ຢູ່ສປປ ລາວ ໃຫ້ຫຼາຍຂຶ້ນ ໃນຊຸມປີຕໍ່ໜ້າ.
 |
ໃນໂອກາດດຽວກັນນີ້, ທ່ານທູດກໍໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະ ບານ ແລະ ປະຊາຊົນລາວ ໂດຍສະເພາະກະຊວງການຕ່າງປະເທດ ທີ່ໄດ້ອໍານວຍຄວາມສະດວກ ແລະ ການຊ່ວຍເຫຼືອ ໃຫ້ແກ່ການເຄື່ອນໄຫວໜ້າທີ່ການທູດຂອງຕົນຢູ່ ສປປ ລາວ ຈົນປະສົບຜົນສໍາເລັດຢ່າງຈົບງາມ, ສະແດງຄວາມປິຕິຍິນດີ ແລະ ຂອບໃຈຕໍ່ລັດຖະບານ ແຫ່ງ ສປປ ລາວ ເປັນຢ່າງຍິ່ງ ທີ່ເຫັນໄດ້ເຖິງຜົນງານ, ຍ້ອງຍໍຊົມເຊີຍ ແລະ ປະດັບຫຼຽນກາມິດຕະພາບອັນມີຄຸນຄ່າໃຫ້ແກ່ຕົນໃນຄັ້ງນີ້, ພ້ອມທັງຢືນຢັນວ່າຈະສືບຕໍ່ໃນການເປັນຂົວຕໍ່ປະສານງານປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ມາເລເຊຍ ແລະ ສປປ ລາວ ໃຫ້ໄດ້ຮັບການພັດທະນາ ແລະ ມີບາດກ້າວຂະຫຍາຍຕົວຍິ່ງໆຂຶ້ນໃນອະນາຄົດ.
(ຂ່າວ: ກຕທ)
ຄໍາເຫັນ