 |
ພາຍຫຼັງສໍາເລັດການສຶກສາຈາກມະຫາວິທະຍາໄລແຫ່ງຊາດ, ທ່ານນາງ ສີສົມບູນ ອຸນາວົງ ກໍໄດ້ເລີ່ມເຮັດວຽກທີ່ຄະນະກໍາມະການແຜນການແຫ່ງຊາດລາວ. ໃນປີ 2012, ເພິ່ນ ໄດ້ດໍາລົງຕໍາແໜ່ງເປັນ ຮອງຫົວໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ, ຕັ້ງແຕ່ນັ້ນເປັນຕົ້ນມາ ເພິ່ນກໍໄດ້ພົວພັນເຮັດວຽກກ່ຽວກັບວຽກງານການຮ່ວມມືຂອງລັດຖະບານຍີ່ປຸ່ນຕະຫຼອດມາ. ຫຼັງຈາກນັ້ນບໍ່ດົນ, ເພິ່ນກໍໄດ້ດໍາລົງຕໍາແໜ່ງເປັນຫົວໜ້າກົມ ແລະ ມີບົດບາດສໍາຄັນໃນການປະສານງານ ແລະ ອໍານວຍຄວາມສະດວກດ້ານການຮ່ວມມືທາງເສດຖະກິດ ແລະ ການຊ່ວຍເຫຼືອເພື່ອການພັດທະນາຈາກປະເທດຍີ່ປຸ່ນ ແລະ ບັນດາປະເທດຄູ່ຮ່ວມພັດທະນາ.
ເຖິງແມ່ນວ່າ, ທ່ານນາງ ສີສົມບູນ ອຸນາວົງ ຈະມີໜ້າທີ່ຮັບຜິດຊອບຢ່າງຫຼວງຫຼາຍໃນວຽກງານການຊ່ວຍເຫຼືອຈາກບັນດາປະເທດຄູ່ຮ່ວມພັດທະນາ ແລະ ອົງການສາກົນຕ່າງໆ, ເພິ່ນກໍໄດ້ພະຍາຍາມຢ່າງສຸດຄວາມສາມາດ ແລະ ອໍານວຍຄວາມສະດວກໃນການຮັບເອົາການສະໜັບສະໜູນຈາກລັດຖະບານຍີ່ປຸ່ນໃຫ້ເປັນໄປຢ່າງລາບລື່ນ ແລະ ມີປະສິດທິພາບສູງສຸດ. ຕະຫຼອດການດໍາລົງຕໍາແໜ່ງ, ເພິ່ນໄດ້ປະກອບສ່ວນຢ່າງພົ້ນເດັ່ນໃນການເສີມສ້າງສາຍພົວພັນມິດຕະພາບ ລາວ-ຍີ່ປຸ່ນ.
ໃນຖານະການເປັນປະທານຮ່ວມຂອງກອງປະຊຸມປຶກສາຫາລືດ້ານນະໂຍບາຍ ລະຫວ່າງ ກະຊວງການຕ່າງປະເທດຍີ່ປຸ່ນ ກັບ ລັດຖະບານລາວ, ເພິ່ນໄດ້ປະສານງານ ແລະ ຮວບຮວມຂໍ້ມູນຈາກກະຊວງ ແລະ ກົມກອງທີ່ກ່ຽວຂ້ອງເພື່ອຮັບປະກັນວ່າຍຸດທະສາດການພັດທະນາຂອງປະເທດລາວໄດ້ສອດຄ່ອງກັບລໍາດັບຄວາມສໍາຄັນດ້ານການຮ່ວມມືທາງເສດຖະກິດຂອງປະເທດຍີ່ປຸ່ນ. ເພິ່ນຍັງໄດ້ປະສານງານຮ່ວມມືໃນໂຄງການຮ່ວມມືເພື່ອການພັດທະນາຂອງປະເທດຍີ່ປຸ່ນ ເປັນຕົ້ນກໍແມ່ນໂຄງການຊ່ວຍເຫຼືອ, ໂຄງການກູ້ຢືມເງິນເຢນດອກເບ້ຍຕໍ່າ ແລະ ໂຄງການຮ່ວມມືດ້ານເຕັກນິກ. ນອກຈາກນັ້ນ, ຍັງຊຸກຍູ້ບັນດາວຽກງານຂອງອົງການໄຈກາຢ່າງຫ້າວເຫັນເຊັ່ນ: ໂຄງການສໍາຫຼວດວຽກງານປະຈໍາປີ, ໂຄງການຮ່ວມມືດ້ານເຕັກນິກ ແລະ ໂຄງການສົ່ງອາສາສະໝັກຍີ່ປຸ່ນມາປະຈໍາ ສປປ ລາວ ເປັນຕົ້ນ.
ຄວາມທຸ່ມເທ, ນໍາພາ ແລະ ມຸ່ງໝັ້ນຂອງເພິ່ນ ທີ່ມີຕໍ່ສາຍພົວພັນຂອງສອງປະເທດ ແມ່ນໄດ້ປະກອບສ່ວນຢ່າງໃຫຍ່ຫຼວງໃຫ້ແກ່ຄວາມສໍາເລັດຂອງການຮ່ວມມືດ້ານການພັດທະນາ ແລະ ເສີມສ້າງມິດຕະພາບອັນຍາວນານຂອງສອງປະເທດໃຫ້ແໜ້ນແກ່ນຍິ່ງໆຂຶ້ນ.
ດັ່ງນັ້ນ, ໃນໂອກາດນີ້ ທ່ານ ໂຄອິຊຶມິ ຊຶໂຕມຸ ເອກອັກຄະຣາຊະທູດຍີ່ປຸ່ນປະຈຳ ສປປ ລາວ ຈຶ່ງໄດ້ມອບໃບຍ້ອງຍໍ ເພື່ອແທນຄຳຂອບໃຈຕໍ່ກັບ ທ່ານນາງ ສີສົມບູນ ອຸນາວົງ ບຸກຄະລາກອນຜູ້ທີ່ໄດ້ອຸທິດຕົນເປັນເວລາຍາວນານຫຼາຍປີເພື່ອສົ່ງເສີມມິດຕະພາບ ແລະ ການຮ່ວມມືຂອງສອງປະເທດໂດຍຜ່ານການຊຸກຍູ້ວຽກງານດ້ານເສດຖະກິດ ແລະ ການຊ່ວຍເຫຼືອເພື່ອການພັດທະນາ.
(ແຫຼ່ງຂ່າວ: ສະຖານທູດຍີ່ປຸນ)
ຄໍາເຫັນ