 |
ນາງ ພອນພິມົນ ມອນຈັນດີ ຊ່າງກົນຈັກສ້ອມແປງບໍາລຸງຫົວລົດໄຟລາວ-ຈີນໃຫ້ສຳພາດຕໍ່ສື່ມວນຊົນຜ່ານມາວ່າ: ມື້ນີ້, ນ້ອງຢາກແບ່ງປັນເລື່ອງລາວຂອງນ້ອງ ແລະ ການປ່ຽນແປງອັນໃຫຍ່ຫຼວງທີ່ທາງລົດໄຟນຳມາສູ່ບ້ານເກີດເມືອງນອນຂອງນ້ອງ. ປັດຈຸບັນ, ນ້ອງອາຍຸ 28 ປີ, ເປັນຄົນເມືອງໄຊ ແຂວງອຸດົມໄຊ, ຊຶ່ງເປັນເມືອງໜຶ່ງ ທີ່ຢູ່ຕາມແລວເສັ້ນທາງລົດໄຟລາວ-ຈີນ. ປີ 2015, ນ້ອງໄດ້ໄປຮຽນຢູ່ທີ່ວິທະຍາໄລອາຊີວະສຶກສາ ນະຄອນກຸ້ຍຫຍາງ ປະເທດຈີນ. ໃນເວລານັ້ນ, ນ້ອງໄດ້ເຫັນຂ່າວການເລີ່ມກໍ່ສ້າງລົດໄຟລາວ-ຈີນ ໂດຍບັງເອີນ, ເຮັດໃຫ້ນ້ອງຮູ້ສຶກຕື່ນເຕັ້ນ. ຫຼັງຈາກຮຽນຈົບພາສາແລ້ວ, ນ້ອງບໍ່ໄດ້ລັງເລ ເລືອກຮຽນສາຍການຈັດການຂົນສົ່ງທາງລົດໄຟ. ນ້ອງຄິດວ່າ, ມື້ໃດມື້ໜຶ່ງ, ນ້ອງຈະກັບຄືນມາລາວ ເພື່ອເປັນກຳລັງໃຫ້ແກ່ທາງລົດໄຟສາຍນີ້. ນາງກ່າວຕື່ມວ່າ: ນ້ອງຮຽນຈົບຈາກວິທະຍາໄລອາຊີວະສຶກສາ ນະຄອນກຸ້ຍຫຍາງ ປີ 2020, ນ້ອງໄດ້ສະໝັກເຂົ້າເຮັດວຽກ ຢູ່ບໍລິສັດ ທາງລົດໄຟລາວ-ຈີນ ຈຳກັດ ໃນເດືອນທັນວາ 2021. ເບື້ອງຕົ້ນແມ່ນມາຝຶກງານ ຢູ່ສູນປະຕິບັດງານ ແລະ ບຳລຸງສ້ອມແປງຫົວຈັກລົດໄຟນະຄອນຫຼວງວຽງຈັນ. ເດືອນກຸມພາ 2022, ນ້ອງໄດ້ສອບເສັງຜ່ານຈາກພະນັກງານທົດລອງ ມາເປັນພະນັກງານທາງລົດໄຟ ແລະ ໄດ້ກາຍເປັນຊ່າງກົນຈັກຫົວລົດໄຟ ຂອງລົດໄຟລາວ-ຈີນ ຢ່າງເປັນທາງການ, ມີໜ້າທີ່ຕົ້ນຕໍຄື ກວດກາ ແລະ ບຳລຸງຮັກສາຫົວຈັກລົດໄຟ, ທົດລອງອຸປະກອນ, ຈັດການເຄື່ອງມື ແລະ ອຸປະກອນຂອງກຸ່ມງານອື່ນໆ. ເວົ້າຕາມຄວາມຈິງ, ຊ່າງກົນຈັກຫົວລົດໄຟ ແມ່ນວຽກຂອງຜູ້ຊາຍເພາະວ່າຕ້ອງໃຊ້ຄວາມແຂງແຮງທາງດ້ານຮ່າງກາຍສູງ. ແຕ່ນ້ອງມັກດ້ານກົນຈັກແຕ່ນ້ອຍ, ມັກຖອດ ມັກແປງ ແລະ ປະກອບສິ່ງຕ່າງໆ.
ຕອນເລີ່ມເຮັດວຽກໃໝ່ໆ, ນ້ອງເຄີຍພົບກັບຂໍ້ຫຍຸ້ງຍາກ ທັງດ້ານປະສົບການ ແລະ ຄວາມແຂງແຮງທາງຮ່າງກາຍ ໃນເວລາຖອດຊິ້ນສ່ວນຂະໜາດໃຫຍ່, ການຍ້າຍເຄື່ອງມືໜັກໆ ລ້ວນແຕ່ເປັນສິ່ງທ້າທາຍສຳລັບນ້ອງ. ແຕ່ນ້ອງບໍ່ໄດ້ທໍ້ຖອຍ, ທຸກຄັ້ງທີ່ມີເວລາຫວ່າງ ກໍຈະຖາມອາຈານຝ່າຍຈີນ, ຝຶກທ່າທາງການອອກແຮງທີ່ຖືກຕ້ອງ, ຮຽນຮູ້ການໃຊ້ເຄື່ອງມືຊ່ວຍ, ພ້ອມທັງອອກກຳລັງກາຍ ເພື່ອເພີ່ມຄວາມແຂງແຮງໃຫ້ຮ່າງກາຍ. ຝຶກແລ້ວຝຶກອີກ ເມື່ອເວລາຜ່ານໄປ ການເຮັດວຽກ ກໍມີຄວາມປອດໄພ ແລະ ມີປະສິດທິພາບສູງຂຶ້ນ. ປັດຈຸບັນນ້ອງຄິດວ່າ: ເມື່ອທຽບໃສ່ເພື່ອນຮ່ວມງານຜູ້ຊາຍ, ຊ່າງກົນຈັກທີ່ເປັນຜູ້ຍິງ ຈະມີຄວາມພິຖີພິຖັນ ແລະ ອົດທົນກວ່າ, ມີຄວາມລະອຽດອ່ອນກວ່າ ໃນດ້ານການກວດກາອຸປະກອນ, ການວັດແທກຊິ້ນສ່ວນ ແລະ ຄວາມຖືກຕ້ອງຂອງການປະກອບອາໄຫຼ່.
 |
ພອນພິມົນ ມອນຈັນດີ ບອກໃຫ້ຮູ້ອີກວ່າ: ໜ້າວຽກຂອງນ້ອງແມ່ນເຮັດໃນຕອນກາງຄືນ, ເມື່ອຂະບວນລົດໄຟ ສຳເລັດການແລ່ນປະຈຳວັນ ກັບເຂົ້າມາເຕົ້າໂຮມ ພວກນ້ອງກໍເລີ່ມກວດກາຫົວຈັກລົດໄຟ. ຕອນຫົວລົດໄຟຫາກໍກັບມາຈາກການແລ່ນ ແນ່ນອນອຸນຫະພູມພາຍໃນຮ້ອນສູງເຖິງ 40-50 ອົງສາ, ປົກກະຕິແລ້ວໃຊ້ເວລາ 30-45 ນາທີ ໃນການກວດກາຈຶ່ງສຳເລັດ, ເຖິງແມ່ນວ່າຮ້ອນແນ່, ເມື່ອຍແນ່ ກໍຕ້ອງອົດທົນເພາະວ່າວຽກງານກວດກາບຳລຸງຮັກສາ ແມ່ນໄດ້ຄຳນຶງເຖິງຄວາມປອດໄພຂອງຊີວິດຜູ້ໂດຍສານ, ບໍ່ສາມາດເຮັດຕາມວາດ ຫຼື ລະເລີຍໄດ້ ຕ້ອງຮັບປະກັນໃຫ້ລົດໄຟແລ່ນຢ່າງປອດໄພ.
ຄໍາເຫັນ