ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ສົ່ງສານອວຍພອນເຖິງພະນະ ທ່ານ ຄູເຣລສຸກຄ ໂອຄະນາ ປະທານາທິບໍດີ ແຫ່ງ ມົງໂກລີ ໂດຍມີເນື້ອໃນວ່າ: ເນື່ອງໃນໂອກາດບຸນປະເພນີ “Naadam’’, ວັນສ້າງຕັ້ງລັດມົງໂກລີ ຄົບຮອບ 819 ປີ ແລະ ວັນໄຊຊະນະຂອງການປະຕິວັດປະຊາຊົນ ມົງໂກລີ ຄົບຮອບ 104 ປີ, ຕາງໜ້າປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງພະນະທ່ານ ແລະ ຜ່ານພະນະທ່ານ ໄປຍັງປະຊາຊົນ ມົງໂກລີ ທຸກຖ້ວນໜ້າ.
ຂ້າພະເຈົ້າມີຄວາມປິຕິຍິນດີ ເປັນຢ່າງຍິ່ງ ທີ່ເຫັນວ່າ ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືອັນເປັນມູນເຊື້ອ ລະຫວ່າງ ສປປ ລາວ ເເລະ ມົງໂກລີ ສືບຕໍ່ໄດ້ຮັບການເສີມຂະຫຍາຍ ແລະ ພັດທະນາຢ່າງບໍ່ຢຸດຢັ້ງໃນຕະຫຼອດໄລຍະກວ່າ 6 ທົດສະວັດທີ່ຜ່ານມາ. ຂ້າພະເຈົ້າ ຍັງມີຄວາມຊົງຈໍາອັນດີທີ່ໄດ້ພົບປະກັບພະນະທ່ານ ໃນເດືອນພະຈິກ 2023 ທີ່ ນະຄອນຫຼວງວຽງຈັນ ແລະ ໃນເດືອນມິຖຸນາ 2024 ທີ່ ອູລານບາຕໍ ໃນບັນຍາກາດແຫ່ງມິດຕະພາບ ແລະ ຄວາມຈິງໃຈ ຊຶ່ງການຢ້ຽມຢາມຊຶ່ງກັນ ແລະ ກັນ ດັ່ງກ່າວ ໄດ້ກາຍເປັນຂີດໝາຍທີ່ສໍາຄັນໃນການຊຸກຍູ້ສາຍພົວພັນຮ່ວມມື ລະຫວ່າງ ສອງປະເທດຂອງພວກເຮົາໃຫ້ມີບາດກ້າວຂະຫຍາຍຕົວເຂົ້າສູ່ລວງເລິກ ແລະ ມີ ໝາກຜົນຍິ່ງໆຂຶ້ນເພື່ອນໍາເອົາຜົນປະໂຫຍດຕົວຈິງ ມາສູ່ ປະຊາຊົນສອງຊາດ ລາວ-ມົງໂກລີ ກໍຄືເພື່ອສັນຕິພາບ, ສະຖຽນລະພາບ, ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ໃນໂລກ.
ໃນໂອກາດອັນສະຫງ່າລາສີນີ້, ຂ້າພະເຈົ້າຂໍອວຍພອນໄຊອັນປະເສີດມາຍັງພະນະທ່ານຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດອັນໃຫຍ່ຫຼວງກວ່າເກົ່າໃນພາລະກິດອັນມີກຽດສູງສົ່ງຂອງພະນະທ່ານ ແລະ ອວຍພອນໃຫ້ ປະຊາຊົນ ມົງໂກລີ ເພື່ອນມິດທຸກຖ້ວນໜ້າ ຈົ່ງມີຄວາມຈະເລີນກ້າວໜ້າ ແລະ ວັດທະນາຖາວອນ ຕະຫຼອດໄປ.
ໃນໂອກາດດັ່ງກ່າວ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ສົ່ງສານອວຍພອນເຖິງ ພະນະທ່ານ ກອມບໍຈາວ ຊັງຕັງຊາທາຣ ນາຍົກລັດຖະມົນຕີ ແຫ່ງ ມົງໂກລີ ແລະ ພະນະ ທ່ານ ທອງສະຫວັນ ພົມວິຫານ ລັດຖະມົນຕີ ກະຊວງການຕ່າງປະເທດແຫ່ງ ສປປ ລາວ ກໍໄດ້ສົ່ງສານອວຍພອນເຖິງພະນະທ່ານ ນາງ ບັດເຊເຊັກ ບັດເມິງຄ ລັດຖະມົນຕີກະຊວງຕ່າງປະເທດ ແຫ່ງ ມົງໂກລີ ເຊັ່ນດຽວກັນ.
ຄໍາເຫັນ