 |
ທ່ານ ນາງ ແສງອຳພອນ ພິຈິດ ເຈົ້າຂອງສວນ ໃຫ້ຮູ້ວ່າ: ໃນໄລຍະປີ 2016-2018 ສະຖານທີ່ແຫ່ງນີ້ເຄີຍເປັນສວນໝາກໄມ້ຂອງຄອບຄົວ, ຕໍ່ມາຮອດກາງປີ 2018 ສວນໝາກໄມ້ໄດ້ປະສົບກັບເຫດໄຟ ໄໝ້ ແລະ ມາຮອດປີ 2026 ເຫັນວ່າ ພື້ນທີ່ມີທິວທັດທຳມະຊາດສວຍງາມ, ມີສາຍນ້ຳໄຫຼຜ່ານຕະຫຼອດປີ, ນ້ຳໃສເຢັນ ແລະ ອາກາດສົດຊື່ນຈຶ່ງເກີດແນວຄິດພັດທະນາໃຫ້ກາຍເປັນແຫຼ່ງພັກຜ່ອນທ່ອງທ່ຽວທາງທຳມະຊາດແຫ່ງໃໝ່ ເພື່ອຮັບໃຊ້ສັງຄົມ ແລະ ເພີ່ມທາງເລືອກດ້ານການພັກຜ່ອນໃຫ້ປະຊາຊົນ.
 |
ສຳລັບການບໍລິການພາຍໃນສວນ ປະກອບມີອາຫານຕາມສັ່ງ, ເຄື່ອງດື່ມຫຼາກຫຼາຍຊະນິດ, ບໍລິເວນນັ່ງພັກຜ່ອນໃກ້ສາຍນ້ຳ ແລະ ເຄື່ອງຫຼິ້ນສຳລັບເດັກນ້ອຍ. ສະຖານທີ່ດັ່ງກ່າວຈຶ່ງເໝາະສຳລັບການມາພັກ ຜ່ອນເປັນຄອບຄົວ, ກຸ່ມໝູ່ເພື່ອນ ແລະ ການຈັດກິດຈະກຳສັງສັນກາງແຈ້ງ ທ່າມກາງບັນຍາກາດທຳມະຊາດທີ່ສະຫງົບສຸກ.
ທ່ານ ນາງ ແສງອຳພອນ ພິຈິດ ຍັງໄດ້ເຊີນຊວນປະຊາຊົນ ແລະ ນັກທ່ອງທ່ຽວທັງພາຍໃນແຂວງ ແລະ ຕ່າງແຂວງ ໃຫ້ມາສຳຜັດກັບຄວາມງົດງາມຂອງທຳມະຊາດ, ສາຍນ້ຳໃສເຢັນ ແລະ ອາກາດສົດຊື່ນ ພ້ອມທັງພັກຜ່ອນຈາກວຽກງານປະຈຳວັນ ໃນບັນຍາກາດທີ່ເປັນກັນເອງ ແລະ ໃກ້ຊິດກັບທຳມະຊາດ.
 |
ສວນສຸກອາພອນ ແຄມປິ້ງ ມີກຳນົດເປີດໃຫ້ບໍລິການໃນຕົ້ນປີ 2027 ຄາດວ່າຈະເປັນອີກໜຶ່ງຈຸດໝາຍທ່ອງທ່ຽວທາງທຳມະຊາດແຫ່ງໃໝ່ຂອງເມືອງສະໜາມໄຊ ທີ່ຊ່ວຍເພີ່ມທາງເລືອກການພັກຜ່ອນ ແລະ ປະກອບ ສ່ວນສົ່ງເສີມການທ່ອງທ່ຽວພາຍໃນແຂວງອັດຕະປືໃຫ້ຄຶກຄື້ນຫຼາຍຂຶ້ນ. ຊຶ່ງມີໄລຍະທາງຈາກເທສະບານແຂວງອັດຕະປືໄປຫາ ສວນສຸກອາພອນ ແຄມປິ້ງ ຫ້ວຍສະໝອງ ປະມານ 60 ກວ່າກິໂລແມັດ.
ຂ່າວ: ມະນີວອນ
ຄໍາເຫັນ