ຄໍາມ່ວນ ເປັນເຈົ້າພາບຈັດກອງປະຊຸມສຳມະນາບັນຊີປະຊາຊາດດ້ານການທ່ອງທ່ຽວ

ໃນພິທີເປີດທ່ານ ນາງ ດາລານີ ພົມມະວົງສາ ໄດ້ມີຄໍາເຫັນວ່າ: ວຽກງານການທ່ອງທ່ຽວແມ່ນຂະແໜງ ເສດຖະກິດປາຍແຫຼມຂອງ ສປປ ລາວ. ຊຶ່ງໃນປີ 2025 ຜ່ານມາ, ສາມາດຕ້ອນຮັບນັກທ່ອງທ່ຽວຕ່າງປະເທດໄດ້ກວ່າ 4.5 ລ້ານເທື່ອຄົນ (ລື່ນຄາດໝາຍ 105%) ແລະ ພຽງແຕ່ 3 ເດືອນຕົ້ນປີ 2026 ນີ້, ມີນັກທ່ອງທ່ຽວຕ່າງ ປະເທດເຂົ້າມາແລ້ວປະມານ 1.31 ລ້ານເທື່ອຄົນ ຖືເປັນກໍາລັງຂັບເຄື່ອນສໍາຄັນຕໍ່ເສດຖະກິດ-ສັງຄົມ. ສະນັ້ນ ການຈັດຕັ້ງປະຕິບັດລະບົບ "ບັນຊີປະຊາຊາດດ້ານການທ່ອງທ່ຽວ" ຕາມມາດຕະຖານສາກົນຂອງອົງການທ່ອງ ທ່ຽວໂລກ (UN Tourism) ຈຶ່ງເປັນເຄື່ອງມືຍຸດທະສາດທີ່ຂາດບໍ່ໄດ້ ເພື່ອວັດແທກມູນຄ່າ ແລະ ຕົວເລກທີ່ແທ້ຈິງຂອງການທ່ອງທ່ຽວ ທີ່ກວມລວມຫຼາຍຂະແໜງການ (ຂົນສົ່ງ, ການຄ້າ, ທີ່ພັກ, ອາຫານ ແລະ ອື່ນໆ) ຕໍ່ກັບ GDP ແລະ ການຈ້າງງານ, ສະໜອງຂໍ້ມູນສະຖິຕິທີ່ໜ້າເຊື່ອຖື ແລະ ມີວິທະຍາສາດໃຫ້ພາກລັດ ແລະ ເອກະຊົນ ໃນການວາງນະໂຍບາຍ ແລະ ກຳນົດທິດທາງການລົງທຶນ, ຍົກລະດັບຂີດຄວາມສາມາດ ຫັນວຽກງານສະຖິຕິການທ່ອງທ່ຽວລາວເຂົ້າສູ່ລະບົບດີຈີຕອນ ເພື່ອເຊື່ອມໂຍງກັບອາຊຽນ ແລະ ສາກົນ.

ກອງປະຊຸມຄັ້ງນີ້, ຜູ້ເຂົ້າຮ່ວມຈະໄດ້ພ້ອມກັນຮັບຟັງການນໍາສະເໜີ ສະພາບລວມຂອງວຽກງານບັນຊີປະຊາຊາດດ້ານການທ່ອງທ່ຽວຂອງ ສປປ ລາວ ແລະ ເນື້ອໃນລະອຽດກ່ຽວກັບບົດຮຽນຂອງສາກົນ ໂດຍສະ ເພາະບັນດາປະເທດທີ່ໃຊ້ລະບົບບັນຊີປະຊາຊາດດ້ານການທ່ອງທ່ຽວ ເຂົ້າໃນການເກັບກຳຂໍ້ມູນສະຖິຕິການທ່ອງ ທ່ຽວ. ນອກນັ້ນ, ຈະໄດ້ພ້ອມກັນສໍາຜັດແບບຟອມ ແລະ ເກັບກຳຂໍ້ມູນຕົວຈິງຢູ່ຕາມຈຸດສໍາຄັນ ເປັນຕົ້ນ ດ່ານສາ ກົນຂົວມິດຕະພາບ ແລະ ແຫຼ່ງທ່ອງທ່ຽວທີ່ສໍາຄັນຈໍານວນໜຶ່ງຂອງແຂວງຄໍາມ່ວນ ເພື່ອຮັບປະກັນຄວາມເຂົ້າໃຈເປັນເອກະພາບໃນການນໍາໄປຈັດຕັ້ງປະຕິບັດຕົວຈິງ ຢູ່ບັນດາແຂວງໃນຂອບເຂດທົ່ວປະເທດ. ຊຶ່ງພາຍຫຼັງການສໍາມະນານີ້ແລ້ວ, ຮຽກຮ້ອງໃຫ້ບັນດາທ່ານໄດ້ຫັນໝາກຜົນການເກັບກຳຂໍ້ມູນນີ້ ໃຫ້ເປັນນະໂຍບາຍ ຂໍ້ມູນທີ່ໄດ້ຈາກການສຳມະນານໍາໄປຜັນຂະຫຍາຍເຂົ້າໃນ ການຈັດຕັ້ງປະຕິບັດແຜນຍຸດທະສາດການທ່ອງທ່ຽວອາຊຽນ 2026-2030 ແລະ ແຜນພັດທະນາເສດຖະກິດ-ສັງຄົມຂອງ ສປປ ລາວ. ຂໍ້ມູນສະຖິຕິທີ່ຊັດເຈນ ຄືເຂັມທິດ ທີ່ນໍາທາງການພັດທະນາໃຫ້ມີຄວາມຍືນຍົງ.

ຂ່າວ: ກອງຄໍາ