ມອບ-ຮັບ ໂຄງການຟື້ນຟູບູລະນະໃຈກາງຕົວເມືອງເກົ່າ ແລະ ອະນຸລັກມໍຣະດົກ ສົ່ງເສີມການທ່ອງທ່ຽວ

ທ່ານ ໂພໄຊ ກັດຕິຍະລາດ ຫົວໜ້າພະແນກ ຍທຂ ແຂວງ ກ່າວວ່າ: ໂຄງການດັ່ງກ່າວ ເປັນສ່ວນໜຶ່ງຂອງ GMS4 ທີ່ມຸ່ງປັບປຸງໂຄງລ່າງພື້ນຖານ, ຍົກລະດັບການບໍລິການຕົວເມືອງ ແລະ ອະນຸລັກຄຸນຄ່າມໍຣະດົກ ເພື່ອສ້າງເງື່ອນໄຂໃຫ້ຕົວເມືອງທ່າແຂກເຕີບໂຕເປັນເມືອງທີ່ມີສະເໜ່ ແລະ ດຶງດູດນັກທ່ອງທ່ຽວ. ໂຄງການ GMS4 ມີມູນຄ່າລວມ 54,06 ລ້ານໂດລາ. ໃນນັ້ນ ເປັນທຶນຊ່ວຍເຫຼືອຈາກທະນາຄານພັດທະນາອາຊີ (ADB) 48 ລ້ານໂດລາ ແລະ ທຶນຈາກລັດຖະບານລາວ 6,06 ລ້ານໂດລາ. ສະເພາະເມືອງທ່າແຂກໄດ້ຮັບທຶນປະມານ 20,94 ລ້ານໂດລາ.

ໂຄງການພັດທະນາຕົວເມືອງທ່າແຂກ ປະກອບມີ 5 ກິດຈະກໍາຫຼັກ ຄື: ກໍ່ສ້າງຮ່ອງລະບາຍນໍາ 5 ສາຍ, ສ້າງອ່າງບຳບັດນ້ຳເປື້ອນ 4 ແຫ່ງ, ປັບປຸງສະໜາມກຳຈັດຂີ້ເຫຍື້ອໃຫ້ຮອງຮັບໄດ້ 300,000 ແມັດກ້ອນ ແລະ ມີອາຍຸນຳໃຊ້ຫຼາຍກວ່າ 15 ປີ, ກໍ່ສ້າງແນວປ້ອງກັນຕະຝັ່ງແມ່ນ້ຳຂອງ 5 ເຂດ ແລະ ປັບປຸງຟື້ນຟູໃຈກາງເມືອງ ເກົ່າ ພ້ອມອະນຸລັກມໍຣະດົກຕົວເມືອງ.

ສຳລັບໂຄງການຟື້ນຟູໃຈກາງເມືອງເກົ່າ ຕັ້ງຢູ່ບ້ານທ່າແຂກກາງ ເມືອງທ່າແຂກ ແຂວງຄໍາມ່ວນ ມີມູນຄ່າສັນຍາ 799,978.55 ໂດລາ ຮັບເໝົາໂດຍບໍລິສັດວິສະວະກອນກໍ່ສ້າງ ແລະ ວິສະວະກໍາ ຈໍາກັດຜູ້ດຽວ. ເນື້ອໃນວຽກປະກອບມີການປັບປຸງສວນ 21 ມີນາ ບໍລິເວນຫໍຈາລຶກ ແລະ ນໍ້າພຸ ພ້ອມສ້ອມແປງອາຄານໄປສະນີເກົ່າ ເພື່ອຮັກສາສະຖາປັດຕະຍະກຳ ແລະ ເອກະລັກຂອງຕົວເມືອງ. ໂຄງການໄດ້ເຊັນສັນຍາໃນວັນທີ 2 ກໍລະກົດ 2025 ແລະ ຜ່ານການຕໍ່ອາຍຸສັນຍາ 90 ວັນ. ພາຍຫຼັງສໍາເລັດວຽກກໍ່ສ້າງ ຈຶ່ງໄດ້ຈັດພິທີມອບ-ຮັບຊົ່ວຄາວໃນຄັ້ງນີ້ ໂດຍທ່ານ ພະນົມ ພົມດວງສີ ປະທານບໍລິສັດ ເປັນຜູ້ມອບ ແລະ ທ່ານ ໂພໄຊ ກັດຕິຍະລາດ ເປັນຜູ້ຮັບ.