 |
ທ່ານ ພັທ ສຸກລາ ກົມມະເມືອງ ຫົວໜ້າກອງບັນຊາການ ປກສ ເມືອງໄຊເສດຖາ ໄດ້ລາຍງານຜົນການ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ວຽກງານອອກບັດປະຈຳຕົວແບບເອເລັກໂຕຣນິກ ຕໍ່ກອງປະຊຸມອົງການປົກຄອງເມືອງ ໃນວັນທີ 3 ພະຈິກຜ່ານມາ ໃຫ້ຮູ້ວ່າ: ສຳລັບວຽກງານປາບປາມຢາເສບຕິດໃນໄລຍະ 9 ເດືອນປີ 2026 ສາມາດທັບມ້າງເປົ້າໝາຍຄ້າຂາຍຢາເສບຕິດໄດ້ 10 ຄັ້ງ, ກັກຕົວຜູ້ຖືກຫາ 13 ຄົນ ຍິງ 1 ຄົນ, ພ້ອມຢຶດຂອງກາງຢາບ້າ 1,241 ເມັດ, ໂທລະສັບ 2 ໜ່ວຍ ແລະ ເງິນສົດ 2,1 ລ້ານກີບ. ນອກນັ້ນ, ຍັງໄດ້ປະສານສົມທົບກັບ ປກສ ແຂວງ ລົງທັບມ້າງເປົ້າໝາຍ 1 ຄັ້ງ, ກວດຄົ້ນເຄຫະສະ ຖານພົບຢາບ້າ 46 ເມັດ, ໂທລະສັບ 1 ໜ່ວຍ ແລະ ເງິນສົດ 700,000 ກີບ ໂດຍໄດ້ມອບຄະດີໃຫ້ ປກສ ແຂວງ ດຳເນີນການຕາມຂັ້ນຕອນ. ພ້ອມນີ້ ຍັງໄດ້ທັບມ້າງເປົ້າໝາຍຄ້າຂາຍນ້ຳກະທ້ອມ 2 ຄັ້ງ, ກັກຕົວຜູ້ຖືກຫາ 2 ຄົນ ຍິງ 1 ຄົນ, ຢຶດຂອງກາງໃບກະທ້ອມ 8.5 ກິໂລກຣາມ, ນ້ຳຫົວເຊື້ອ 161 ແກ້ວ, ໂທລະສັບ 1 ໜ່ວຍ ແລະ ເງິນສົດ 300,000 ກີບ. ສ່ວນວຽກງານອອກບັດປະຈຳຕົວແບບເອເລັກໂຕຣນິກ ໃນໄລຍະ 9 ເດືອນຜ່ານມາ ສາມາດປະກອບເອກະສານໄດ້ທັງໝົດ 787 ຄົນ.
 |
ທ່ານ ພັທ ສຸກລາ ກົມມະເມືອງ ໃຫ້ຮູ້ອີກວ່າ: ສຳລັບແຜນວຽກໃນ 3 ເດືອນຕໍ່ໜ້າ, ກອງບັນຊາການ ປກສ ເມືອງໄຊເສດຖາ ຈະສືບຕໍ່ສຸມໃສ່ໂຄສະນາເຜີຍແຜ່ນິຕິກຳ ແລະ ລະບຽບກົດໝາຍຄວບຄູ່ກັບການສຶກສາອົບຮົມປະຊາຊົນ; ເພີ່ມທະວີການຕ້ານ ແລະ ສະກັດກັ້ນປະກົດການຫຍໍ້ທໍ້, ການມົ້ວສຸມ ແລະ ຄ້າຂາຍຢາເສບຕິດ, ການລັກຊັບ ພ້ອມທັງຄຸ້ມຄອງອາວຸດປືນ, ອາວຸດລ່າເນື້ອ ແລະ ພາຫະນະຫາປາຕ່າງໆໃຫ້ເຂັ້ມງວດຂຶ້ນ. ນອກຈາກນັ້ນ, ຈະສຸມໃສ່ວຽກງານຄຸ້ມຄອງສຳມະໂນຄົວ ແລະ ຕິດຕາມການເໜັງຕີງຂອງພົນລະເມືອງ ໂດຍສະເພາະການມາພັກເຊົາຊົ່ວຄາວ, ການບໍ່ຢູ່ປະຈຳທີ່ ແລະ ການປ່ຽນແປງຈຳນວນສະມາຊິກໃນຄອບຄົວໃຫ້ຖືກຕ້ອງຕາມລະບຽບກົດໝາຍ. ພ້ອມທັງເອົາໃຈໃສ່ຄຸ້ມຄອງບັນດາເປົ້າໝາຍທີ່ກ່ຽວຂ້ອງກັບອາຊະຍາກຳ ແລະ ນຳພາຊີ້ນຳກຳລັງ ປກສ ກຸ່ມບ້ານ ແລະ ປກສ ບ້ານ ໃຫ້ປະຕິບັດໜ້າທີ່ຕາມພາລະບົດບາດຢ່າງເຂັ້ມງວດ ແລະ ຕໍ່ເນື່ອງ.
ຂ່າວ: ພຸດປະສົງ
ຄໍາເຫັນ