 |
ທ່ານ ນາງ ພະນົມພອນ ຢ້ຽມພະບູ່ ປະທານກຸ່ມບໍລິສັດ ພະນົມພອນ ຈໍາກັດ ໄດ້ລາຍງານວ່າ: ການລົງ ທຶນກໍ່ສ້າງສາງດັ່ງກ່າວນີ້ ໄດ້ນໍາໃຊ້ງົບປະມານຫຼາຍກວ່າ 17,5 ລ້ານໂດລາ. ເພື່ອພັດທະນາໂຄງລ່າງສາງເກັບສິນຄ້າ, ສາງພາງ ແລະ ສາງພິເສດ. ປັດຈຸບັນ ໂຄງການໄລຍະທີ 1 ສໍາເລັດແລ້ວ ປະກອບມີສາງເກັບສິນຄ້າ ແລະ ລະບົບຍົກ-ຄ່ຽນຖ່າຍສິນຄ້າ ເພື່ອຮອງຮັບການນໍາເຂົ້າ-ສົ່ງອອກ ແລະ ເຊື່ອມໂຍງການຂົນສົ່ງລະຫວ່າງປະເທດ.
 |
ໂອກາດນີ້, ທ່ານ ເດດສັກດາ ມະນີຄໍາ ຮອງປະທານຄະນະກໍາມະການປົກຄອງແຂວງ ໄດ້ຕາງໜ້າການນຳແຂວງ ສະແດງຄວາມຊົມເຊີຍຕໍ່ກຸ່ມບໍລິສັດ ພະນົມພອນ ທີ່ໄດ້ຂະຫຍາຍກິດຈະການເປີດ “ສາງພາງ” ໃນຄັ້ງນີ້ຊຶ່ງຖືເປັນ 1 ໃນ 3 ເສົາຄໍ້າຂອງຍຸດທະສາດການພັດທະນາເສດຖະກິດ-ສັງຄົມ ຂອງແຂວງຄໍາມ່ວນ ໃນດ້ານການຄ້າ ແລະ ການບໍລິການ. ໂດຍອາໄສທ່າແຮງດ້ານທີ່ຕັ້ງ ແລະ ເສັ້ນທາງຄົມມະນາຄົມເຊື່ອມໂຍງພາກພື້ນ.
 |
ຈຸດເດັ່ນຂອງຄໍາມ່ວນແມ່ນເສັ້ນທາງຈາກດ່ານສາກົນຂົວມິດຕະພາບ 3 ຫາ ດ່ານສາກົນນາເພົ້າ-ຈາຫຼໍ ມີໄລຍະທາງພຽງ 146 ກິໂລແມັດ ເປັນເສັ້ນທາງສໍາຄັນໃນການຂົນສົ່ງສິນຄ້າຈາກໄທ ຜ່ານລາວໄປຫວຽດນາມ ແລະ ເຊື່ອມຕໍ່ສູ່ທ່າເຮືອນໍ້າເລິກຫວຸ່ງອາງ ຊຶ່ງຊ່ວຍຫຼຸດເວລາ ແລະ ຕົ້ນທຶນຂົນສົ່ງໃຫ້ຜູ້ປະກອບການ.
ປັດຈຸບັນ ກຸ່ມບໍລິສັດ ພະນົມພອນ ມີ 7 ກິດຈະການຢູ່ເມືອງທ່າແຂກ ຄອບຄຸມທັງການຄ້ານໍາເຂົ້າ-ສົ່ງອອກ, ການຜະລິດ, ການຈໍາໜ່າຍສິນຄ້າ, ວັດສະດຸກໍ່ສ້າງ ແລະ ອຸດສາຫະກໍາຂຸດຄົ້ນແຮ່ທາດ. ໃນຕໍ່ໜ້າ ບໍລິສັດ ມີແຜນສືບຕໍ່ພັດທະນາລະບົບສາງໃຫ້ທັນສະໄໝ ເພື່ອເພີ່ມຂີດຄວາມສາມາດໃນການແຂ່ງຂັນທັງລະດັບປະເທດ ແລະ ພາກພື້ນ.
 |
ທາງການແຂວງ ຍັງເນັ້ນໃຫ້ຜູ້ປະກອບການດໍາເນີນທຸລະກິດຕາມລະບຽບກົດໝາຍ ແລະ ປະຕິບັດພັນທະຕໍ່ລັດຢ່າງຄົບຖ້ວນ ເພື່ອສ້າງພື້ນຖານການພັດທະນາທີ່ໝັ້ນຄົງ ແລະ ຍືນຍົງ. ການເປີດສາງພາງຄັ້ງນີ້, ຈຶ່ງເປັນອີກກ້າວສໍາຄັນຂອງແຂວງຄໍາມ່ວນ ໃນການຍົກລະດັບການຄ້າຊາຍແດນ ແລະ ເພີ່ມບົດບາດຂອງ ສປປລາວ ໃນເສັ້ນທາງການຂົນສົ່ງສິນຄ້າໃນລະດັບພາກພື້ນ. ຂ່າວ: ມະນີວັນ; ພາບ: ກອງຄໍາ
ຄໍາເຫັນ