 |
ທ່ານ ສົມໃຈ ພານີຈັນ ຮອງເລຂາພັກແຂວງຜູ້ຊີ້ນໍາວຽກງານການເມືອງ-ແນວຄິດວຽກງານພັກ-ພະນັກງານ ໄດ້ຕາງໜ້າການນໍາຂອງແຂວງ ລາຍງາຍກ່ຽວກັບການພັດທະນາເສດຖະກິດ-ສັງຄົມຂອງແຂວງ ໃນໄລຍະ 09 ເດືອນຂອງປີ 2026ໃຫ້ຮູວ່າ: ເສດຖະກິດມະຫາພາກຂອງແຂວງຄໍາມ່ວນ ຂະຫຍາຍຕົວໃນລະດັບ 5.6%, ລວມຍອດຜະລິດຕະພັນ ບັນລຸໄດ້ 25,035 ຕື້ກີບ, ເທົ່າກັບ 86%(ມະຕິສະພາໝົດປີ ໃຫ້ບັນລຸ 28,941 ຕື້ກີບ), ລາຍຮັບສະເລ່ຍຕໍ່ຫົວຄົນ 2,657 ໂດລາ, ດ້ານການລົງທຶນຂອງລັດ ໄດ້ຮັບອະນຸມັດໂຄງການລົງທຶນຂອງລັດທັງໝົດ 518 ໂຄງການ, ມູນຄ່າ 994.65 ຕື້ກີບ ແລະ ເງິນເກີນແຜນ 780.96 ຕື້ກີບໃນປີທີ່ຜ່ານມາ, ໄດ້ຈັດຕັ້ງປະຕິບັດ 342 ໂຄງການ ມູນຄ່າ 617.97 ຕື້ກີບ ເທົ່າກັບ 138%, ສາມາດດຶງດູດການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ໄດ້ທັງໝົດ 33 ໂຄງການ ມີທຶນທັງໝົດ 9,301 ຕື້ກີບ, ທຶນຈົດທະບຽນ 2,403.86 ຕື້ກີບ ເທົ່າກັບ 50% ຂອງແຜນການປີ, ການລະດົມທຶນເພື່ອການພັດທະນາ ໄດ້ທັງໝົດ 5,333.76 ຕື້ກີບ ເທົ່າກັບ 71.65%(ມະຕິສະພາໝົດປີ ໃຫ້ໄດ້ 7,444.32 ຕື້ກີບ), ໃນນີ້: ການລົງທຶນຂອງລັດ 617.97 ຕື້ກີບ ເທົ່າກັບ 138%, ການຊ່ວຍເຫຼືອທາງການເພື່ອການພັດທະນາ 564.53 ຕື້ກີບ ເທົ່າກັບ 63.19%, ການລົງທຶນເອກະຊົນພາຍໃນ ແລະ ຕ່າງປະເທດ ບັນລຸໄດ້ 2,403.86 ຕຶ້ກີບ ເທົ່າກັບ 50% ຂອງແຜນການປີ, ລະບົບສິນເຊື່ອທະນາຄານ ປະຕິບັດໄດ້ 1,747.39 ຕື້ກີບ ເທົ່າກັບ 138.08%.
 |
ໃນປີ 2026 ແຜນລາຍຮັບງົບປະມານຂອງແຂວງ ທີ່ໄດ້ຮັບມອບໝາຍມີທັງໝົດ 4,846 ຕື້ກີບ. ມາຮອດປັດຈຸບັນ ສາມາດຈັດເກັບໄດ້ 5,549 ຕື້ກວ່າກີບ, ເທົ່າກັບ 114.50% (ເກີນແຜນທັງໝົດ 702.76 ຕື້ກີບ).
ໂອກາດນີ້, ທ່ານ ວັນໄຊ ພອງສະຫວັນ ໄດ້ມີຄໍາເຫັນໂອ້ລົມ ແລະ ຊີ້ນໍາ ໃຫ້ພະນັກງານການນໍາ ແລະ ພະນັກງານຫຼັກແຫຼ່ງຂອງແຂວງຄໍາມ່ວນ ເອົາໃຈໃສ່ຄື: ສືບຕໍ່ປະຕິບັດວຽກງານ ປກຊ-ປກສ ທົ່ວປວງຊົນຮອບດ້ານ, ສ້າງກຳລັງໃຫ້ມີຄຸນທາດການເມືອງໜັກແໜ້ນ ແລະ ກຽມພ້ອມສູ້ຮົບຕະຫຼອດເວລາ, ຫັນກຳລັງລົງກໍ່ສ້າງຮາກຖານການເມືອງຢູ່ບັນດາຕາແສງ, ສ້າງບ້ານ ປກຊ-ປກສ ໃຫ້ເຂັ້ມແຂງ, ເອົາໃຈໃສ່ແກ້ໄຂບັນຫາຢາເສບຕິດ, ການຄ້າຂາຍເຖື່ອນ, ຂີ້ລັກງັດແງະ ແລະ ເນັ້ນການປາບປາມ ກຸ່ມແກ້ງຄໍເຊັນເຕີ ຢ່າງຈິງຈັງ, ພ້ອມນັ້ນກໍໃຫ້ຖືເອົາເສດຖະກິດເປັນໜ້າທີ່ໃຈກາງ ໂດຍນໍາທ່າແຮງດ້ານກະສິກຳ, ປູກຝັງ-ລ້ຽງສັດ ແລະ ລະບົບຂົນສົ່ງ, ຊຸກຍູ້ເສດຖະກິດພູມປັນຍາຊາວບ້ານໃຫ້ເປັນກຸ່ມການຜະລິດສິນຄ້າ, ເພີ່ມທະວີຄຸ້ມຄອງລາຍຮັບໃຫ້ທັນສະໄໝ, ປະຢັດມັດທະຍັດລາຍຈ່າຍ ແລະ ສະກັດກັ້ນການຮົ່ວໄຫຼ, ໃຫ້ກວດກາຄືນບັນດາໂຄງການ ທີ່ບໍ່ມີຄວາມຄືບໜ້າ ຖ້າເຮັດບໍ່ໄດ້ແມ່ນໃຫ້ ໂຈະ ຫຼື ຍົກເລີກສັນຍາ, ເຂັ້ມງວດໃນການຈັດຕັ້ງປະຕິບັດ ຄຳສັ່ງ 15/ນຍ ຢ່າງເປັນຮູບປະທຳ ເພື່ອຮັກສາເນື້ອທີ່ປ່າປົກຫຸ້ມໃຫ້ໄດ້ 70%, ວາງຄາດໝາຍ 5 ປີຕໍ່ໜ້າ ສູ້ຊົນດຶງດູດນັກທ່ອງທ່ຽວໃຫ້ໄດ້ 5 ລ້ານເທື່ອຄົນ, ໂດຍຕ້ອງປັບປຸງການບໍລິການ, ໂຮງແຮມ, ຮ້ານອາຫານ ແລະ ເຄື່ອງຕ້ອນຂອງຝາກໃຫ້ໄດ້ມາດຕະຖານ, ແກ້ໄຂບັນຫາຄຸນນະພາບການສຶກສາໃຫ້ດີຂຶ້ນ, ພ້ອມທັງຊຸກຍູ້ເດັກເກນອາຍຸໃຫ້ໄດ້ເຂົ້າຮຽນ ແລະ ຫັນປ່ຽນວິທີການຮຽນ-ການສອນໃຫ້ນັກຮຽນເປັນເຈົ້າການ, ຍົກລະດັບການບໍລິການ ແລະ ວັດທະນະທຳຈັນຍາບັນຂອງແພດໝໍຢູ່ໂຮງໝໍຊຸມຊົນ, ເນັ້ນການພັດທະນາສີມືແຮງງານໃຫ້ຊາວໜຸ່ມ ເພື່ອດຶງດູດແຮງງານໃຫ້ມີວຽກເຮັດງານທຳກັບທີ່ຢູ່ທ້ອງຖິ່ນ.
 |
ວຽກງານກໍ່ສ້າງພັກ-ພະນັກງານ ໃຫ້ຖືເອົາ ຄຸນນະພາບ ເປັນກົກ, ເລືອກເອົາຜູ້ທີ່ມີຄວາມບຸກບືນຫ້າວຫັນ ແລະ ໃຫ້ການສຶກສາອົບຮົມດ້ານອຸດົມການໃຫ້ຈະແຈ້ງ, ຮັດແໜ້ນຄວາມສາມັກຄີ ແລະ ການຮ່ວມມືຮອບດ້ານກັບບັນດາແຂວງໃກ້ຄຽງ ໂດຍຜ່ານກົນໄກພົບປະແລກປ່ຽນ, ພ້ອມທັງເພີ່ມທະວີການລາດຕະເວນຕາມຊາຍແດນ ເພື່ອສະກັດກັ້ນການເຂົ້າ-ອອກເມືອງຜິດກົດໝາຍ, ຢາເສບຕິດ ແລະ ການຄ້າມະນຸດ;ສໍາລັບວຽກກວດກາ ຕ້ອງເຂົ້າໃຈວ່າ ວຽກກວດກາແມ່ນໜ້າທີ່ຂອງຄະນະພັກ, ການກວດກາຕ້ອງເຮັດແບບໂປ່ງໃສ (ເຫັນທັງດ້ານດີ ເພື່ອເສີມຂະຫຍາຍ ແລະ ຕຳນິຈຸດອ່ອນເພື່ອແກ້ໄຂ), ຖືເປັນວຽກປົກກະຕິແຕ່ຫົວທີເພື່ອສະກັດກັ້ນການສູນເສຍ ແລະ ຜູ້ທີ່ເປັນພະນັກງານກວດກາ ຕ້ອງມີຄຸນສົມບັດ “ສາຍຕາແຫຼມຄົມ, ຫູໄວ, ໃຈສັດຊື່, ມືສະອາດ”, ເອົາໃຈໃສ່ຄວາມເປັນໃຈກາງເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜນແໜ້ນໜາ, ເຄົາລົບ ແລະ ປະຕິບັດ ຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ ບຸກຄົນຮັບຜິດຊອບ, ຕິດແທດຮາກຖານຕົວຈິງ ພ້ອມທັງ ໃຫ້ຄວາມເຄົາລົບ ແລະ ຍາດແຍ່ງຄຳຄິດຄຳເຫັນຈາກພະນັກງານອາວຸໂສບຳນານ ເພື່ອເປັນບົດຮຽນ ແລະ ກຳລັງແຮງໃນການພັດທະນາແຂວງຄຳມ່ວນໃຫ້ກ້າວຂຶ້ນຢ່າງວ່ອງໄວ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ຂ່າວ: ກອງຄໍາ
ຄໍາເຫັນ