ຈາກທົ່ງນາທີ່ມີເຂົ້າຂຽວງາມ ເຫຼືອພຽງດິນທີ່ແຫ້ງແຕກເຫີບ

ທ່ານ ຄໍາສາ ຍົມສີລາ ປະຊາຊົນບ້ານໜອງຜື ເມືອງໄຊບົວທອງ ແຂວງຄໍາມ່ວນ ໄດ້ເປີດເຜີຍຄວາມເສຍຫາຍດ້ານຜົນຜະລິດ ແລະ ຄວາມຫຍຸ້ງຍາກຕໍ່ສື່ມວນຊົນວ່າ: ໃນໄລຍະຜ່ານມາ, ຄອບຄົວມີເນື້ອທີ່ນາປະມານ 3 ເຮັກຕາ ເຊິ່ງເຄີຍທຳການປູກຝັງ ແລະ ເກັບກ່ຽວຜົນຜະລິດໄດ້ດີມາໂດຍຕະຫຼອດ, ໂດຍສະເລ່ຍແມ່ນໄດ້ເຂົ້າປະມານ 300 ເປົາຕໍ່ປີ. ພໍມາຮອດປີ 2026 ນີ້ ຫຼັງຈາກປັກດຳເຂົ້ານາປີສໍາເລັດ, ເຂົ້າຢູ່ທົ່ງນາກຳລັງແຕກກໍຂຽວງາມ, ກໍມາປະເຊີນກັບເຫດການທີ່ບໍ່ຄາດຄິດ ຊຶ່ງມີປະລິມານນໍ້າມະຫາສານ ໄດ້ໄຫຼມາຈາກຫຼາຍທິດທາງ (ເນື່ອງຈາກເກີດມີຝົນຕົກໜັກຕິດຕໍ່ກັນຫຼາຍວັນ) ໄຫຼເຂົ້າຖ້ວມເນື້ອທີ່ນາທັງໝົດ, ເມື່ອເຫັນສະພາບຄືແນວນັ້ນ ຕົນເອງ ແລະ ຄອບຄົວ ກໍບໍ່ສາມາດແກ້ໄຂຫຍັງໄດ້, ໄດ້ແຕ່ແນມເບິ່ງທົ່ງນາທີ່ກາຍເປັນທະເລນໍ້າສີຂຸ້ນ ແລະ ພາວະນາໃຫ້ນໍ້າຫຼຸດລົງໄວໆ ເພື່ອຈະໄດ້ເຫັນຕົ້ນເຂົ້າທີ່ຍັງລອດຕາຍ ຫວັງຈະໄດ້ເກັບກ່ຽວຜົນຜະລິດຕາມລະດູການ. ແຕ່ສະພາບອາກາດຍິ່ງໂຊກຮ້າຍຊໍ້າຕື່ມ, ເມື່ອຝົນສືບຕໍ່ຕົກລົງຢ່າງຕໍ່ເນື່ອງເປັນເວລາຫຼາຍວັນ ເຮັດໃຫ້ນໍ້າຖ້ວມຂັງຢູ່ໃນນາເຂົ້າເປັນເດືອນໆ, ຕົ້ນເຂົ້າທີ່ປັກດຳ ກໍເນົ່າເປື່ອຍໄປກັບນໍ້າຈົນໝົດ ບໍ່ເຫຼືອຜົນຜະລິດໃຫ້ໄດ້ເກັບກ່ຽວເລີຍ.

ທ່ານ ຄໍາສາ ເລົ່າຕື່ມອີກວ່າ: ເຫດການນ້ຳຖ້ວມຄັ້ງນີ້ ເຮັດໃຫ້ຄອບຄົວຂອງລາວ ປະສົບບັນຫາ ແລະ ມີຄວາມຫຍຸ້ງຍາກຫຼາຍ. ໃນໄລຍະນໍ້າຖ້ວມ ການສັນຈອນໄປມາຫາກິນກໍລຳບາກ ຕ້ອງໄດ້ຂີ່ເຮືອອອກໄປຊອກຫາອາຫານມາລ້ຽງຄອບຄົວ, ຍິ່ງໄປກວ່ານັ້ນ ຍັງມີລູກທີ່ຍັງນ້ອຍ ເຊິ່ງເປັນພາລະໜັກທີ່ຕ້ອງໄດ້ສູ້ຊົນຊອກຫາສິ່ງມາຈຸນເຈືອລ້ຽງລູກໃນຍາມວິກິດແບບນີ້.

ນອກຈາກການເຮັດນາແລ້ວ, ຄອບຄົວກໍເຄີຍປູກຜັກ ເຊັ່ນ: ໝາກເພັດ, ໝາກແຕງ ແລະ ພືດຜັກອື່ນໆ, ແຕ່ຍ້ອນວ່າໃນຄອບຄົວມີແຮງງານໜ້ອຍ ແລະ ໃນລະດູແລ້ງ ນໍ້າທີ່ຈະໃຊ້ເຂົ້າໃນການປູກພືດ ກໍບໍ່ພຽງພໍ ຈຶ່ງສາມາດປູກໄດ້ໃນປະລິມານເລັກນ້ອຍ ພໍໄດ້ກິນໃນຄອບຄົວເທົ່ານັ້ນ ບໍ່ສາມາດຜະລິດເພື່ອຂາຍເປັນສິນຄ້າໄດ້.

ສຳລັບແຜນການໃນຕໍ່ໜ້າ, ທ່ານ ຄໍາສາ ມີຄວາມຄິດຢາກຫັນມາເຮັດ ນາແຊງ ຫຼື ການປູກເຂົ້າໃນລະດູແລ້ງ ໂດຍອາໄສລະບົບຊົນລະປະທານ ເພາະການເຮັດນາແຊງແມ່ນມີຄວາມສະດວກກວ່າ ແລະ ຫຼຸດຜ່ອນຄວາມສ່ຽງຈາກໄພນ້ຳຖ້ວມໄດ້ດີກວ່າການເຮັດນາປີ ທີ່ມີຄວາມສ່ຽງປະເຊີນກັບສະພາບສະພາບອາກາດ ແລະ ໄພທຳມະຊາດຢູ່ເລື້ອຍໆ.

ດັ່ງນັ້ນ, ທ່ານ ຄໍາສາ ຍົມສີລາ ຈຶ່ງໄດ້ຕາງໜ້າໃຫ້ຄອບຄົວ ແລະ ປະຊາຊົນທີ່ປະສົບໄພ ວອນຂໍຄວາມຊ່ວຍເຫຼືອຈາກຂັ້ນເທິງ ແລະ ຂະແໜງການທີ່ກ່ຽວຂ້ອງ ຊ່ວຍເຫຼືອທາງດ້ານເຂົ້າສານ ແລະ ອາຫານແຫ້ງ ເພື່ອບັນເທົາຄວາມເດືອດຮ້ອນໃນຊ່ວງທີ່ຂາດແຄນສະບຽງອາຫານ ເນື່ອງຈາກຜົນຜະລິດຖືກນ້ຳຖ້ວມເສຍຫາຍທັງໝົດ, ພ້ອມນັ້ນກໍສະໜອງທາງດ້ານປັດໄຈການຜະລິດ ເປັນຕົ້ນ ແນວພັນເຂົ້າ ແລະ ແນວພັນພືດຜັກ ຕ່າງໆ ເພື່ອມາຟື້ນຟູການຜະລິດຄືນໃໝ່ ພ້ອມທັງຊ່ວຍກໍ່ສ້າງແລະສ້ອມແປງລະບົບຊົນລະປະທານ ເພື່ອໃຫ້ຊາວກະສິກອນສາມາດເຮັດນາແຊງໄດ້ຢ່າງມີປະສິດທິພາບ ແລະ ຍືນຍົງໃນອະນາຄົດ.

ຂ່າວ: ກອງຄໍາ