 |
ໃນໂອກາດດັ່ງກ່າວ, ທ່ານ ນາງ ວາດສະໜາ ພົມວິຫານ ຕາງໜ້າກຸ່ມ ກຍອວ, ໄດ້ສະແດງຄວາມເຫັນອົກເຫັນໃຈຢ່າງເລິກເຊິ່ງ ຕໍ່ບັນດາຄອບຄົວ ແລະ ປະຊາຊົນທີ່ໄດ້ຮັບຜົນກະທົບຈາກໄພພິບັດແລະ ຫວັງຢ່າງຍິ່ງວ່າ ການປະກອບສ່ວນຊ່ວຍເຫຼືອຄັ້ງນີ້ ຈະເປັນກຳລັງແຮງໜຶ່ງໃນການຊ່ວຍບັນເທົາສະພາບຄວາມຫຍຸ້ງຍາກ ແລະ ເປັນກຳລັງໃຈ ໃຫ້ແກ່ຜູ້ປະສົບໄພ ເພື່ອໃຫ້ສາມາດຟື້ນຟູຊີວິດການເປັນຢູ່ ແລະ ກັບຄືນສູ່ສະພາບປົກກະຕິໂດຍໄວ, ພ້ອມທັງໄດ້ສົ່ງຄວາມຫ່ວງໃຍ, ຄວາມຮັກແພງ ແລະ ຄວາມສາມັກຄີ ຈາກບັນດາສະມາຊິກກຸ່ມ ກຍອວ ໄປຍັງປະຊາຊົນລາວບັນດາເຜົ່າ ທີ່ໄດ້ຮັບຜົນກະທົບຈາກໄພພິບັດຕ່າງໆ.
 |
ໃຫ້ກຽດເຂົ້າຮ່ວມໃນພິທີມອບ-ຮັບການຊ່ວຍເຫຼືອຄັ້ງນີ້ມີ ທ່ານ ໂພໄຊ ໄຊຍະສອນ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຊຶ່ງໄດ້ຕາງໜ້າໃຫ້ຄະນະກໍາມະການຄຸ້ມຄອງໄພພິບັດແຫ່ງຊາດ ສະແດງຄວາມຂອບໃຈຢ່າງຈິງໃຈ ແລະ ຕີລາຄາສູງ ຕໍ່ນໍ້າໃຈຂອງກຸ່ມ ກຍອວ ທີ່ໄດ້ປະກອບສ່ວນເຂົ້າໃນການຊ່ວຍເຫຼືອປະຊາຊົນລາວ ທີ່ກຳລັງປະເຊີນໜ້າກັບຄວາມຫຍຸ້ງຍາກຕ່າງໆ ອັນເນື່ອງມາຈາກໄພພິບັດ. ພ້ອມດຽວກັນນີ້, ທ່ານລັດຖະມົນຕີ ກໍໄດ້ແຈ້ງສະພາບການ ກ່ຽວກັບບັນດາຜົນກະທົບທີ່ເກີດຂຶ້ນຈາກໄພພິບັດ ຢູ່ ສປປ ລາວ ໃນໄລຍະປີ 2025-2026, ການກຳນົດມາດຕະການ ແລະ ແນວທາງໃນການຮັບມື ແລະ ການແກ້ໄຂຜົນກະທົບດັ່ງກ່າວໃນຕໍ່ໜ້າ.
ການຊ່ວຍເຫຼືອຄັ້ງນີ້ ໄດ້ສະແດງໃຫ້ເຫັນເຖິງນໍ້າໃຈແຫ່ງຄວາມສາມັກຄີ, ຄວາມເອື້ອເຟື້ອເຜື່ອແຜ່ ແລະ ການແບ່ງປັນນໍ້າໃຈຂອງບັນດາສະມາຊິກ ກຸ່ມ ກຍອວ ທີ່ມີຕໍ່ປະຊາຊົນລາວ, ຊຶ່ງບໍ່ພຽງແຕ່ເປັນການປະກອບສ່ວນດ້ານມະນຸດສະທຳເທົ່ານັ້ນ, ແຕ່ຍັງເປັນການສົ່ງເສີມບົດບາດຂອງແມ່ຍິງອາຊຽນໃນວຽກງານສັງຄົມ ຢູ່ ສປປ ລາວ, ການເສີມສ້າງສາຍພົວພັນມິດຕະພາບ ແລະ ຄວາມເປັນຈິດໜຶ່ງໃຈດຽວກັນ ລະຫວ່າງປະຊາຊົນຂອງບັນດາປະເທດສະມາຊິກອາຊຽນ ບົນພື້ນຖານແຫ່ງການເປັນປະຊາຄົມອາຊຽນທີ່ຖືເອົາປະຊາຊົນເປັນໃຈກາງ.
(ຂ່າວ: ກຕທ)
ຄໍາເຫັນ