 |
ທ້າວ ບຸນທະໜອມ ວັງມະນີ ອາໄສຢູ່ບ້ານຫາດແຮ່ ເມືອງຫີນບູນ ແຂວງຄຳມ່ວນ ປັດຈຸບັນປະກອບອາຊີບກະສິກຳເປັນຫຼັກ. ກ່ອນໜ້ານີ້ ລາວເຄີຍເຮັດວຽກປະຈຳ ແຕ່ພາຍຫຼັງແມ່ເຖົ້າເສຍຊີວິດ ຈຶ່ງເກີດຄວາມເປັນຫ່ວງພໍ່ເຖົ້າທີ່ບໍ່ມີຄົນຢູ່ດູແລໃກ້ຊິດ. ດ້ວຍເຫດນີ້ ລາວຈຶ່ງຕັດສິນໃຈອອກຈາກວຽກປະຈຳ ກັບມາຢູ່ກັບຄອບຄົວ ພ້ອມທັງສືບຕໍ່ອາຊີບກະສິກຳປູກຝັງທີ່ຄອບຄົວເຄີຍເຮັດມາ, ຈາກການປູກພືດເພື່ອລ້ຽງຊີບ ຄ່ອຍໆພັດທະນາວິທີການຜະລິດ ແລະ ວາງແຜນປູກພືດໄລຍະສັ້ນຫຼາຍຊະນິດ ເຊັ່ນ: ໝາກແຕງ, ໝາກຖົ່ວ, ສາລີ, ໝາກໂມ, ໝາກຟັກ ແລະ ໝາກຫຸ່ງ ເພື່ອໃຫ້ມີຜົນຜະລິດຈຳໜ່າຍຕາມລະດູການ. ສຳລັບລາວແລ້ວ ການເຮັດກະສິກຳບໍ່ແມ່ນພຽງແຕ່ການສ້າງລາຍຮັບ ແຕ່ຍັງເປັນວິທີໜຶ່ງທີ່ຊ່ວຍໃຫ້ໄດ້ຢູ່ໃກ້ຊິດກັບຄອບຄົວ ແລະ ມີເວລາດູແລພໍ່ແມ່. ນີ້ແມ່ນແຮງຈູງໃຈສຳຄັນທີ່ເຮັດໃຫ້ລາວມຸ່ງໝັ້ນສືບຕໍ່ອາຊີບນີ້ຢ່າງຈິງຈັງ.
ໃນບັນດາພືດທີ່ປູກ ໝາກແຕງແມ່ນພືດຫຼັກທີ່ທ້າວ ບຸນທະໜອມວັງມະນີ ໃຫ້ຄວາມສຳຄັນ, ການປູກໝາກແຕງໃຫ້ໄດ້ຜົນດີ ລາວເລີ່ມຈາກການກະກຽມດິນໃຫ້ເໝາະສົມ ໂດຍໄຖດິນປະມານ 2 ເທື່ອ ແລ້ວຕາກດິນໃຫ້ແຫ້ງ ເພື່ອຊ່ວຍຫຼຸດບັນຫາຈາກເຊື້ອໂລກ ແລະ ເຊື້ອລາໃນດິນ. ຫຼັງຈາກກະກຽມດິນແລ້ວ ຈະມີການໃສ່ປຸ໋ຍ ແລະ ປູຜ້າຢາງຄຸມໜ້າດິນ ເພື່ອຫຼຸດຜ່ອນການເກີດຫຍ້າ ແລະ ວັດສະພືດ ຊ່ວຍໃຫ້ການດູແລຮັກສາສະດວກຂຶ້ນ. ນອກນີ້ ຍັງນຳໃຊ້ລະບົບນ້ຳຢອດ ເພື່ອສົ່ງນ້ຳໄປຫາຮາກພືດໂດຍກົງ ຊ່ວຍຫຼຸດເວລາໃນການຫົດນ້ຳ ແລະ ສະດວກຕໍ່ການໃຫ້ປຸ໋ຍຜ່ານລະບົບນ້ຳ, ສຳລັບການປູກ ລາວຈະຢອດເມັດໝາກແຕງລົງດິນ ໂດຍທົ່ວໄປປະມານ 2-3 ມື້ ເມັດກໍຈະເລີ່ມງອກ. ຈາກນັ້ນ ຈຶ່ງໃຫ້ນ້ຳຕາມຄວາມຊຸ່ມຂອງດິນ ແລະ ຄວາມຕ້ອງການຂອງຕົ້ນພືດ ພ້ອມທັງໃຫ້ປຸ໋ຍອິນຊີປະສົມກັບປຸ໋ຍທົ່ວໄປຜ່ານລະບົບນ້ຳຢອດ ເພື່ອຊ່ວຍໃຫ້ພືດໄດ້ຮັບນ້ຳ ແລະ ສານອາຫານຢ່າງສະໝ່ຳສະເໝີ. ການນຳໃຊ້ເຕັກນິກ ແລະ ວິທີການຜະລິດແບບນີ້ ຊ່ວຍໃຫ້ການເຮັດສວນສະດວກຂຶ້ນ ແຕ່ການປູກພືດໃຫ້ໄດ້ຜົນດີຍັງຕ້ອງອາໄສການສັງເກດຕົ້ນພືດ, ການໃຫ້ນ້ຳ ແລະ ປຸ໋ຍຢ່າງເໝາະສົມ ລວມທັງການປ້ອງກັນແມງໄມ້ ແລະ ພະຍາດພືດ. ຈຸດເດັ່ນອີກຢ່າງໜຶ່ງຂອງການເຮັດກະສິກຳຄອບຄົວນີ້ ແມ່ນການວາງແຜນປູກພືດໄລຍະສັ້ນໝູນວຽນກັນ. ໝາກແຕງສາມາດປູກໄດ້ປະມານ 3-4 ຮອບຕໍ່ປີ ໂດຍສະຫຼັບກັບການປູກໝາກໂມ, ໝາກຖົ່ວ, ສາລີ ແລະ ໝາກຟັກ ຕາມຄວາມເໝາະສົມຂອງແຕ່ລະ ລະດູການ. ການປູກພືດຫຼາຍຊະນິດ ແລະ ໝູນວຽນຕາມແຜນ ຊ່ວຍໃຫ້ຄອບຄົວມີໂອກາດເກັບກ່ຽວ ແລະ ຈຳໜ່າຍຜົນຜະລິດໃນຫຼາຍຊ່ວງຂອງປີ ເປັນການສ້າງລາຍຮັບໃຫ້ມີຄວາມຕໍ່ເນື່ອງຕະຫຼອດປີ.
ຈາກການຜະລິດກະສິກຳຢ່າງຕໍ່ເນື່ອງ ສາມາດສ້າງລາຍຮັບໄດ້ປະມານ 200 ລ້ານ ຫາ 400 ລ້ານກີບຕໍ່ປີ. ສຳລັບການຈຳໜ່າຍຜົນຜະລິດ ແມ່ນຂາຍໃຫ້ພໍ່ຄ້າແມ່ຄ້າທົ່ວໄປ ຊາວບ້ານໃນຊຸມຊົນ ແລະ ພໍ່ຄ້າຈາກເມືອງທ່າແຂກ.
 |
ທ້າວ ບຸນທະໜອມ ວັງມະນີ ໃຫ້ຮູ້ຕື່ມວ່າ: ສໍາລັບສິ່ງທ້າທາຍໃນການປູກພືດກະສິກຳ ບັນຫາທຳອິດແມ່ນແມງໄມ້ ແລະ ສັດຕູພືດທີ່ອາດສ້າງຄວາມເສຍຫາຍໃຫ້ແກ່ຕົ້ນພືດ ສົ່ງຜົນຕໍ່ປະລິມານ ແລະ ຄຸນນະພາບຜົນຜະລິດ. ນອກນີ້ ລາຄາປຸ໋ຍ ແລະ ສະພາບອາກາດທີ່ປ່ຽນແປງ ກໍມີຜົນຕໍ່ຕົ້ນທຶນ ແລະ ການເຕີບໂຕຂອງພືດ, ອີກບັນຫາໜຶ່ງທີ່ຕ້ອງຮັບມືແມ່ນລາຄາຜົນຜະລິດທີ່ບໍ່ແນ່ນອນ. ບາງຊ່ວງລາຄາສູງ ແຕ່ບາງຊ່ວງລາຄາຕົກຕ່ຳ ຫຼື ມີຜົນຜະລິດອອກສູ່ຕະຫຼາດຫຼາຍຈົນລົ້ນຕະຫຼາດ. ສະພາບດັ່ງກ່າວອາດເຮັດໃຫ້ລາຍຮັບຂອງຊາວກະສິກອນຜັນຜວນ ເຖິງແມ່ນຈະຜະລິດໄດ້ຫຼາຍກໍຕາມ. ດັ່ງນັ້ນ ນອກຈາກການຜະລິດໃຫ້ໄດ້ຜົນດີແລ້ວ ການຕິດຕາມລາຄາຕະຫຼາດ ການວາງແຜນເວລາປູກ ແລະ ການຊອກຫາຊ່ອງທາງຈຳໜ່າຍທີ່ເໝາະສົມ ຈຶ່ງເປັນສິ່ງສຳຄັນທີ່ຊ່ວຍຫຼຸດຄວາມສ່ຽງໃນການປະກອບອາຊີບ.
ຈາກປະສົບການທີ່ຜ່ານມາ ທ້າວ ບຸນທະໜອມ ວັງມະນີ ເຫັນວ່າ ການເຮັດກະສິກຳໃຫ້ປະສົບຜົນສຳເລັດຕ້ອງມີຄວາມດຸໝັ່ນ ຂະຫຍັນພຽນ ແລະ ອົດທົນ ເພາະເປັນອາຊີບທີ່ຕ້ອງເຮັດວຽກກາງແຈ້ງ ປະເຊີນທັງແດດ, ຝົນ ແລະ ສະພາບອາກາດທີ່ປ່ຽນແປງ. ພ້ອມກັນນີ້ ຊາວກະສິກອນຕ້ອງຫັນມາໃສ່ໃຈການຮຽນຮູ້ເຕັກນິກໃໝ່ໆ ແລະ ປັບປຸງວິທີການຜະລິດຂອງຕົນຢູ່ສະເໝີ ເພື່ອຫຼຸດຕົ້ນທຶນ ເພີ່ມປະສິດທິພາບການຜະລິດ ແລະ ຫຼຸດຜົນເສຍຫາຍທີ່ອາດເກີດຂຶ້ນ. ສິ່ງສຳຄັນອີກປະການໜຶ່ງ ແມ່ນການວາງແຜນປູກພືດໝູນວຽນໃຫ້ເໝາະສົມກັບແຕ່ລະ ລະດູການ ແລະ ຄວາມຕ້ອງການຂອງຕະຫຼາດ ເພື່ອໃຫ້ມີຜົນຜະລິດອອກຈຳໜ່າຍຢ່າງຕໍ່ເນື່ອງ ບໍ່ໃຫ້ລາຍຮັບຂາດຊ່ວງ ແລະ ຊ່ວຍກະຈາຍຄວາມສ່ຽງຈາກການປູກພືດຊະນິດດຽວ.
ຄໍາເຫັນ