 |
ກອງປະຊຸມ ໄດ້ຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານຮອບດ້ານ ຂອງຄະນະພັກຮາກຖານ ປະຈຳ 3 ເດືອນ (ກໍລະກົດ, ສິງຫາ ແລະ ເດືອນກັນຍາ) ແລະ ທິດທາງແຜນການ 3 ເດືອນທ້າຍປີ 2026; ຄະນະພັກຮາກຖານ ຖືສຳຄັນໃນການສຶກສາອົບຮົມການເມືອງແນວຄິດ ໃຫ້ຖັນແຖວສະມາຊິກພັກ, ພະນັກງານ-ລັດຖະກອນ ໂດຍໄດ້ຈັດຕັ້ງເຜີຍແຜ່, ເຊື່ອມຊຶມມະຕິ, ຄໍາສັ່ງ, ຂໍ້ກຳນົດ, ກົດລະບຽບ ແລະ ເນື້ອໃນເອກະສານສຳຄັນຂອງພັກ ເພື່ອຍົກສູງຄວາມຮັບຮູ້ ແລະ ຄວາມເຂົ້າໃຈຂອງສະມາຊິກພັກ, ພະນັກງານ-ລັດຖະກອນ ຕໍ່ແນວທາງນະໂຍບາຍຂອງພັກ; ເຮັດໃຫ້ສະມາຊິກພັກ ແລະ ພະນັກງານມີແນວຄິດໜັກແໜ້ນ, ເຊື່ອໝັ້ນຕໍ່ການນໍາພາຂອງພັກ, ຮັກສາຄວາມສາມັກຄີ ແລະ ມີຄວາມຫ້າວຫັນໃນການປະຕິບັດໜ້າທີ່ການເມືອງ ເປັນຕົ້ນປະສານສົມທົບພາກສ່ວນກ່ຽວຂ້ອງໃນການຈັດກອງປະຊຸມເຊື່ອມຊຶມມະຕິ XII ຂອງພັກ, ມະຕິ X ຂອງອົງຄະນະພັກແຂວງສາລະວັນ, ຈັດຕັ້ງອົບຮົມຫົວຂໍ້ຕ່າງໆ ເຊັ່ນ: ອົບຮົມຜູ້ຊົງຄຸນວຸດທິບັນດາຊົນເຜົ່າ ແລະ ປະຊາຊົນລຽບຕາມຊາຍແດນ ປະຈຳປີ 2026. ຕິດຕາມ, ຊຸກຍູ້ການເຜີຍແຜ່ມະຕິ ແລະ ເອກະສານສຳຄັນໃຫ້ແກ່ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າທົ່ວແຂວງ ລວມມີ 22,486 ເທື່ອຄົນ, ຍິງ 9,130 ເທື່ອຄົນ, ເອົາໃຈໃສ່ຈັດຕັ້ງປາຖະກະຖາ ມູນເຊື້ອວັນສຳຄັນຕ່າງໆຂອງຊາດ, ຂອງພັກ ມີຈຳນວນພົນເຂົ້າຮ່ວມທັງໝົດ 4,429 ທ່ານ, ທັງໄດ້ນໍາພາຄົ້ນຄວ້າ, ປັບປຸງສ້າງຕາໜ່າງ ເພື່ອນຮ່ວມງານ, ຕິດຕາມເກັບກຳຫາງສຽງສັງຄົມ, ອັນພົ້ນເດັ່ນ ແມ່ນໄດ້ສຳເລັດການແຕ່ງຕັ້ງຄະນະຊີ້ນຳຂັ້ນແຂວງ ຕິດຕາມ, ເກັບກຳສະພາບແນວຄິດ, ຫາງສຽງສັງຄົມ ແລະ ສຳເລັດການຝຶກອົບຮົມວຽກງານດັ່ງກ່າວ.
 |
ສຳລັບການນຳພາຕໍ່ວຽກງານສື່ມວນຊົນ ສາມາດເຄື່ອນໄຫວເກັບກຳຂ່າວ, ຜະລິດຂ່າວໄດ້ທັງໝົດ 1,152 ຂ່າວ, ໄດ້ອອກອາກາດທາງວິທະຍຸກະຈາຍສຽງໄດ້ 104 ຊົ່ວໂມງ, ປັດຈຸບັນທົ່ວແຂວງ ມີໂທລະໂຄ່ງທັງໝົດ ຈຳນວນ 538 ຊຸດ, ມີ 956 ປາກ ແລະ ບ້ານບໍ່ທັນມີໂທລະໂຄ່ງໃຊ້ 40 ບ້ານ, ນອກນັ້ນ, ກໍໄດ້ຕີລາການນຳພາວຽການອົງການຈັດຕັ້ງມະຫາ ຊົນ ແລະ ວຽກງານອື່ນໆ.
ຈາກນັ້ນ, ໄດ້ເຜີຍແຜ່ທິດທາງຈຸດສຸມໃນການເຄື່ອນໄຫວວຽກງານກວດກາ 5 ປີ (2026-2030) ແລະ ແຜນພັດທະນາວຽກງານກວດກາທົ່ວແຂວງສາລະວັນ ໄລຍະ 5 ປີ; ພ້ອມທັງຜ່ານເນື້ອໃນບົດໂອ້ລົມຂອງ ສະຫາຍ ດາວວົງ ພອນແກ້ວ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ທັງໄດ້ຕີລາຄາແຜນພັດທະນາວຽກງານ ແລະ ການປະຕິບັດງົບປະມານ.
ສະຫາຍ ມະໄລວອນ ສີປະເສີດ ໄດ້ເນັ້ນໃຫ້ຄະນະພັກ ແລະ ຄະນະໜ່ວຍພັກ ສືບຕໍ່ຍົກສູງຄວາມຮັບຜິດຊອບໃນການນໍາພາວຽກງານການເມືອງ-ແນວຄິດ ໃຫ້ມີຄວາມໜັກແໜ້ນ, ເຂັ້ມແຂງ, ເພີ່ມທະວີ ຕິດຕາມກວດກາ ແລະ ເອົາໃຈໃສ່ການປະເມີນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ພ້ອມທັງປັບປຸງແບບແຜນນໍາພາ-ແບບແຜນວິທີເຮັດວຽກ ຕິດພັນກັບການປະຕິບັດໜ້າທີ່ການເມືອງ ວຽກວິຊາສະເພາະໃຫ້ລະອຽດ ເພື່ອໃຫ້ສາມາດຕິດຕາມ ແລະ ປະເມີນຜົນໄດ້ຢ່າງມີປະສິດທິພາບ.
ພາບ-ຂ່າວ: ສ.ພະຈັນ
ຄໍາເຫັນ