 |
ທ່ານ ແສງອາລຸນ ຫອມສົມບັດ ຮັກສາການຫ້ອງການກະສິກຳ ແລະ ສິ່ງແວດລ້ອມເມືອງຫີນບູນ ແຂວງຄໍາມ່ວນ ໃຫ້ຮູ້ວ່າ: ສຳລັບການຜະລິດນາປີ 2026 ໃນທົ່ວເມືອງ ມີເນື້ອທີ່ 9,050 ເຮັກຕາ, ຄາດຄະເນຜົນຜະລິດ 31,675 ໂຕນ, ສ່ວນການປູກພືດລະດູຝົນ ມີເນື້ອທີ່ 720 ເຮັກຕາ, ຄາດຄະເນຜົນຜະລິດ 7,992 ໂຕນ. ແຕ່ຍ້ອນໄພນ້ຳຖ້ວມທີ່ເກີດຂຶ້ນ ໄດ້ສ້າງຄວາມເສຍຫາຍຕໍ່ເນື້ອທີ່ນາປີ ແລະ ພື້ນທີ່ປູກພືດຂອງປະຊາຊົນ, ລວມທັງສວນປູກພືດ, ສວນຢາງພາລາ ຖືກນໍ້າຖ້ວມເສຍຫາຍກວ່າ 3,519 ເຮັກຕາ. ນອກນີ້ຍັງມີປະເພດ ສັດລ້ຽງ ເຊັ່ນ: ງົວ, ຄວາຍ, ແບ້, ໝູ ແລະ ສັດປີກ, ຕະຫຼອດຮອດໜອງປາ ແລະ ໂຄງລ່າງພື້ນຖານດ້ານການຜະລິດກະສິກຳ. ໃນນັ້ນ ມີລະບົບຊົນລະປະທານ 21 ໂຄງການ ໄດ້ຮັບຄວາມເສຍຫາຍ, ມີຄວາມຍາວລວມກວ່າ 48,000 ແມັດ ລວມມູນຄ່າເສຍຫາຍທັງໝົດປະມານ 81 ຕື້ກີບ.
ທ່ານ ແສງອາລຸນ ໃຫ້ຮູ້ຕື່ມວ່າ: ສຳລັບແຜນການຟື້ນຟູເບື້ອງຕົ້ນ ໄດ້ສະເໜີຂໍງົບປະມານຈາກຂັ້ນເມືອງ, ຂັ້ນແຂວງ ເພື່ອຈັດຊື້ແນວພັນເຂົ້າ, ແນວພັນພືດ, ຝຸ່ນຊີວະພາບ ແລະ ປັດໄຈການຜະລິດອື່ນໆຕອບສະໜອງໃຫ້ແກ່ປະຊາຊົນ. ນອກນີ້ ຍັງມີແຜນຟື້ນຟູລະບົບຊົນລະປະທານ, ພ້ອມທັງສະເໜີງົບປະມານຈັດຊື້ຢາປິ່ນປົວພະຍາດ, ຢາປ້ອງກັນພະຍາດສັດ ແລະ ອຸປະກອນສັດຕະວະແພດ.ພ້ອມກັນນັ້ນ ກໍໄດ້ມີການແຈ້ງການໄປຍັງບັນດາບ້ານ ທີ່ນອນຢູ່ໃນບັນດາໂຄງການທີ່ໄດ້ຮັບຜົນກະທົບ ໃຫ້ເລັ່ງອະນາໄມ ແລະ ສ້ອມແປງຄອງຊົນລະປະທານ ເພື່ອກະກຽມນຳໃຊ້ໃນການຜະລິດລະດູແລ້ງ ແລະ ປູກພືດທົດແທນຫຼັງນ້ຳຫຼຸດລົງ. ຂະນະດຽວກັນ ເມືອງຍັງສືບຕໍ່ສົ່ງເສີມການຜະລິດກະສິກຳທີ່ເປັນມິດຕໍ່ສິ່ງແວດລ້ອມ ຜ່ານການຝຶກອົບຮົມ ແລະ ສະໜັບສະໜູນອຸປະກອນການຜະລິດໃຫ້ແກ່ 11 ກຸ່ມກະສິກໍາ. ພ້ອມທັງມີໂຄງການພັດທະນາພູມິທັດ 29 ໂຄງການ ໃນ 29 ບ້ານ ເພື່ອສະໜັບສະໜູນກອງທຶນພັດທະນາຊີວິດການເປັນຢູ່ ໃຫ້ປະຊາຊົນກູ້ຢືມໄປລົງທຶນໃນການປູກຝັງ ແລະ ລ້ຽງສັດ.
ຂ່າວ: ກອງຄໍາ
ຄໍາເຫັນ