 |
ທ່ານ ຄໍາເກັ່ງ ຈັນທະວີສຸກ ກຳມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານບົດສະຫຼຸບໃຫ້ຮູ້ວ່າ: ບັ້ນຫັນລົງກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດ ແລະແກ້ໄຂຄວາມທຸກຍາກຂອງປະຊາຊົນ ຢູ່ຕາແສງຫ້ວຍໂອດເມືອງປາກອູ ໄດ້ດຳເນີນໃນລະຫວ່າງວັນທີ່ 27 ກັນຍາ ຫາ ວັນທີ່ 2 ຕຸລາ 2026 ໂດຍເລ່ງໃສ່ 7 ບ້ານເປົ້າໝາຍຄື: ບ້ານຫ້ວຍໂອດ, ບ້ານບວກຄວາຍ, ບ້ານພູປັກເກີ, ບ້ານຫ້ວຍເລີນ, ບ້ານຜາປົ່ນ, ບ້ານຢານາງ ແລະບ້ານຫ້ວຍເຢັນ, ລວມມີ 850 ຄອບຄົວ, ພົນລະເມືອງທັງໝົດ 5,158 ຄົນ, ຍິງ 2,370 ຄົນ, ປັດຈຸບັນ ມີຄອບຄົວພົ້ນທຸກ 592 ຄອບຄົວ, ຄອບຄົວທຸກຍາກ 258 ຄອບຄົວ, ຄອບຄົວພັດທະນາ 293 ຄອບຄົວ, ປະກອບມີ 3 ເຜົ່າຄື: ເຜົ່າມົ້ງ, ເຜົ່າກຶມມຸ ແລະເຜົ່າລາວລຸ່ມຈໍານວນໜຶ່ງ, ຜົນການຈັດຕັ້ງປະຕິບັດ ໃນການລົງຮາກຖານຄັ້ງນີ້ ຄະນະຊີ້ນໍາຂັ້ນແຂວງ-ຂັ້ນເມືອງ ແລະຄະນະຮັບຜິດຊອບ ໄດ້ນໍາເອົາເອກະສານສຳຄັນເຜີຍແຜ່ໃຫ້ປະຊາຊົນ ຮັບຮູ້ເຂົ້າໃຈ ພ້ອມດໍາເນີຊີວິດການເມືອງ ສາມາດຕີລາຄາຈັດປະເພດ ສະມາຊິກພັກຢູ່ພາຍໃນກຸ່ມຫ້ວຍໂອດມີທັງໝົດ 86 ສະຫາຍ, ຍິງ 6 ສະຫາຍ ໄດ້ປະເພດແຂງ 80 ສະຫາຍ, ກາງ 2 ສະຫາຍ, ອອ່ນ 1 ສະຫາຍ ແລະບໍ່ໄດ້ຈັດປະເພດ 3 ສະຫາຍ.
ຈາກນັ້ນ ຄະນະຊີ້ນໍາຂອງແຂວງ ແລະເມືອງ ໄດ້ຂຶ້ນປະກອບຄໍາເຫັນ ຕໍ່ກັບການລົງກໍ່ສ້າງຮາກຖານການເມືອງ ເພື່ອເປັນບ່ອນອີງ ໃນການຈັດຕັ້ງປະຕິບັດໃນກຸ່ມຕໍ່ໄປ ໃຫ້ໄດ້ຮັບຜົນດີ.
 |
ທ່ານ ບຸນເລື່ອມ ມະນີວົງ ໄດ້ສະແດງຄວາມຊົມເຊີຍ ຕໍ່ຜົນສໍາເລັດການລົງກໍ່ສ້າງຮາກຖານການເມືອງໃນຄັ້ງນີ້,ພ້ອມທັງສະເໜີໃຫ້ຄະນະພັກ-ຄະນະກຳມະການປົກຄອງເມືອງ ສືບຕໍ່ຊີ້ນໍາ-ນໍາພາວຽກງານຮອບດ້ານ ໃນຕາແສງຫ້ວຍໂອດຢ່າງໃກ້ສິດຕິດແທດ, ນໍາພາຈັດຕັ້ງປະຕິບັດວຽກງານ ໃຫ້ເປັນລະບົບເພື່ອຍົກສູງບົດບາດ ສິດ-ໜ້າທີ່ ຂອງວຽກງານຕາແສງ ໃຫ້ໜັກແໜ້ນເຂັ້ມແຂງ, ຊຸກຍູ້ທ່າແຮງດ້ານການພັດທະນາຊົນນະບົດ ສົ່ງເສີມການປູກ-ການລ້ຽງ ເພືອແກ້ໄຂຄວາມທຸກຍາກ ໃຫ້ຫຼຸດນ້ອຍຖອຍລົງ, ສຶກສາອົບຮົມການເມືອງແນວຄິດ ໃຫ້ການຈັດຕັ້ງບ້ານ ປະຊາຊົນແຕ່ລະບ້ານ ເຂົ້າໃຈຕໍ່ແນວທາງລະບຽບກົດໝາຍຂອງພັກຢ່າງທົ່ວເຖິງ ເພື່ອແກ້ໄຂບັນຫາປະກົດການຫຍໍ້ທໍ້ ທີ່ເກີດຂຶ້ນຢູ່ບັນດາບ້ານພາຍໃນຕາແສງຫ້ວຍໂອດ ໃຫ້ມີຄວາມສະຫງົບ ແລະເປັນລະບຽບຮຽບຮ້ອຍ ຢ່າງໜັກແໜ້ນ.
ໂອກາດນີ້ ທ່ານ ບຸນເລື່ອມ ມະນີວົງ ໄດ້ມອບງົບປະມານ ຈໍານວນ 30,000,000 ກີບ ເພື່ອຊຸກຍູ້ວຽກງານພາຍໃນຕາແສງຫ້ວຍໂອດ ຕື່ມອີກ.
ຂ່າວ-ພາບ: ຄຳອ້ວນ
ຄໍາເຫັນ