 |
ທ່ານ ບຸນເພັງ ສີສະຫວັດ ໄດ້ກ່າວວ່າ: ວຽກງານໂຄສະນາສຶກສາຄວາມສ່ຽງໄພຈາກ ລບຕ ເປັນວຽກທີ່ມີຄວາມສຳຄັນຍິ່ງ ເພື່ອສ້າງຄວາມຮັບຮູ້, ຄວາມປອດໄພ ແລະ ວິທີຫຼີກລ່ຽງອັນຕະລາຍໃຫ້ແກ່ປະຊາຊົນ ເຊິ່ງປັດຈຸບັນວຽກ ງານດັ່ງກ່າວ ໄດ້ຈັດຕັ້ງປະຕິບັດໃນ 15 ແຂວງທົ່ວປະເທດ ໂດຍມີອົງການປະຕິບັດງານກ່ຽວຂ້ອງ 12 ອົງການ, ພ້ອມທັງໄດ້ຮ່ວມມືກັບກົມສື່ມວນຊົນ, ວິທະຍຸກະຈາຍສຽງແຫ່ງຊາດ ແລະ ສະຖານີວິທະຍຸ 11 ແຂວງ/ນະຄອນຫຼວງ, ເຖິງຢ່າງໃດກໍຕາມ ນັບແຕ່ປີ 2008 ເປັນຕົ້ນມາ ທົ່ວປະເທດມີອຸບັດຕິເຫດເກີດຂຶ້ນ 756 ຄັ້ງ, ມີຜູ້ເຄາະຮ້າຍ 1,229 ຄົນ (ເສຍຊີວິດ 310 ຄົນ ແລະ ບາດເຈັບ 919 ຄົນ) ສະເພາະປີ 2026 ນີ້ ເກີດຂຶ້ນ 13 ຄັ້ງ, ມີຜູ້ເຄາະຮ້າຍ 24 ຄົນ (ບາດເຈັບ 23 ຄົນ ແລະ ເສຍຊີວິດ 1 ຄົນ). ໃນໄລຍະປີ 2015 ເຖິງປັດຈຸບັນ ໄດ້ຊ່ວຍເຫຼືອຜູ້ ຖືກເຄາະຮ້າຍ 1,936 ຄົນ (ລວມ 2,313 ເທື່ອຄັ້ງ) ດ້ວຍງົບປະມານກວ່າ 3.5 ຕື້ກີບ.
ທ່ານ ຍັງໃຫ້ຮູ້ຕື່ມວ່າ: ຕັ້ງແຕ່ປີ 1996 ຮອດເດືອນຕຸລາ 2026 ໄດ້ຈັດກິດຈະກຳໂຄສະນາແບບເຊິ່ງໜ້າຢູ່ 4,471 ບ້ານ, ເຂົ້າເຖິງຜູ້ໄດ້ຮັບຜົນປະໂຫຍດກວ່າ 6 ລ້ານເທື່ອຄົນ, ສຳລັບການໂຄສະນາຜ່ານລາຍການວິທະຍຸ 15 ແຂວງ ໃນປີ 2026 ນີ້ ໄດ້ອອກອາກາດ 752 ຄັ້ງ, ເຂົ້າເຖິງຜູ້ຟັງ 882,389 ຄົນ, ນອກຈາກນີ້ ຍັງໄດ້ມອບຄອມພິວເຕີ ແລະ ເຄື່ອງອັດສຽງ ໃຫ້ແກ່ວິທະຍຸທັງ 12 ພາກສ່ວນ ຜ່ານໂຄງການສ້າງຂີດຄວາມສາມາດ ດ້ານການຄຸ້ມຄອງຂໍ້ມູນຂ່າວສານ, ຈັດຕັ້ງໂດຍອົງການຊ່ວຍເຫຼືອລ້າປະຊາຊົນນອກແວ ແລະ ໄດ້ຮັບການສະໜັບສະໜູນໂດຍສະຫະລັດອາເມຣິກາ ລວມມູນຄ່າ 495,429,566 ກີບ.
 |
ກອງປະຊຸມຄັ້ງນີ້ ແມ່ນເນັ້ນໃສ່ການສະຫຼຸບຖອດຖອນບົດຮຽນການຈັດຕັ້ງປະຕິບັດລາຍການວິທະຍຸ “ເສັ້ນທາງສູ່ປອດໄພ” ໃນໄລຍະຜ່ານມາ, ພ້ອມທັງປຶກສາຫາລືບາງວຽກຈຸດສຸມຄື: ການປະເມີນຮູບການ, ພາສາ ແລະ ປະສິດທິພາບຂອງສື່ໂຄສະນາ ໃຫ້ເຂົ້າເຖິງກຸ່ມເປົ້າໝາຍ; ການຜັນຂະຫຍາຍການຈັດລາຍການໄປສູ່ສື່ອອນລາຍ; ການນຳເອົານະໂຍບາຍ ການຊ່ວຍເຫຼືອ ຜູ້ຖືກເຄາະຮ້າຍເຂົ້າໃນເນື້ອໃນໂຄສະນາໃຫ້ຫຼາຍຂຶ້ນ; ການສົ່ງບົດລາຍງານຜ່ານລະບົບອອນລາຍ; ການຂະຫຍາຍຄວາມຮ່ວມມືກັບກອງວິທະຍຸຊາວໜຸ່ມ/ກອງທັບ ແລະ ພັດທະນາໂຄງການໂທລະໂຄ່ງບ້ານ-ໂຮງຮຽນໃນໄລຍະຕໍ່ໄປ.
ທັງນີ້ກໍເພື່ອຊຸກຍູ້ວຽກງານໂຄສະນາສຶກສາໄພຈາກລະເບີດບໍ່ທັນແຕກ ຜ່ານສື່ວິທະຍຸ ແລະ ສື່ອອນລາຍ ໃຫ້ມີປະສິດທິພາບສູງຂຶ້ນ ເພື່ອປົກປ້ອງຊີວິດ ແລະ ຄວາມປອດໄພຂອງປະຊາຊົນບັນດາເຜົ່າຈາກໄພອັນຕະລາຍຈາກລະເບີດບໍ່ທັນແຕກ.
ຄໍາເຫັນ