 |
ທ່ານ ໄຊປະເສີດ ພັນທະວົງ ຮອງຫົວໜ້າຫ້ອງການກະສິກຳ ແລະ ສິ່ງແວດລ້ອມ ເມືອງໄຊບົວທອງ ແຂວງຄໍາມ່ວນ ໃຫ້ຮູ້ວ່າ: ໃນປີນີ້ ເມືອງມີແຜນການປັກດຳເຂົ້ານາປີທັງໝົດ 10,110 ເຮັກຕາ, ສາມາດປັກດຳຕົວຈິງໄດ້ 9,908 ເຮັກຕາ (ຄິດເປັນ 98%). ໃນນັ້ນ, ສະພາບນໍ້າຖ້ວມ ໄດ້ເຮັດໃຫ້ເນື້ອທີ່ນາຖືກຜົນກະທົບເສຍຫາຍເຖິງ 1,337 ເຮັກຕາ ແລະ ລະບົບຊົນລະປະທານເປ່ເພເສຍຫາຍ ລວມມູນຄ່າ 2.11 ຕື້ກີບ.
ພາຍຫຼັງລະດັບນ້ຳຫຼຸດລົງ,ຫ້ອງການກະສິກຳ ແລະ ສິ່ງແວດລ້ອມເມືອງ ໄດ້ວາງມາດຕະການ ແລະແຜນຟື້ນຟູຢ່າງຮີບດ່ວນ 3 ດ້ານຫຼັກໆ ຄື: ເລັ່ງສ້ອມແປງລະບົບຊົນລະປະທານທີ່ໄດ້ຮັບຜົນເສຍຫາຍຈຳນວນ 4 ແຫ່ງ ເພື່ອໃຫ້ສາມາດກັບມາສະໜອງນ້ຳຮັບໃຊ້ການຜະລິດໃຫ້ປະຊາຊົນໄດ້ທັນການ, ຈັດຕັ້ງການສະໜອງແນວພັນສັດ ແລະແນວພັນພືດ ໃຫ້ປະຊາຊົນໄດ້ປູກພືດລະດູແລ້ງທີ່ເປັນພືດໄລຍະສັ້ນ ແລະ ຊຸກຍູ້ສົ່ງເສີມໃຫ້ປະຊາຊົນປູກເຂົ້ານາແຊງໃນຈຸດທີ່ມີເງື່ອນໄຂ ເຊັ່ນ: ທີ່ຊົນລະປະທານຫ້ວຍນ້ຳປຽດ ບ້ານນາຂາມ ຊຶ່ງມີເນື້ອທີ່ປະມານ 10 ເຮັກຕາ, ພ້ອມທັງກຽມສະໜອງແນວພັນເຂົ້າລຸ້ນທີ 2 ແລະ ທີ 3 ຕື່ມອີກ.
 |
ສຳລັບແຜນການໃນຕໍ່ໜ້າ ທາງເມືອງຍັງມີໂຄງການກໍ່ສ້າງຊົນລະປະທານ (ແບບສູບນໍ້າ) ຢູ່ ບ້ານແກ້ງຈອນ ທີ່ສາມາດຂະຫຍາຍເນື້ອທີ່ການຜະລິດໄດ້ປະມານ 100 ເຮັກຕາ ແລະຮອງຮັບການປູກເຂົ້ານາແຊງ, ປັດຈຸບັນໄດ້ເລີ່ມຈັດຕັ້ງປະຕິບັດການກໍ່ສ້າງ ໂດຍມີຄວາມຄືບໜ້າປະມານ 38% ແລະມີແຜນການທີ່ຈະໃຫ້ການກໍ່ສ້າງສຳເລັດສົມບູນ ທັນໃນຊ່ວງລະດູຜະລິດເຂົ້ານາແຊງ ໃນປີ 2028.
ນອກນີ້ ເພື່ອຮັບມືການປ່ຽນແປງຂອງດິນຟ້າອາກາດ, ຫ້ອງການກະສິກຳແລະສິ່ງແວດລ້ອມເມືອງ ຍັງສຸມໃສ່ຊຸກຍູ້ໃຫ້ປະຊາຊົນຫັນມາປູກພືດລະດູແລ້ງໄລຍະສັ້ນທີ່ເໝາະສົມກັບສະພາບພື້ນທີ່ຕົວຈິງ ເຊັ່ນ: ສາລີ, ໝາກຖົ່ວ, ໝາກແຕງ ແລະພືດຜັກຊະນິດຕ່າງໆ ເພື່ອສ້າງລາຍຮັບທົດແທນ ແລະຫຼຸດຜ່ອນຜົນກະທົບຈາກໄພພິບັດທາງທຳມະຊາດໃນອະນາຄົດ.
ຂ່າວ: ກອງຄໍາ
ຄໍາເຫັນ