 |
ທ່ານ ນາງ ດາລານີ ພົມມະວົງສາ ໄດ້ກ່າວວ່າ: ການທ່ອງທ່ຽວເປັນວຽກງານສໍາຄັນ ລັດຖະບານໄດ້ຖືເປັນຂະແໜງເສດຖະກິດປາຍແຫຼມໃນການພັດທະນາເສດຖະກິດ-ສັງຄົມຂອງປະເທດ ຊຶ່ງຊ່ວຍຂັບເຄື່ອນ ແລະ ກະຕຸ້ນເສດຖະກິດທີ່ເປັນຕ່ອງໂສ້ບໍລິການ ຢ່າງກວ້າງຂວາງ ສ້າງວຽກເຮັດງານທໍາ ແລະ ລາຍຮັບໃຫ້ແກ່ປະຊາຊົນທ້ອງຖິ່ນ, ຜົນງານຕົວຈິງກໍໄດ້ບົ່ງບອກໃຫ້ເຫັນ ໃນຫຼາຍປີຜ່ານມາ ເຫັນວ່າວຽກງານການທ່ອງທ່ຽວຂອງລາວ ໄດ້ສ້າງບົດບາດຂອງຕົນໃນເວທີພາກພື້ນ ແລະ ສາກົນ ສາມາດຍາດແຍ່ງລາງວັນມາດຕະຖານການທ່ອງທ່ຽວອາຊຽນຫຼາຍພໍສົມຄວນ ນອກນັ້ນ ສປປ ລາວ ຍັງໄດ້ຮັບການໂຫວດໃຫ້ເປັນຈຸດໝາຍປາຍທາງການທ່ອງທ່ຽວ ສະແດງໃຫ້ເຫັນວ່າສາກົນໄດ້ຮັບຮູ້ ສປປ ລາວ ຫຼາຍຂຶ້ນ ໂດຍສະເພາະພາກທຸລະກິດ ທີ່ໄດ້ເປັນເຈົ້າການລົງທຶນສ້າງ ຜະລິດຕະພັນການທ່ອງທ່ຽວທີ່ມີຄຸນນະພາບ, ໂຄສະນາເຜີຍແຜ່ຜະລິດຕະພັນທີ່ໂດດເດັ່ນ ທາງດ້ານທໍາມະຊາດ, ວັດທະນະທຳ ແລະ ປະຫວັດສາດຂອງລາວສູ່ສາກົນ ດຶງດູດນັກທ່ອງທ່ຽວທີ່ມີຄຸນນະພາບມາຊົມໃຊ້ການບໍລິການ ເຮັດໃຫ້ຈໍານວນນັກທ່ອງທ່ຽວເພີ່ມຂຶ້ນໃນແຕ່ລະປີ. ສໍາລັບ 6 ເດືອນຕົ້ນປີ 2026 ສປປ ລາວ ສາມາດດຶງດູດນັກທ່ອງທ່ຽວໄດ້ ເຖິງ 2.5 ລ້ານ ເທື່ອຄົນ ເພີ່ມຂຶ້ນ 9.87% ທຽບໃສ່ 2025 ຊຶ່ງມີພຽງ 2.3 ລ້ານເທື່ອຄົນ. ໃນນັ້ນ ຕະຫຼາດຫຼັກຂອງພວກເຮົາກໍຍັງແມ່ນໄທ, ຈີນ, ຫວຽດນາມ, ສ ເກົາຫຼີ, ອາເມຣິກາ ແລະ ອື່ນໆ.
ກອງປະຊຸມສໍາມະນາຊຸກຍູ້ ແລະ ສົ່ງເສີມຕະຫຼາດການທ່ອງທ່ຽວລາວໃນຄັ້ງນີ້ ບໍ່ພຽງແຕ່ເອກະພາບຕໍ່ແຜນການສົ່ງເສີມຕະຫຼາດການທ່ອງທ່ຽວເທົ່ານັ້ນ ແຕ່ຈະຕ້ອງເປັນຈຸດເລີ່ມຕົ້ນບຸກທະລຸແຕ່ຫົວທີ ໃນການລົງມືຈັດຕັ້ງປະຕິບັດຕົວຈິງ, ການມີສ່ວນຮ່ວມລະຫວ່າງພາກລັດ-ພາກທຸລະກິດ ຖືເປັນກຸນແຈສໍາຄັນໃນການເຮັດວຽກງານສົ່ງເສີມຕະຫຼາດການທ່ອງ ທ່ຽວ, ຖ້າຫາກພວກເຮົາຮ່ວມກັນວາງແຜນຢ່າງດີເລືອກຕະຫຼາດ, ຕັ້ງເປົ້າໝາຍ, ກຳນົດວິທີການ, ແບ່ງຄວາມຮັບຜິດຊອບທີ່ຊັດເຈນ ອັນໃດເປັນພາລະຂອງພາກລັດ ອັນໃດເປັນພາລະຂອງພາກທຸລະກິດ ເຊື່ອວ່າລັດຖະບານ ແລະ ຄູ່ຮ່ວມພັດທະນາຈະເຫັນໄດ້ ຄວາມສໍາຄັນ ແລະ ພ້ອມທີ່ຈະສະໜັບສະໜູນທາງດ້ານວິຊາການ ແລະ ງົບປະມານ.
 |
ທ່ານ ນາງ ມະນີສາຄອນ ທຳມະວົງໄຊ ຫົວໜ້າກົມສົ່ງເສີມຕະຫຼາດການທ່ອງທ່ຽວ ກະຊວງວັດທະນະທຳ ແລະ ການທ່ອງທ່ຽວ ໄດ້ລາຍງານກ່ຽວກັບນະໂຍບາຍ ແລະ ແຜນວຽກງານຈຸດສຸມການທ່ອງທ່ຽວ 2026-2030, ແຜນການຕະຫຼາດການທ່ອງທ່ຽວອາຊຽນ ແລະ ແຜນການຕະຫຼາດການທ່ອງທ່ຽວຂອງປະເທດລຸ່ມແມ່ນໍ້າຂອງ (GMS) ແລະ ໄດ້ຮັບຟັງລາຍງານວຽກງານສົ່ງເສີມການຕະຫຼາດການທ່ອງທ່ຽວໄລຍະຜ່ານມາເປັນຕົ້ນແມ່ນການເຂົ້າຮ່ວມງານວາງສະແດງການທ່ອງທ່ຽວ, ກິດຈະກຳປິ່ນອ້ອມເພື່ອສົ່ງເສີມການທ່ອງທ່ຽວຢູ່ພາຍໃນ ແລະ ຕ່າງປະເທດ ໄລຍະຜ່ານມາ.
ພ້ອມນັ້ນ, ກອງປະຊຸມຍັງໄດ້ເປີດໂອກາດໃຫ້ຜູ້ເຂົ້າຮ່ວມໄດ້ສົນທະນາ ແລະ ແລກປ່ຽນບົດຮຽນຮ່ວມກັນໃນຫຼາຍຫົວຂໍ້ເຊັ່ນ: ແຜນການຮ່ວມມືລະຫວ່າງພາກລັດກັບພາກທຸລະກິດຂອງຂະແໜງການທ່ອງທ່ຽວ ໂດຍສະເພາະແຜນການເຂົ້າຮ່ວມງານວາງສະແດງການທ່ອງທ່ຽວໃນຕໍ່ໜ້າ ຢູ່ພາຍໃນປະເທດ ແລະ ຕ່າງປະເທດ, ແຜນການຈັດກິດຈະກຳປິ່ນອ້ອມເພື່ອສົ່ງເສີມການທ່ອງທ່ຽວ, ການສ້າງສັນຍາລັກການທ່ອງທ່ຽວຄືນໃໝ່ ແລະ ຊ່ອງທາງວິທີການໂຄສະນາເພື່ອເຂົ້າເຖິງກຸ່ມຕະຫຼາດນັກທ່ອງທ່ຽວເປົ້າໝາຍ.
ຂ່າວ: ຕຸໄລເພັດ
ຄໍາເຫັນ