ຜູ້ເຂົ້າປະກວດນາງສາວອັດຕະປື ທັດສະນະສຶກສາແຫຼ່ງທ່ອງທ່ຽວ ເມືອງໄຊເສດຖາ

ການລໄປທັດສະນະສຶກສາຄັ້ງນີ້, ນຳພາໂດຍ ທ່ານ ອ໋ອງຄຳ ຄູນສະໃໝ ຮອງຫົວໜ້າພະແນກວັດທະນະທຳ ແລະ ການທ່ອງທ່ຽວແຂວງ ຫົວໜ້າຄະນະຮັບຜິດຊອບການປະກວດ ໃນຄັ້ງນີ້. ສຳລັບສະຖານທີ່ ທີ່ບັນດານາງສາວທັງ 20 ນ້ອງໄດ້ໄປຢ້ຽມຊົມນັ້ນປະກອບມີ: ອະນຸສາວະລີ ພະເຈົ້າໄຊຍະເຊດຖາທິຣາດ ຊຶ່ງເປັນສະຖານທີ່ສັກກາລະບູຊາທາງປະຫວັດສາດ ແລະ ໄປທ່ຽວຊົມຄວາມງາມຂອງແຫຼ່ງທ່ອງທ່ຽວທຳມະຊາດທີ່ກຳລັງເປີດໃໝ່ ຄື: ຫາດດອນໃຫຍ່ທ່າເສນາຮັກ ທີ່ຕັ້ງຢູ່ບ້ານຝັ່ງແດງ. ກິດຈະກຳດັ່ງກ່າວ, ບໍ່ພຽງແຕ່ເປັນການຜ່ອນຄາຍຄວາມກົດດັນໃຫ້ແກ່ຜູ້ເຂົ້າປະກວດເທົ່ານັ້ນ, ແຕ່ຍັງເປັນການເຜີຍແຜ່ສະຖານທີ່ທ່ອງທ່ຽວທີ່ສວຍງາມຂອງເມືອງໄຊເສດຖາ ໃຫ້ເປັນທີ່ຮູ້ຈັກຢ່າງກວ້າງຂວາງຕື່ມອີກ.

ງານປະກວດນາງສາວອັດຕະປື ຮອບຕັດສິນ, ຈະໄດ້ຈັດຂຶ້ນໃນວັນທີ 28 ມີນາ 2026 ນີ້ ຢູ່ຫໍຫຼັກເມືອງຂອງແຂວງ ຈຶ່ງຂໍເຊີນຊວນພໍ່ແມ່ ປະຊາຊົນ ແລະ ພາກສ່ວນຕ່າງໆ ຮ່ວມຕິດຕາມ ຮັບຊົມ ແລະ ສົ່ງກຳລັງໃຈເຊຍໃຫ້ນາງສາວທັງ 20 ນ້ອງໄດ້ໃນມື້ງານ.

(ຂ່າວ-ພາບ: ຫັດສະດີ)